Ngā karere matua

Ngā karere matua me noho tāhuhu mai ina whakamahia tēnei rauemi

Me whai take ngā kaupapa kia kore ai e whāia mō te kore noa iho.

Hei whakahiato i ngā mōhiotanga hangarau ka tīmata i te ao Māori me tōna hāngai ki te ao hurihuri. Me aro anō ki ngā uara ngā pūkenga me ngā mōhiotanga hangarau o te ao e taunga ana ia. (TMoA whārangi 104)

I a koe ka whakatakoto kōwae mahi mō tētahi o ēnei horopaki, kaua e wareware he hāpai tonu tā te hangarau i ngā tikanga toitū. Me whai whakaaro ki a Papatūānuku ina kohikohi, ina porowhiu ngā tamariki i ngā rauemi i roto i ā rātou mahi. Me āta tirotiro te roa e koiora ana ā rātou hua, me te pānga whānui o ā rātou mahi ki te taiao nui tonu.

Ka uru mai anō ki te hangarau ngā mātauranga me ngā pūkenga o Te Hauora, Ngā Tikanga ā-iwi, Te Pūtaiao, Te Pāngarau me Ngā Toi. Ā, ko Te Reo Māori hei tuitui i te katoa. Ka noho tahi ngā whenu e rua, Ngā Āhuatanga Matua me Te Whakaharatau Hangarau, ki te kōwae mahi kotahi. I te nuinga o te wā, kei roto i te horopaki ako ētahi Aho Hangarau e rua, e toru rānei e rere ana. Nā ngā aho, ko te arotahinga e whakatakotoria ai ngā horopaki.

Arā pea te mahi pai, ko te tīpako i tētahi aho kotahi, koia hei ārahi i te hanga o ngā mahi ako. Mēnā he aho tuarua, tuatoru, e pai ana, engari ko te aho tuatahi te mea nui. Ko ngā Whāinga Paetae ngā mea ka pūmau tonu i roto i te kōwae mahi.

Kei te tūtohi nei ētahi aho e tautoko ana i ngā horopaki kua noho mai ki tēnei rauemi.

Ki runga ^