Roanga-rahia rāua ko Ruru-teina
Nō Ngāi Tahu
Kotahi te wahine rongonui e kīa ana e te kōrero a ngā iwi katoa, ko Roanga-rahia te ingoa. Nā, tērā tētahi whānau, he tuākana, he tēina. Ko Ruru-teina te pōtiki. Ka rongo aua tāngata nei i te rongo ātaahua o taua wahine, ā, ka mea rātou kia haere, kia kite rātou. Ka mea puku a ia, a ia o rātou, māna taua wahine.
Ka mahia te waka, ka oti, ka mānu ki te wai, ka hoe taua hunga, ā, ka tae ki te kāinga i a Roanga-rahia, ka tōia te waka ki uta. Ka haere rātou ka tae ki te kāinga, ka haere ki roto o te whare o te kāinga, ka noho rātou, ka meatia he kai mā rātou.
Ka ahiahi te rā, ka kī mai ngā tuākana o Ruru, "Māu e taka ā tātou mea. Me tiaki hoki e koe ā tātou taonga kia pai, kei poke i te paru."
Nā, ka haere ngā tuākana ki ngā whare taka o taua kāinga, ā, ka tae rātou ki ngā whare taka, ka mau tēnei tāngata o rātou ki tana wahine; ka kī mai te wahine, "Ko au tēnei ko Roanga-rahia." Ka mau tēnā tāngata ki te wahine, ka kī anō taua wahine, "Ko au tēnei ko Roanga-rahia". Ka kī mai a ia wahine, a ia wahine ki ia tāngata, ki ia tāngata o aua tuākana o Ruru ko ia a Roanga-rahia. Kāhore, he mea whakakake nā rātou, ā, ka moe ratou ko ngā tāne, ngā tuākana o Ruru-teina.
No te pahuretanga o ngā tuākana, ka haere a Ruru ki te whare, ki a Rongo-rahia, rokohina atu e noho ana rāua ko tona whaea. Ka tae atu a Ruru, ka mau ki a Rongo-rahia. Ka ki atu te wahine ki tona whaea, "Haere koe ki waho nei hei titiro i te awatea, ā, ka awatea, ka karanga mai ki a au." Ka moe a RUTU rāua ko te wahine, ā, ka mārama, ka karangatia mai e te tūtei, "Kua awatea rā!"
Ka puta a Ruru, ka haere, ka tae ki roto i tō rātou whare, tika atu anō ki runga ki ā rātou mea takoto ai. Ka tae atu ngā tuākana, ka kī tahitahi atu rātou ki a Ruru, "Kua noho ahau nei i a Roanga-rahia, ā, kāhore he wahine māu."
Ka noho anō ngā tuākana, ka ahiahi te rā, ka haere anō ki ā rātou wāhine. Ka noho ano a Ruru, ā, ka pāhure atu ngā tuakana, ka haere anō a Ruru ki tana wahine, ā, ka moe anō rāua. Ka ao te rā, kua hoki anō a Ruru ki tō rātou whare. Tae rawa atu ngā tuākana, e takoto ana anō a Ruru i runga i ārātou mea. Ka noho rātou, ā, ka meatia mai he kai mā rātou. Ka ahiahi te rā, ka kōrero kia mānu rātou, kia hoki ki tō rātou kāinga.
Ka ahiahi anō te rā, ka hoki anō rātou ki ārātou wahine. Ka noho a Ruru-teina i tō rātou kāinga, ā, nō muri, ka haere anō ki tāna wahine. Ka tata ki te ata, ka kī atu a Ruru ki te wahine, ki te whaea hoki, kia haere rātou ki runga i te waka. Ka whakaae raua, a Roanga-rahia rāua ko te whaea, ā, ka arahina raua e Ruru ki runga ki te waka. Ka haere rāua ki roto ki te wharau o Ruru noho ai. Ka hunā rāua e Ruru ki reira, ā, ka waiho atu a Roanga-rahia rāua ko te hoa noho i roto i te wharau noho ai. Ka haere a Ruru ki roto ki tō rātou whare, ka takoto.
Ka puta mai ngā tuākana, ka ki atu ki a Ruru kia manu rātou. Ka toia te waka, ka mānu, ā, ka haere tēnā tāngata me tana wahine, ka utaina, ā, kātahi ka hoe. Ka rere rātou, ā, ka ū ki uta, ka toia te waka ki uta. Ka tae rātou ki tō rātou kāinga, ka ahiahi. Ka meatia he hakari mā rātou.
Ka kī mai te hākui rāua ko te hākoro ki a Ruru, "Nā ia ngā wahine, ko ngā wahine a ōu tuākana; ko koe anake kāore āu wāhine." Ka kī atu a Ruru, "Āe, kāore kau aku nei wahine." Ka kī atu anō te tama, "Koia kāhore he tāngata kia tae ki taku wharau?"
Ka kī mai te hākui, "Kāhore anō."
Ka kī atu te tama ki tana hākui, "E kore koia koe e haere?" Kātahi te hākui ka haere, ka tae atu, ka kite i a Roanga-rahia raua ko tōna whaea. E mau ana ngā roimata i te kanohi o Roanga-rahui a, e noho ana te whaea. Ka arahina mai taua wahine me te whaea i te pō, ā, ka tae mai ki te kāinga. Ka ao te rā, ka karanga atu te hākui, "Hua atu ai au kei a Ruru matua āku te wahine rongonui nei. Kāhore, nā ia ka noho te tino Roanga-rahia i taku potiki."
Nā ka rangona e ngā tuākana, ka haere mai rātou kia kite i taua wahine. Ka kite i te ātaahua o te kanohi, me te hūmarie o Roanga-rahia. Ka tino whakatakariri ngā tuākana, ka haere ki ārātou wahine, ka patupatua aua wahine katoa. Nā, ka hinga ngā tuakana nei i a Ruru-teina.