He Wahakura
He Titiro Whānui ki ngā Karere Matua o roto i ngā Tuhinga
Kua hoahoaina e tētahi tākuta o Ngāti Kahungunu he taonga hei whakaiti ake i te tokomaha o ngā pēpē Māori e ‘mate pouraka’ ana. Ko te taonga nei e kīia ana he wahakura. E hāpai ana te taonga nei i ngā uara Māori, i ngā tikanga Māori, ā, e tautoko ana i ngā whānau, i ngā hapū, i ngā iwi, kia riro anō i a rātou te mana whakahaere i ngā take e pāpā nei ki te iwi Māori o nāianei.
Ko te hua i puta ake, i takea mai i ngā mātauranga o ētahi wāhi e toru:
- Ngā tatauranga me ngā rangahautanga hauora
- Ngā mātauranga, ngā uara me ngā whakapono Māori
- Ngā pūkenga me ngā mātauranga o ngā kairaranga
Nā te tuituinga o ēnei momo mātauranga e toru, kua puta ake he taonga e whakaea ana i tētahi hiahia nui i Aotearoa.
E hāpai ana, e whakamihi ana te tuhinga i te whakaaro ko te kawenga hangarau, he hua ka puta ake i te kotahitanga o ngā mātauranga kua kapohia i wāhi kē.
