Panama
Nā T. S. Kāretu
Kua tata kē nei mātau te maoka, i a mātau i tae atu ai ki Panama. Ko te kaha kē o te wera, a, nā te āta tū o tō mātau waka, kāore i hauhau a roto. Ko te nuinga o ngā pākehā o konei he Amerikana, ā, ko te nuinga o rātau kei Balboa e noho ana. Ko tēnei tāone te mea tuatahi e tae ai te tangata, ki te tae mai ia ma te taha tonga o te kerikeringa awa e kiia nei ko te Panama Canal. Nō te tekau mātau i whakaaetia ai kia haere ki uta. Ko mātau ko ōku hoa i piki ki runga tētehi, ka haere ki te tāone o Panama.
Ko te iwi ake o konei he kirimangu, ēngari ko tō rātau reo ko te reo Pāniora. Nā te kaha moe ki te pākehā, kua mā haere ngā āhua, ēngari ko tō rātau reo kei te mau tonu.
Ko te tāone nei he paruparu, a, ko te nuinga o te iwi ake o reira he pōhara; me kore ake nei te kāuta i ō rātau whare. Ko te tokomaha kē o rātau kei ngā huarahi e patipati moni ana. Ko tēnei mea ko te pōhara o te tangata me te paruparu o te tāone ka kitea ki konei. Ko ngā mea o roto i ngā toa he iti rawa atu te utu he iti ake i te hoko mai i te wā kāinga nā. Ngā āhua mea katoa ka taea te hoko mai i ngā toa.
Nō te pō, i haere anō mātau ki te mātakitaki haere, a, i tae mātau ki ētahi wāhi ātaahua. I piki mātau ki runga i tētahi hiwi, ka titiro iho ki Panama: ka ātaahua kē! Ko te pōuri hoki kei te huna i ngā mea weriweri. I haere anō mātau ki ētahi o ngā wāhi whakangahau o konei, ā, ka rawe kē hoki!
Nō te ono i te ata mātau i tīmata ai ki te whakawhiti mā te awa o Panama. E waru hāora pea mātau i roto i te awa nei, kātahi anō ka puta mai ki waho. Whakarerea atu ana te Moana nui a Kiwa.