Te Tiaki Manu
He Titiro Whānui ki ngā Karere Matua o roto i ngā Tuhinga
Ko tētahi kaupapa ka ara ake i konei, me ngā kōrero mō Te Mīere Mānuka, ko te mana whenua. I te mea nō te whānau Barrett tō rātou pito whenua i Kāpiti, ā, nō ngā kaitiaki o te te Ōmataroa Rangitaiki Block 2 tō rātou pito whenua, kei a rātou te mana ki te whiriwhiri ka ahatia aua whenua.
He āhua rite ngā wawata me ngā waiaro o ngā whānau e rua. Ki tā rātou, ko tēnei mea te tiaki taiao, te whāomoomo i a Papatūānuku, he whakapau kaha kia pūmau ki te mata o te whenua ngā momo māori mō ngā reanga kei te piki ake. Mā konei e kite ai, e rongo ai, e mārama ai ngā tamariki kāore anō kia whānau mai ki ngā hua whakahirahira i puta ake i te mahi a Tānemahuta.
Ahakoa i tēnei taumata e tika ana kia āta whiriwhiri ngā ākonga mēnā ka taea ētahi otinga hangarau, taha moni nei, ko te taha mahi te aronga nui i ngā tauira o tēnei rauemi; mō muri kē pea arohia ai ngā pēheatanga taha moni nei. Arā, ko ngā uara, ngā whakapono, me ngā tikanga ngā mea e ārahi ana i ngā whānau, kaua te moni.
He torokaha tonu te hono o Te Tiaki Manu ki Te Pūtaiao.
