Ko ētahi tāone nunui o te ao kua tae au
Nā T. S. Kāretu
Me kōrero ake au ināianei mō ētahi tāone nunui o te ao kua tae au mai i taku wehenga mai i te kāinga nā.
Ko te mea tuatahi ko Rānana, tētahi o ngā tāone tino nunui o te ao katoa. Katoa ngā tāngata kei Rānana nei e noho ana ka tata te tekau miriona, ka kite iho ai koutou i te nui o tēnei tāone. Nā, e kiia ana ko ngā mea o te kāinga nā kei konei e noho ana, e hararei ana rānei, hui atu hoki ki ngā mea pēnei o Ahitereiria, ka tekau mā tahi mano. Ko te nuinga o ngā rāwaho kei Rānana nei e noho ana nō ngā moutere e kiia nei ko te West Indies. Hui katoa ai rātau kei konei e whitu tekau mā whitu mano.
E ai ki ngā kōrero kāore kē i te tino rata atu ngā mea ake o konei ki ngā kirimangu nei, ā, kei te taki noho takakino hoki rātau. He nui tonu ngā pākehā ake o konei kua ki mai ki a au kāore kē rātau i te rata atu ki ngā autaia nei, ēngari me pēhea kē hoki? Ahakoa ko hea te wāhi haere ai te tangata i Rānana nei, ka kitea ngā kirimangu nei - kei roto rātau i ngā āhua mahi katoa, ā, nā tō rātau nui hoki i konei kua itiiti haere te mahi mā ngā pākehā ake o konei. Ko ngā mahi e mahia ana e ngā kirimangu nei kāore i te tino pīrangitia e ngā pākehā i te kaha iti o te utu, nā reira kua riro i ngā kirimangu nei, nā te mea kāore kē rātau e āro ake ana ki te utu e whiwhi ai rātau. Koinei rā tētahi o ngā take o te kore pīrangi o ngā pākehā o konei ki ngā kirimangu.
Buckingham Palace
Nā, i tērā tau i whakatūria e te Kāwanatanga o konei tētahi ture ki te whakapā i te uru noa mai o te tangata ki Ingarangi nei. E kī ana ētahi i roa rawa te waiho a te Kāwanatanga i tiaki rā anō kia nui ngā tāngata o konei kātahi anō ka tahuri ki te whakapā i te uru mai o te tangata. Ināianei me uaua kē te tangata ka uru mai ki Ingarangi mena kāore ana mahi i te tuatahi, kāore rānei i te nui ana moni hei tiaki i a ia, i a ia e kore e mahi ana. Ki te pīrangi haere mai noa te tangata ki te hararei, he pai noa iho tana uru mai, ēngari mena kei te pīrangi noho iho mō tētahi wā roa, he uaua kē. Ko tātau o konā he pai noa iho te uru mai; mō ngā mea anō hoki o Ahitereiria me ērā atu whenua kei raro i te karauna o te Kuini o Ingarangi.
Ko te mea tino pai rawa atu ki a au o Rānana ko te wātea o te tangata ki te whai i tāna i hiahia ai. Ahakoa pēhea te rerekē o te tangata i Rānana nei, kāore e kōrerotia, kāore hoki e tiromākututia. Ko ngā āhua tāngata katoa ka kitea ki Rānana nei, ā, nā te waia pea o ngā mea ake o konei ki ngā momo tāngata katoa i wātea ai. O ngā wāhi katoa kua tae au, koinei anake pea te wāhi pēnei te kaha o te wātea o te tangata - kāore kē i pēnā i Aotearoa nā te whāiti o ngā hinengaro o konei!
Heoi anō te mea o Rānana kāore au e tino pīrangi ko te kohu me te hukārere. Ka karawhiu ana ēnei, ka tino rāngona tēnei mea te makariri! I te hōtoke kua hipa ake nei, i tino karawhiu te huka, te hukarere me te hoku anō hoki. Ka kohu ana a Rānana nei, me uaua kē ka kite te tangata i te kaha mātotoru. Āpiti atu hoki ki ēnei ko te raumati - he waimarie te whiti o te rā mō te toru rā, whā rānei. Kei te mōhio mai koutou i te wā e hōtoke ana a konā, kei te raumati a konei. Kāore kē e nui ana te ua ki konei pēnā i konā, nā reira kāore kē e tino mōhiotia ana te waipuke ki konei.
