Hatupatu
Takoto ana a Hatupatu, pēnei kua mate. Mea patu ia e ōna tuākana, he kai i ngā manu hue. Mea waiho e rātau kia mate.
He pō, he rā,
He rā,
he pō.
Takoto mate ana,
Makariri ana,
Whakahemohemo ana.
Ēngari kua ara,
Kua ora,
Kua tū.
Ka haere ki roto i te puihi. Kua pā mai te mate kai. Arā he kererū. Ka tata atu. Ka tū. Ka whakareri. Ka rere atu ngā ringa ki te hopu. Ēngari kāore he manu. Kua riro kē. Ka kite atu a Hatupatu i tētahi wahine rerekē. Ko te kererū rā e mau ana ki tētahi o ōna matikuku roroa o tōna ringa. He patupaiarehe pea?
Ka oma a Hatupatu. Ka rere mai te wahine rā, ka hopua a Hatupatu ki runga. Ka heria a Hatupatu e te wahine nei hei mōkai māna.
He pō, he rā,
He rā, he pō,
Ka noho mōkai,
Ka mau mōkai,
Taurekareka.
Nō tētahi rā, ka puta a Hatupatu ki waho. Kua haere kē te wahine rā ki te patu manu mā rāua. Ka oma a Hatupatu, ka heria e ia ngā taonga hirahira a te wahine rā. Ka kite mai te manu mōkai a te wahine rā ka haere ki te kimi i tōna rangatira.
"Riro, riro
Kua riro
Ki te hau.
Riro, riro
Kua riro
Ki te hau."
Ka rongo mai te wahine rā. Ka rere ki te whai i a Hatupatu. Kua mau tata tonu a Hatupatu. Ka kite ia i tētahi toka - ka karanga atu ia.
"Tuwhera e te toka tipuna
Awhia mai au ki a koe e."
Ka tuwhera te toka ka kuhu a Hatupatu ki roto. Ka kati te toka, ka ora a Hatupatu. Ka rongo ia i te wahine e rapirapi ana i te toka kia tuwhera. Ēngari kāore e tuwhera.