Waiata aroha 1
Nā Eileen Mata Te Rangi
Nā Te Maari Gardiner te pikitia
|
He tipuna wahine a Kahuwaero i moea e te patupaiarehe, ā, māna ngā waiata e rua e whai ake nei. Ko tēnei o ngā waiata he kōrero mō te āhua o te tūtakitakitanga i waenganui i a rāua. Ka oma a Kahuwaero ki Paetutu, he wāhi e tata ana ki te awa o Waimarino, ki reira ruku ai ki tētahi rua ko te huarahi tērā ki tana whaiāipo. E ai ki te kaituhi, nō reira mai pea ngā uri o tōna hapū o Ngāti Hine o Ngāti Tuwharetoa o ēnei rā he urukehu ngā huruhuru, i puta mai hoki i a Kahuwaero me tana whaiāipo he tūrehu. |
Kei te aupaki, kei te hāngū te ao
I raro i te pōtangotango
Mōkihi te haere a Kahuwaero ki tōna rua
Ka ruku ka puta ake i Te Paetutu
Ka ruku ka puta ake i Te Moana o Taupō
Tae atu ki te rarohenga.
Ka rongo i ngā kōhumuhumu
a ngā patupaiarehe
Ka rongo i ngā kata whakahāwea
a ngā patupaiarehe
Ka rongo i ngā waiata tīkapakapa
a ngā patupaiarehe
Ka rongo i ngā whakatangitangi
a ngā patupaiarehe
Pātari ana, akiaki ana
Kia haere ki tana whaiāipo
E whanga mai ana
E karanga mai ana
I roto i te pōuriuri.
Ka hono rāua
Ka patupatu o rāua manawa
Ki ngā mawhiti mōhukihuki
Ki ngā whakatangitangi whaiāipo
Tāmau ana rāua ki a rāua.
Ohotata kua huri te pō
Rā te haeata
Ka wehe rāua
Kahuwaero ki te ao mārama
Ehara i te moemoeā
Ko rāua anake
Aroha mutunga kore.