Te Kete Ipurangi Navigation:

Te Kete Ipurangi
Communities
Schools

Te Kete Ipurangi user options:


Te Wharekura Ministry of Education.

Mā te pouako navigation


Te patunga a Ruru-teina i te Ngārara-huarau

Nō Ngāi Tahu

Ka noho a Ruru-teina me ōna tuākana i tō rātou kāinga. Ka rapua he ahi mā rātou; rapu noa, kāhore i kitea. Kātahi ka kitea atu te ahi o Te Ngārara-huarau e kā ana. Ka kī atu ngā tuakana ki a Ruru-teina, "Haere, tīkina tētahi ahi mā tātou!" Ka mea puku a Ruru kia noho ia, heoi, tonoa ana e ngā tuākana kia haere, ā, ka haere. Ka tae ki te kāinga i a te Ngārara-huarau, rokohina atu e noho ana ko Kiore-tī, ko Kiore-tā. Ka karanga mai a Ngārara-huarau, "Kiore, ko wai tēnei?"

Ka karanga atu a Kiore, "Ko Ruru."

Ka kī mai a Ngārara-huarau, "I haere mai ki te aha?"
Ka mea atu a Kiore, "Ki te tiki ahi mai."

Sketch of a woman running.

Ka haere mai te Ngārara-huarau, mea rawa ake a Ruru ki te haere, kua tae mai taua atua nei, ka karapoti te hiku o te waero, ka mau a Ruru. Ka noho i a te Ngārara-huarau. Ka taona he umu kai mā rātou, ka maoa mai te umu, ka tu ki te aroaro o Ruru, paru rawa i te unahi o Te Ngārara-huarau. Ka noho rātou ka kai. Ka pahure atu a Te Ngārara-huarau, ka kī atu a Ruru ki a Kiore-tī rāua ko Kiore-tā "Ko tana āhua anō tēnei o tēnei wahine?"

Ka kī mai a Kiore-tī "Āe, ko tana āhua anō tēnei." Ka kī atu a Ruru, "Tanumia rawatia ngā kai mā tātou i te unahi."
Ka mea mai a Kiore-tī rāua ko Kiore-tā "E kī ana koia koe he tangata tēnei wahine? Ehara, he atua kē ia."

Ka rangona mai aua kupu e taua atua nei, ā, ka karanga mai, "Ākuanei rawa koe te mate ai!" Ka kī mai a Kiore-tī rāua ko Kiore-tā ki a Ruru, "Haere koe!"
Ka karanga mai anō taua atua nei, "Ākuanei koe te mate rawa ai!"

Ka tū tonu mai ki runga taua wahine kia haere mai ki a Kiore-tī rāua ko Kiore-tā. Ka rere a Kiore-tī ki roto ki te pōhatu, ngaro rawa atu. Ka rere a Kiore-tā ki roto ki te ngahere, ka ngaro atu.

Kātahi ka whai taua wahine i a Ruru, ā, ka karanga atu, "E Ruru, hoki mai! E Ruru, hoki mai! E kore au e tae atu i tēnei rā, engari hei te rā pūkohukohu, ko au tēnā!"

Ka tae a Ruru ki te wāhi i noho ai ōna tuakana, ka whaihangaia te whare kotahi te mataaho, ka noho rātou ki te whanga ki taua wahine. Ka tae ki te rangi pūkohukohu, kātahi ka whakatata mai taua wahine rā, ka karanga mai, "E Ruru, kei whea koe?"

Ka karanga atu a Ruru i runga o te tuarongo o te whare, "Tēnei anō au!" Ka karanga atu anō taua atua rā, a Ngārara-huarau, "Hua koe i oma mai ai, e kore au e tae mai?" Ka tomo te wahine rā ki roto o te whare.

Ka puta a Ruru ki waho, ka katia te tatau. Ko ngā tuākana e whakapuru wahie ana ki ngā taha o te whare, ā, ka tahuna ki te ahi. Ka kā tēnei wāhi, me tēnei wāhi, ka puta ki te roro, ka uhia te whare e te au o te ahi; ka kapia hoki te mataaho o te whare e te ahi. Ka auē taua wahine i roto i te whare i te wera o te ahi. Ka horo te whare, ka aue anō te wahine rā, ka karanga, "E ruru, whakawareware i te mura o te ahi! Auē taukiri" Ā, ka mate taua atua nei, a Ngārara-huarau.

Kātahi ka hoki a Ruru mā ki tō rātou kāinga, ki ō rātou mātua.

Ki runga ^



Site map


Footer: