Ētahi Āhuatanga e Tika ana kia Whiriwhiria i ngā Kōwae Mahi Katoa
Te Tautohu i Tētahi Hiahia
Mā te ākonga tonu pea te hiahia e tautohu, engari ka taea anō e te pouako te kōkiri, nā runga anō pea i te aranga ake o tētahi take o te wā. Anei ētahi tauira o ngā hiahia e whakatauiratia ana i tēnei rauemi:
He Wahakura. Ki te whakaiti ake i te tokomaha o ngā pēpē Māori e mate ohorere ana, e ‘mate pouraka’ ana.
Te Tā Moko. Ki te whakaatu i te tuakiri, ki te whakaū i te whānaungatanga, i te noho haepapa.
Te Mīere Mānuka. Ki te whakatika i te noho kore mahi i tētahi hapori i te taiwhenua.
Te Tiaki Manu. Ki te whakapūmau i ngā manu māori hei pārekareka mā ngā reanga whai i muri iho.
Ngā Mahi Pāpāho Māori. Ki te hora i ngā kōwhiringa pāpāho e whāngai ana i te mātauranga, i te pārongo, e whakangahau ana anō hoki i te hunga kōrero Māori, ahakoa te taipakeke.
Te tautohu me te whai māramatanga ki ngā take e pā ana ki te hiahia i tautohua.
- He aha i kīia ai tēnei kaupapa he hiahia?
- Nō wai te hiahia, e pāpā atu ana te hiahia ki a wai?
- He aha ngā pānga ki ētahi atu?
- He aha te take me whakariterite au ki te whakaea i tēnei hiahia?
Te Whakahaere me te Whakaatu Rangahautanga
Ko te kaupapa o tēnei rangahautanga:
- he whakawhānui i te mōhio o te ākonga ki te āhua o te hiahia, o te huarahi rānei e wātea ana
- he tautoko, he ārahi i te whakaaro, i te wānanga a te ākonga
- he whakamārama ake i tētahi āhuatanga
- he whai kia puta he otinga, he rongoā rānei i runga i te mārama
He maha ngā huarahi hei whakaatu i ngā rangahautanga.
Ko te kaupapa o te whakaaturanga:
- he whakamōhio i ētahi atu
- he whai kia mārama ake ō rātou ake whakaaro, mā roto tonu i te whakaaturanga atu ki ētahi atu
- he whakaū i te whakaaro he kaupapa tēnei e tika ana kia whāia
- he whai kia mārama ētahi atu ki te hiahia, me ngā take e karapoti ana i taua hiahia.