Kei Rānana nei ētahi o ngā wāhi rongo noa ai te taringa, kāore kē e kitea ana e te kanohi. Kua hau ngā rongo o ēnei wāhi ki ngā tōpito katoa o te ao, ā, ki te kitea-ā-kanohitia ka mōhio te tangata nā te aha i rongonui ai. Ko ētahi nā te kaha o te ātaahua, ko ētahi nā te mea i reira ētahi o ngā tāngata tino rongonui o Ingarangi e noho ana, ā, ko ētahi hoki nā ngā taonga kei roto e takoto ana. Ko ētahi noa iho o ēnei wāhi ka taea e au te whakaahua i konei.
Me kī pea ko Buckingham Palace tētahi o ngā wāhi tino rongonui o Rānana nei koinei te kāinga o te Kuini i a ia i Rānana. Kei waenganui tonu o Rānana te wāhi nei, ā, i ngā hāora katoa o te rā ka kitea ngā hōia i waho e tū ana, e tiaki ana i a ia. Me kite rā anō te tangata, ka mōhio ai ia ki te nui o te wāhi nei. Ki te tirohia atu i te tīmatanga o te huarahi e kiia nei ko te Mall, ka kitea te ātaahua. He rākau kei ngā taha e rua o te huarahi nei, ā, ka pua ana hoki ko te mutunga kē o te ātaahua.
Ko te whare karakia tino rongonui o konei ko Westminster Abbey. Ka mutu kē te ātaahua o te wāhi nei - ngā wini, me ngā whakairo o runga i ngā pakitara nō nā noa nei whakahoutia ai ētahi wāhi, ā, kua pai anō. Ko tēnei whare karakia nō te tau kotahi mano e rima tekau i tīmatatia ai, ka kitea iho ai te pakeke o tēnei wāhi. Ko tētahi whare karakia rongonui o konei ko St Paul's Cathedral, ā, ko tēnei nō te tau kotahi mano e ono rau e whitu tekau mā rima i tīmatatia ai, ā, nō te tau kotahi mano e whitu rau kotahi tekau i oti ai. I aituā ētahi wāhi i te wā o te Pakanga Tuarua, ēngari ko ēnei wāhi kua whakahoutia ināianei. I ngā pō o te Kirihimete ka tino mārama a St Paul's Cathedral i te tini o nga raiti.
E whāngai ana ngā tāngata i nga kererū i Trafalgar Square
Ko tētahi anō o ngā wāhi rongonui ko Trafalgar Square. Kei waenganui tonu o Rānana te wāhi nei. He wāhi pai mō te whakatā, ā, hei ngā Rātapu kī ana i te tangata. Koinei hoki tētahi o ngā wāhi huihui o ngā āhua tāngata katoa. Tēnei mea te kererū ka kitea ki konei, ā, nō tō rātau waia pea ki te tangata, kua rite tonu ki te manu mōkaikai nei.
N, kei tētahi wāhi o Rānana ka whakaaetia te tangata ki te whakahua i ōna whakaaro mō ngā āhua kaupapa kōrero katoa. Heoi anō te kaupapa kāore e whakaaetia ko te Kuini rātau ko tana whānau. I konei ka rāngona ngā whakaaro o ngā momo tāngata katoa e pā ana ki te Kāwanatanga, he Atua rānei kāore rānei, me ētahi atu kaupapa kōrero. Ko ētahi o ngā tāngata kōrero i konei he tino nui te mātauranga, ā, ko ētahi hoki kāore kē nei he kai o roto i ō rātau māhunga!
Koinei rā ētahi o ngā wāhi hei kite mā te tangata, ā, koinei hoki ētahi o ngā take i pīrangi ai au ki tēnei tāone nui, ki Rānana.