Miami
Nā T. S. Kāretu
Kua tīmata te makariri haere i a mātau i ū ai ki Miami i te whenua o Amerika. Nō te toru o Hānuere i te tau kotahi mano e iwa rau e ono tekau mā rua mātau i ū ai. Ko te Kirihimete me te Tau Hou i whakanuitia e mātau ki te moana.
Katoa ō mātau wawata ki tēnei mea ki te tāone Amerikana i ea i tēnei, i Miami. Ko ngā toa he nunui, ā, he teitei hoki. O ngā wāhi katoa i tae ai mātau, ko tēnei te wāhi nui te utu o ngā taonga i roto i ngā toa. I te pō, ka kitea te ātaahua o tēnei tāone, ā, ka kitea hoki te nui o te moni a tēnei iwi. Me kore ake te awatea i te kaha o ngā raiti i runga i ngā toa me ngā whare teitei o konei.
Kotahi anake te mate o tēnei tāone - kāore kē i te noho kotahi ngā iwi o konei, ngā pākehā rātou ko ngā kirimangu. Kātahi anō au ka kite i tēnei mea, i te whakawehewehe o te tangata nā te mea he rerekē nō te kiri o tētahi i tētahi. Rongo ai tātau i ngā kōrero mō tēnei tū whakahāwea, ā, kite ai tātau i roto i ngā pepa, ēngari kāore tātau e pēnei ana ka āta kitea-ā-kanohi e tātau. Ko ngā wharepaku i roto i ngā tāone, ko tētahi mō ngā pākehā, ko tētahi mō ngā kirimangu. Ko ētahi o ngā toa o konei, he pēnei anō.
Kotahi tō mātau rā ki konei, ā, kātahi anō mātau ka tīmata ki te rongo haere i te makariri. Mai i te kāinga ki konei i pai katoa ngā rangi - kāore he ua, ā, he kaha hoki te mahana me te wera. Heoi anō tā mātau mahi i a mātau i te moana he pārara i te rā, he moe, ka oho ake, ka kai. Ko te moana i noho marino tae noa mai mātau ki Miami.
Atu i Miami ki Ingarangi i tīmata te makariri haere nā te mea, i a koutou e raumati ana, kei te hōtoke kē a konei, ā, nā reira hoki mātau i rongo ai i te makariri. Āpiti atu ki te makariri ko te karekare o te moana, ā, nā te kaha pēnei o te moana, ka hōtikia ā mātau tēpu. Ko ngā mea uhi i ngā tēpu i whakamākūtia kia kore ai ngā pereti e mania, ā, kia kore ai hoki e maringi mai ā mātau kai. Ahakoa i hōtikia ngā tēpu, i maringi tonu ngā kai a ētahi o mātau. Mai i te kāinga kātahi anō ka tīmata te pā mai o te hia ruaki ki a au, i te kaha tāhurihuri o te waka.
I te pō o te tekau mā rua o Hānuere ka whiua te hākari - tēnei mea te kai i whakatakotoria ki ō mātau aroaro. Ko te pō tēnei o te hākari poroporoaki, a, i tēnei pō ka kitea ngā mea i te pōuri i te mōhiotanga ā te ata o te tekau mā whā ka wehewehe rātau. Me kore ake te Kirihimete i te pō nei i te kaha ngahau o te katoa.
Nō te pō o te tekau mā toru o Hānuere i kitea tuatahitia ai e mātau ngā raiti o Ingarangi e kimokimo mai ana ki a mātau. Nā te wawe o tō mātau tae mai, kāore mātau i whakaaetia kia haere ki uta - i kiia mai hei te ata rā anō mātau whakaaetia ai kia haere kia heke atu. He nui tonu ngā mea o Ingarangi i runga i tō mātau waka, ā, i te kaikā katoa rātau ki te heke ki uta, ā, i taua pō ko te nuinga o mātua kāore i moe.
Oho ake i te ata o te tekau mā whā, kua ū kē mātau ki uta, a, heoi anō te mahi i te toe he whakawhāiti i aku taonga. Ko te nuinga o mātau i te rūrū haere anō ki ō rātou hoa me te kī haere, "Kaua nei e wareware ki te haere mai ki te toro mai i a au."
Ko au nei, kua kore kē au i whakapono kua āta tae mai au ki Ingarangi, ki tēnei moka o te ao nei. Rūrū atu au ki aku hoa o runga i te waka, ā, heke atu ana au i te waka. I piki atu au ki runga i te tereina, ā, tae mai ana au ki Rānana, te wāhi e tatari mai ana ētahi hoa ōku ki a au.