He mahi noho kau

Nā Merimeri Penfold

E hararei ana ngā tamariki. Kua mutu te kura. Kei te toa a Āperehama rāua ko Mihaere. He tino hoa rāua. Kei te kai aihikirīmi rāua. Kei te titiro rāua ki te pānui e whata ana i roto i te wini o te toa. Kua kī a Āperehama, "E hoa, titiro! Kei te haere mai te Rodeo."

"Ka pai! A hea?"

"A te marama e heke mai nei. Titiro ki ngā paraihe."

"He aha ngā paraihe?"

"He rua rau taare tētahi."

"Mō te aha?"

"Mō te noho tīa mō te tekau meneti."

"Nē!"

"E tā, ka pai, ka whai moni tāua!"

"E kī! Ko wai kei te mōhio ki te noho tīa?"

"Ko koe. He tino toa koe ki te noho tīa."

"Ei, kia tika rā! Ka pai te noho poaka. Ka pai te noho kāwhe. Engari te noho tia-ei, kei whati te kakī."

"Tangata mataku!"

Kei te kainga a Āperehama, kei te pamu a tona papa. Kua mutu te miraka kau. Kei te whāngai a Āperehama i ngā poaka. Kua puta mai a Mihaere. Kua whakatoi atu ki a Āperehama, "E tā! Kāti te moemoeā! Kia tere te mahi. Kei te haere koe ki te noho tia."

"Pōrangi! Kāore ā mātou tia."

"Hei aha! Ko ngā kāwhe, ko ngā poaka, ko ngā hipi hei tia mō tāua."

Kei te whai hipi rāua. Kei te noho hipi.

Kei te whai poaka rāua. Kei te noho poaka.

Kei te whai kāwhe rāua. Kei te noho kāwhe.

Kua kite mai te pāpā o Āperehama i tā rāua mahi. "E tama mā, he aha tā kōrua mahi?"

"Kei te whakapakari māua i a māua."

"Mō te aha?"

"Mō te rodeo kei te haere mai."

"Pōrangi ma!"

Kua haere te pāpā o Āperehama ki te waea atu ki" tētahi o ōna hoa. Ko Hamihami tōna ingoa. He tangata tino mōhio a Hamihami ki te noho tia. I te awatea, kua puta mai ia ki te kāinga o Āperehama. E whiu tia ana ia. Kei roto i te iāri ngā tia. Kua whakaatu mai ia ki a Āperehama rāua ko Mihaere, "Me pēnei te noho tia. Me pēnei te pupuri. Ko ngā ringa ki konei. Ko ngā pona ki konei. Ko ngā waewae ki konei."

Kātahi anō a Āperehama ka noho tia. Eke atu, hinga atu. Piki atu, pore atu. Kei te kata a Mihaere. Kua ki atu a Hamihami, "Kāti te kata, Mihaere. Ko koe ināianei."

Kua mutu te kata a Mihaere. Kua tino mataku ia. Kua kōrero atu, "Hei aha au! Kei whati taku kakī. Ko Āperehama te toa. He tino kaha ia ki te noho tia. He koretake au. Hei aha au!"

Kua tae mai te rā o te Rodeo. Kua tīmata a Āperehama mā ki te haere. Kei te wiriwiri a Mihaere. Kei te mataku ia mō tōna hoa. Kua ki atu ia, "E tama, kaua e haere. He tino kaha ngā kau ki te whana. Kei hinga koe!"

"Turituri, e tama!"

"Kei whati tō kaki."

"E tama, turituri!"

"Kei whati tō tuarā."

Turituri!"

"Kei mate koe!" "Kia tere, e tama!

Kei tūreiti tāua!" Kua tae katoa ngā iwi o te kāinga ki te rodeo. Kei te iāri ngā kau me ngā hōiho me ngā tīa. Kua timata te rodeo. Kua peke mai tēnā tia. Kua peke mai tēnā kau. Kua peke mai tēnā hōiho. E pekepeke ana, e omaoma ana. Kua piki ake he tangata, kua hinga iho he tangata. Kei te umere te iwi. Kei te pakipaki te iwi. Kei te hāpa- rangi te te iwi. Kei te pekepeke te iwi.

Kua karangatia a Āperehama kia haere atu. Aue, kei te wiriwiri a Mihaere i te mataku. Kei te wiriwiri anō a Āperehama. Kua haere atu ia. Kātahi ka tukua mai te tia. He tia puihi. He tia pangopango. He tia pekepeke. Kei roto te tīa i te iāri. Kei te tauheretia te taura ki tōna puku. Kei te tatari a Āperehama. Kei te karakia a Mihaere.

Ana! Kei runga a Āperehama i te tia. Kei te kōimi te tia i raro i a ia. Kua mau tōna ringa ki te taura. Kua mau ōna pona ki ngā taha o te tīa. Ananā! Tukua! Tukua ki waho!

Rere atu, pekepeke atu. Ki runga, ki raro, huri atu, huri mai, e hurihuri ana. Tarapeke atu, tarapeke mai. Tarapeke ake, tarapeke iho. Kei te pakipaki te iwi. Kei te hāparangi rātou.

"Kia mau Āperehama! Ka pai! Ka pai!"

Kei te karakia tonu a Mihaere. Kei te kaute ia i ngā meneti, "Ka tahi, ka rua, ka toru, ka whā, ka rima, ka ono, ka whitu, ka waru, ka iwa-tekau!" Kei te tangi te pere. Kua umere te iwi. Kei te pakipaki rātou katoa. Ko Āperehama te toa. Kua pekepeke ko Mihaere ināianei. Kua wini tōna hoa i te rau taara. Hī . . i! Hā . . a! Te pai! Te ora! He mahi tino nui te mahi noho kau.

Ki runga ^