Ngā Mōteatea – hei whakamārama ake ki te kaipānui
Ko ngā waiata e toru e whai atu nei i tangohia mai i te pukapuka Ngā Mōteatea Part 1, i tāia ra i ngā tau ki muri. Tērā pea he kape kei tō kura, kei te Whare Pupuri Pukapuka rānei o tō tāone. He pai tonu kia tirohia e koe te pukapuka nei, kei roto hoki i a ia ērā atu o ngā whakamārama, me ērā anō kei te reo Pākehā. Ko ēnei ngā whārangi:
- He Waiata Aroha mō Te Tomo, wh. 140: waiata nama 42
- He Waiata Aroha mō Te Toko (Mahutu), wh. 150: waiata nama 46
- He Waiata nā te Tūrehu (Patupaiarehe), wh. 280: waiata nama 83.
Kua waihotia ngā waiata nei ki te āhua i whakatakotohia ki Ngā Mōteatea i te tuatahi, arā, kāhore he tohutō. Ko te whakaaro kia pēnei kia noho pūmau tonu te reo ki te wā o ngā tīpuna, me te tuku wāhi hei whakaarotanga māhau e te kaipānui ki te reo me ona tikanga kua rerekē nei i tēnei rā.
Ahakoa te katoa o ngā tuhituhinga o tēnei Te Wharekura i puta ake i a te iwi Ngāti Tūwharetoa, engari ia tērā ko te waiata mutunga i tikina atu i a Ngāti Awa kē. Nā te etita te whakaaro kia tāpiritia tēnei o ngā waiata mō te tūrehu ki ērā nā Eileen Mata Te Rangi, hei rekareka noa i te hinengaro.
He maha noa atu ngā waiata tawhito a koro, a kui mā kei te pukapuka Ngā Mōteatea. Ko te tūmanako ka tirohia e koe ērā atu hei āwhina ake, hei kīnaki ake, i ngā mātauranga akoranga ka kaingākautia e koe.