Mō ngā kupu hou
Hei Mahi 7
Kia mutu te rapu whakamāramatanga mō ngā kupu hou, ka tākaro Whakaari Ngū ngā ākonga. Ka tū atu, ka tū mai rātou ki te whakaari ngū atu i ngā kupu hou.
Ka mahi ā-rōpū ngā ākonga ki te rapu i ngā kupu hou nō roto i te kōrero i tuhia e Tūpoutahi Kaipara-Winitana, arā, He karakia ki a Tāne (whārangi 4 -12) o Te Wharekura 87. He kupu ēnei ehara i ngā ingoa huhua mō Tāne. Ka whakaritea mā tēnei rōpū ngā kupu hou i tēnei whārangi e rapu, mā tērā rōpū ngā kupu hou i tērā whārangi e rapu, ā, haere tonu ana kia kapia te kōrero katoa e ngā rōpū katoa.
Ka tuhia e tēnā rōpū, e tēnā rōpū tana rārangi kupu hou ki runga kāri. Ka rapu i ngā whakamāramatanga mō ia kupu mai i ngā papakupu, ka tuhia ki tērā atu taha o te kāri.
Ka akoako tahi, ā, ki roto tonu i ngā rōpū ka kohia ngā kāri, ka tū mai tētahi ki te tiki i tētahi kāri engari kia kaua ia e whakaatu ki te rōpū. Ko tāna mahi kē, he whakaari ngū atu ki te rōpū te kupu kei te kāri. Ka ngana te rōpū ki te raparapa i te kupu kei te whakaaringia. Ki te tika tētahi, ka riro māna te wā whakaari i tētahi atu kupu hou ki te rōpū. Ka mahi anō mō te kōrero Ngā Matatini o Tāne nā Kua Ranea Aperehama i tuhi, (whārangi 13-31). Ka tukuna kia akohia e te karaehe katoa ngā kupu hou katoa, ā, ka tākaro anō te kēmu me te katoa o ngā ākonga.
He Kupu Taka
| whakaari ngū | charades |
| whakaari ngū atu | mime |
| raparapa | to guess |
Te Marautanga o Aotearoa
| Marautanga | Te Reo Māori |
| Taumata | 5 |
| Ngā Āhuatanga o te Ākonga Ka whakapuaki i ngā momo reo mō ngā horopaki ōkawa, ōpaki hoki. Ka haere tonu te whakapārekareka i te rere o te reo ki ngā āhuatanga Māori ake nei. He whaihua, he mārama āna tuhinga i ngā momo tuhinga huhua noa. | |
| Aheinga Reo
| Ka tutuki te whānuitanga o ngā āheinga reo i roto i te wairua ngahau me te hiahia ki te whakawhitiwhiti whakaaro. |
| ā-Tinana (mātakitaki/whakaatu) | 1. Ka mārama ki te reo ā-tinana i ngā horopaki huhua, ahakoa ōpaki, ōkawa rānei. 2. Ka whakamahi i ngā wāhanga o te tinana hei whakawhitiwhiti whakaaro, kare ā-roto. |
| Rautaki Reo | Ka whakamahi rautaki reo, ā, ka taea te whakamārama ngā huarahi kua whāia hei whakatutuki i tāna i whakaputa ai, i rongo ai. |
| ā-Tinana | 3. Ka hāngai te reo ā-waha me te reo ā-tinana ki te kaupapa. |
He hononga o tēnei mahi ki NCEA
Te Reo Rangatira Taumata 1 Ā-roto
AS 90805 putanga 1 Mātakitaki i te reo ataata 3 whiwhinga
