Te whakawai i te waka i a Te Reporepo
Nā Eileen Mata Te Rangi
|
Ka oti te hangā i te waka i a Te Reporepo ka tahuri ngā mahi ki te whakawai i a ia, ki te whakamānu hoki kia kitea tōna tau. Me kī he mea ātaahua ki te mātakitaki atu i a ia e whakamātauhia ana ki ngā ngaru me ngā karekare o te wai. |
Aukatia! Pāpuni!
Mimiti te wai, pakoa2 te wai
E ahu ki te hukinga3
E hou ki te whenua
Puta atu ki te moana o Taupō,
Ki te awa o Tongariro.
Aue, te tere o te awa,
Ka porowhita ngā okiri8
Pīoi! Pīoi!
Ka koropupū ngā pihapiha10
He maha ngā kōripo mōrearea
Hautū! Hautū!
Kei mua ngā tāheke e haruru ana
Ākina ngā ākau mō ake tonu atu
Āki! Āki!
Ka korohuhū, ka kārapu
Hautū! Hautū!
Kia kaha tawatawa18, kia toa
e waka
Ka pou ngā ngaru nanakia
Ānewa! Ānewa!
I runga i tō hawa takere
Hautū! Hautū!
Kei te tere whakahū te awa
Kei te mōnenehu ngā hū
Kei te waiata ngā tawatawa
Kei te tīoi te waka
Hautū! Hautū!
Ngā rārangi whakamārama
2pakoa – kia horomia te wai ki te whenua.
3hukinga – te mātāpuna, te tīmatatanga, te kunenga rānei.
8okiri – ko te wai tērā e hurihuri ana e ripo ana.
10pihipiha – ngā karekare o te wai.
18tawatawa – ko te wahie tēnei i tāraia ai ngā hoe.