Ko wai mā ōku tuatangata?
Marautanga Tikanga ā-iwi
Taumata: 4
Te Whakaritenga Pāpori me te Ahurea:
4.2. Ka whakamārama i ngā take me ngā huarahi e tukuna iho ai e te takitahi me ngā rōpū , ō rātou ahurea, ō rātou tuku ihotanga, kia mau pūmau.
Te Ao Hurihuri:
4.1. Ka tautohu i ngā pūtake me ngā otinga o ngā tūāhua kua waihanga i te oranga o te tangata.
4.2. Ka whakaahua i ngā huarahi e tuhia ai, e maumaharatia ai ngā mahi o mua.
Hei Mahi
Ngā Pūmanawa o te Tuatangata
Pātaitia te ākonga he aha nei te tuatangata. Me tuhi ā rātou whakautu ki runga i te papa tuhituhi. E taea e te kaiako te pānui Ko Wai mā Ōku Tuatangata? ki a rātou, e taea rānei e rātou ake te pānui.
Kōkiritia he whitiwhitinga kōrero e pā ana ki te kaupapa “tuatangata”. Hei whakarāpopoto, me ui ake anō te pātai, he aha kē nei te tuatangata? Tonoa atu ngā ākonga mēnā he kōrero tāpiri atu ā rātou e pā ana ki te momo o te tuatangata i te mutunga o te pānui i te pukapuka nei. Me hokihoki mahara ki te wāhanga i pānuitia ake nei, me te pātai he aha nei ōna kōrero mō te tuatangata.
Mō te aha te tikanga e karangatia ai tētahi he tuatangata ia? He momo, he pūmanawa aha ōna e tuatangata ai? He aha ai? Me tono te akomanga ki te whakaingoa i ētahi tuatangata me te whāki mai he aha ai. Nā te aha i tuatangata ai?
E taea e wai kē rānei te tū hei tuatangata? He tōtika ia hei tuatangata? Hei tuatangata mō wai kē rānei?
