Te mahi rourou
Nā Merimeri Penfold
Nā Michael Osborne ngā hoahoa
1. Tapahia kia toru ngā kōrari.
2. Puritia te rau kotahi kia piri. Tīhaea ngā taha, a waho
me waenganui. Kūmea ngātahi kia taka, kia wehe. Pēneitia ngā kōrari e rua kei te toe. Kua oti te mahi o ngā kōrari e toru ināianei.
3. Wehea ngā rau e rua o te kōrari kotahi, tata noa ki te pito o te tumu o te kōrari. (Kia tūpato i konei; kaua rawa ngā rau e tukua kia wehe. Mehemea e wehe ana, ka uaua tonu ki te raranga.)
4. Whatia tētahi o ngā rau i te wāhi i mutu ai te wehe haere.
(Mā tēnei ka ū te noho ngātahi a ngā rau o te kōrari kotahi.)
Kua takoto tītaha ki te hoa rau ināianei. Pēneitia te toenga
o ngā kōrari. Kua tae ināianei ki te wā hei whakatakoto i
ngā kōrari mō te raranga.
5. Tangohia kia rua ngā kōrari kua oti te mahi.
Whakatakototia kia anga mua atu ki te kaimahi ngā pito pūtake ki te kaimahi, ngā pito runga ki tawhiti atu. Kei te pararahi tonu te takoto i runga o ngā papa o te kaimahi. E whā ngā rau kei te takoto mua ināianei.
6. Tangohia te kōrari tuatoru, ka whakapae mai i te taha
mauī te takoto te pito pūtake ki te taha mauī, ngā pitopito
ki te taha matau.
7. Rangahia ngā rau e rua kei te takoto whakapae ki ngā rau kei te takoto whakamua. Ngā tangotango mai i te 5 ki te 7, kei te takoto te raranga i runga i ngā papa o te kaimahi, i runga rānei o te tēpu. Ināianei, kua tae ki te wā e hiki ai i te raranga kia tata ake ki runga i te kōpū o te kairaranga. Kia mau tonu te takoto a ngā rau e whā ki mua, me ngā rau e rua ki te taha matau. Kia titi tonu te tū a ngā tumu e rua o ngā rau e whā ki te tinana o te kaimahi, hei mea e pai ai te mau, te ū, o te noho o ngā rau mō te raranga.
*8. Tatauria mai i te taha mauī ngā rau e takoto mua ana. Ko te tuawhā o ngā rau te mea whakamutunga. Ko ēnei rau, mā te ringa mauī tonu e tangotango, kei te taha mauī hoki o te raranga.
9. Tangohia ake te tuawhā o ngā rau nei (mā te ringa matau, kei te taha matau hoki) ka raranga whakatū kaua e whatia, e hurihia rānei, engari kia rite tonu te takoto i te tangohanga ake e te ringa matau haere ki ngā rau e toru kei te takoto whakamua, puta noa ki te taha maui. (Kua toe ināianei e toru anō ngā rau kei te takoto whakamua.) Ko te rau tuawhā nei te rau whakaeke i te poti tuatahi o te rourou. Puritia tēnei rau e te ringa mauī kia ū. E huri ināianei te titiro ki ngā rau e rua kei te whakapae te takoto.
10. Tangohia te rau kei raro, tuatahi rānei, (mā te ringa matau) ka whawhati ko te tīmatanga tēnei o te remu o runga o te rourou ka raranga haere mai i te taha matau, whiti noa ki te taha mauī o te raranga. Kua riro tēnei rau mā te ringa mauī e pupuri kia ū.
11. E hoki anō ki te taha matau o te raranga (e toru anō ngā rau kei te takoto mua, kotahi anō o ngā rau e takoto
whakapae ana kei te toe) ka titiro ki te rau tuatahi ki te taha matau. Tangohia ake tēnei ka whawhati (ringa matau) ka raranga haere puta noa ki te taha mau o te raranga.
12. Anei te takoto o ngā rau ināianei e toru anō o ngā rau e
whā i takoto whakamua kei te toe. Ko ngā rau e rua i takoto whakapae, kua rangahia, kua takoto whakapae ki te taha mauī o te raranga. Arā, e toru rau kei te takoto mua, e toru kei te takoto whakapae ki te taha mauī.
**13. E huri anō te titiro ki te taha matau o te raranga. E mau te ringa matau ki te waho o ngā rau, ka whawhati, ka raranga haere puta noa ki te taha mauī. Anei te takoto o ngā rau o te raranga ināianei e rua anō kei te takoto whakamua, e whā kei te takoto whakapae ki te taha mauī o te raranga. Nukuhia ināianei te raranga kia takoto whakamua ai ngā rau e whā kei te takoto whakapae ki te taha mauī. Kua takoto whakapae ki te ringa matau ināianei ngā rau i takoto whakamua. Koia
nei anō te takoto o ngā rau nei i te tīmatatanga. Tēnā, tirohia mai i te 5 ki te 7 o ngā tangotango. E hoki ināianei ki* ka mahi tae noa ki** mō te toru o ngā rangatanga. E whā ngā poti kua oti ināianei. Kua tae ki te wā mō te whakamutu i te raranga.
Kei te ritetonu te takoto o ngā rau ki te takoto tuatahi-e whā kei te takoto mua, e rua kei te takoto whakapae ki te taha matau. Ngā rau e whā kei te piri te takoto iho ki ngā rau o te raranga kei raro. Kuhu haeretia tēnā rau, tēnā rau kia tika ki te rau kei raro. E rua pea kuhunga o te rau kotahi. Ngā rau e rua kei te takoto whakapae ki te taha matau, koia ngā mea hei here i ngā taha o te rourou kia ū. Kua tika ināianei te tapahi haere i ngā pitopito kōrari o te rourou. Mehemea he roroa rawa ngā tumu kōrari o waenganui o te rourou, me tapatapahi kia poto.
Kia Mahara!
- Mā te ringa matau tonu ngā rau ki te taha matau e whakawhiti, e raranga haere, e pupuri hoki.
- Mā te ringa mauī tonu ngā rau ki te taha mauī e whakawhiti, e raranga haere, e pupuri hoki.
- Kaua te ringa e whakawhiti ki te taha kē, ka raranga haere mai.
- Ko ngā whatinga o ngā kōrari, koia tēnei ko te taha runga o te rourou ka oti te mahi.
- Ko te rau tuawhā o ngā rau (ki te tatau mai i te taha mauī) koia tēnei ko te poti. Me whakatū tonu te raranga, kāhore e whātia, e hurihia rānei te takoto.
- Ka whāiti ngā rau, kua poto te kōrari. Ka whānui ngā rau, kia roroa ngā kōrari.