Mō ngā kete o te wānanga
Hei Mahi 8
E hāngai ana ki ēnei whārangi: 11, 21-23 o Te Wharekura 87 ētahi korero mō tā Tāne te wānanga i piki ki te Toi o ngā Rangi ki te tiki i ngā kete e toru o te mātauranga – ko te kete tuauri, ko te kete tuatea me te kete aronui.
Ka ako i te karakia a Tāne ki raro iho nei. E taea e te kaiako ngā kupu te whakatā hei kitenga mā ngā ākonga. Ka tuhi rānei te karakia ki te papatuhituhi, ā, kia mau ia rārangi, ka ūkuia taua rārangi, tae noa ki te wā kua mau-ā-hinengaro te karakia nei.
Kātahi ka kape i ngā kupu Māori me ngā kupu Pākehā o te karakia nei - kia kotahi te kape mā ia rōpū tokowhā ngā tāngata. Tapahia ngā kupu rārangi mā rārangi, ā, raua atu ki ētahi kōpaki. Hoatu tētahi kōpaki ki ia rōpū kia whakatakoto tika ai ngā kupu pākehā ki te taha o ia rārangi kupu Māori. (Kei te wāhanga 'Hei tautoko i te pouako, tētahi whakapākehātanga o te karakia nei.)
Tēnei au, tēnei au,
Te hōkai nei i taku tapuwae
Ko te hōkai-nuku ko te hōkai-rangi
Ko te hōkai nā tō tipuna a Tāne-nui-a-Rangi
I pikitia ai ki te Rangi-tūhāhā ki Tihi-i-manono
I rokohina atu rā ko Io-Matua-Kore anake
I riro iho ai ngā kete o te wānanga
Ko te Kete Tūāuri, ko te Kete Tūātea, ko te Kete Aronui —
Ka tiritiria, ka poupoua ki a Papa-tū-ā-nuku
Ka puta te ira-tangata
Ki te whai-ao
Ki te ao-mārama,
Tīhei mauri ora!
Ka mutu ngā mahi ki runga ake nei, tērā pea ka tīkina he karakia nō te rohe o ngā ākonga. Whaia ngā tapuwae o te mahi 8 nei.
Te Reo Māori i roto i Te Marautanga o Aotearoa
| Marautanga | Te Reo Māori |
| Taumata | 5 |
| Ngā Āhuatanga o te Ākonga Ka whakapuaki i ngā momo reo mō ngā horopaki ōkawa, ōpaki hoki. Ka haere tonu te whakapārekareka i te rere o te reo ki ngā āhuatanga Māori ake nei. He whaihua, he mārama āna tuhinga i ngā momo tuhinga huhua noa. | |
| Rautaki Reo | Ka whakamahi rautaki reo, ā, ka taea te whakamārama ngā huarahi kua whāia hei whakatutuki i tāna i whakaputa ai, i rongo ai. |
| ā-Waha | 4. Ka whakarite, ka whakamārama i tētahi kaupapa kia kitea ai te āhua o ngā momo kōrero Māori ake nei, ahakoa te kaupapa. |
He hononga o tēnei mahi ki NCEA
Te Reo Māori Taumata 2 Ā-roto
AS 90449 putanga 2 – Whakarongo i te reo o tōna ao mōhio
4 whiwhinga
