Te pakanga o ngā manu
He kōrero tēnei mō ngā manu. He kōrero pakanga. He kōrero muru.
Kei te hui ngā manu whenua. He hui whakareri mō te pakanga. Kei te rere mai ngā manu moana. Kei te rere mai ki te muru i ngā kai a ngā manu whenua. Ka whakaara te tūtei, he Pītoitoi;
"Kia hiwa rā!
Kia hiwa rā!
He tauā!
Kei māku koutou
I te toto
O te taonga kōhuru.
Kia hiwa rā!
Kia hiwa rā!"
Ka rere te Tīrairaka ki mua i te ope tauā.
Pītoitoi ana.
Parehe atu ana.
Parehe mai ana.
Tīwakawaka.
Pīwaiwaka.
Piu! Piu!
Anei mā koutou . . . (ka huria atu tōna tou).
Ka rere te haka a ngā manu whenua;
"Hoki atu koutou,
Ki te kāinga o te ika,
Tūtū,
Koikoi.
Poroiwiiwi e!
Poua ki te mate,
Hi!
Hi!
Hi hā!"
Ko Rurui ruku tuatahi atu ki roto i ngā manu moana.
Whai riri mai ana ōna hoa.
Rāpia!
Hūtia!
Katoa!
Weroa!
Purere ana te kura
Tērā he hukarere.
Te mamae.
Te Weriweri.
Murara ana ngā kura
I te whero o te toto.
Ka huri ngā manu moana. Kua mataku i te kaha me te māia o ngā manu whenua.
Ka huri, ka rere ki te moana. Kāore ngā manu moana i rongo i te kata a Pārera; "Kē-kē-kē!"