Ruapehu
Nā Eileen Mata Te Rangi
|
Ahakoa tīmata tēnei kōrero mō ngā maunga ki roto i ngā whakaaro o neherā, engari ia ko te kaupapa kē nō naia tonu nei. E kōrero ana te kaituhi mō te āhua o te noho wahangū, hūmarie hoki, o Ruapehu maunga, kātahi ka hū. Nāna pea, nā te hunga tangata i whakaoho, i tūkino, kia puta tōna riri? |
Whakarongo
Ko rūnuku, ko rūrangi, ko rūpara2
Ko Ruapehu e ngunguru nei!
Tū kau ana a Ruapehu i te tonga
Ka hanguru, ka pūnuku
Ka hinga, ka takoto ki te whenua ū
Ka haruru te rongo
Puta noa i te rangi
Koia rutua9 ki te toi nuku9
Koia rutua ki te toi rangi10
Toremi ki te reinga
I a Ruaumoko e!
Ka tāwharu koe13 ki te rangitoto
Kārarapa14 ki te rangi
Ki te korohū, ki te pungarehu
Ki te puia, ki te hau piro
Ka rupe te whenua
Ka haere tō iwi ki hea?
E Ruapehu puritia, whitikiria
Kia ita, kia mau
Ka pō, ka pō
Ka ao, ka ao
Rā te haeata, ao ātea,
Awatea i te ripa, te tara ki Ruapehu
Tērā te kōtuhi, auahi ana ia
I te ripa o Ruapehu i raro
E te tupuna
Nā wai koe i whakaoho?
Nā tō iwi?
He aha te hara?
He tohu tēnei ki tō iwi?
Te pōuri, te pōuri
Nā tauhou koe i whakaoho?
Kei te riri koe ki a rātou
E tūkino nei i a koe?
E kūare nei, e kore nei
E whakarongo ki ngā tangi?
Te pōuri, te pōuri
Te mamae, te mamae
Te wawata e
Mō te ao taumauri41
Kia mihi ai au.
Ngā rārangi whakamārama
2rūnuku, rūrangi, rūpara – he kupu ēnei mō te āhua o te korikori, o te wiriwiri, o te oreore.
9Koia rutua – koia herea.
9toi nuku – te tihi o te whenua.
10toi rangi – te tihi o te rangi.
13Ka tāwharu koe – kua uhia te maunga ki te rangitoto.
14kārarapa – hihiko, uirara.
41te ao taumauri – kua eke te rangimārie te māriretanga hoki.