He whakaruruhau māhuri tōtara
Marautanga Te Reo Māori
Taumata: 4
Ngā Āhuatanga o te Ākonga
He whānui tōna reo kōrero – ka taea te tautohetohe, te tuku pātai, te whakaputa i ngā kare ā-roto, te korero whakanene. He hāngai tana kōrero ki te kaupapa, ki te wheako rānei o te wā. He rawe āna tuhinga, ā, kua mōhio haere ki ētahi momo tuhinga pērā i te pūrongo, te paki, te whakamārama, te whakaputa whakaaro.
Kua whakamātau ki te pānui i ngā momo tuhinga maha nā te rahi haere o te puna pūkenga pānui.
| Āheinga Reo | Ka tutuki te whānuitanga o ngā āheinga reo i roto i te wairua ngahau me te hiahia ki te whakawhitiwhiti whakaaro. |
|---|---|
| ā-Waha: | 2. Ka whakapuaki patapatai hāngai tonu, kōrero whakamārama, tautohetohe rānei kia puta ai te reo hīkaro, te reo whakamana hoki. |
| Puna Reo | Ka tipu haere tonu te puna kupu me ōna āhuatanga katoa. |
| ā-Waha: | 3. Ka mārama, ka whakamahi i ngā kīanga whakaahua, kīanga whakarite hei whakaniko i te kaupapa. |
| Rautaki Reo | Ka whakamahi rautaki reo, ā, ka taea te whakamārama ngā huarahi kua whāia hei whakatutuki i tāna i whakaputa ai, i rongo ai. |
| ā-Waha: | Ka whakarongo kia mōhio ai ia me pēhea te arotake whakawā, te wetewete i ngā hīkarotanga. |
| ā-Tinana: | 2. Ka hāngai te reo ā-waha, ā-tinana ki te kaupapa. |
Marautanga: Te Reo Māori
Taumata: 5
Ngā Āhuatanga o te Ākonga
Ka whakapuaki i ngā momo reo mō ngā horopaki ōkawa, ōpaki hoki. Ka haere tonu te whakapārekareka i te rere o te reo ki ngā āhuatanga Māori ake nei. He whaihua, he mārama āna tuhinga i ngā momo tuhinga huhua noa.
| Āheinga Reo | Ka tutuki te whānuitanga o ngā āheinga reo i roto i te wairua ngahau me te hiahia ki te whakawhitiwhiti whakaaro. |
|---|---|
| ā-Waha: | 1. Ka whakamā rama, ka tautohetohe rānei i tētahi kaupapa e puta ai te reo hīkaro, te reo whakamana, me te reo whakaahua. |
| Puna Reo | Ka tipu haere tonu te puna kupu me ōna āhuatanga katoa. |
| ā-Waha: | 3. Ka tika tana whai i te nuinga o ngā ture o te reo. |
| Rautaki Reo | Ka whakamahi rautaki reo, ā, ka taea te whakamārama ngā huarahi kua whāia hei whakatutuki i tāna i whakaputa ai, i rongo ai. |
| ā-Waha: | 4. Ka whakarite, ka whakamārama i tētahi kaupapa kia kitea ai te āhua o ngā momo kōrero Māori ake nei, ahakoa te kaupapa. |
| ā-Tinana: | 2. Ka hāngai te reo ā-waha me te reo ā-tinana ki te kaupapa. |
Hei Mahi
Pānuitia atu te paki He Whakaruruhau Māhuri Tōtara ki te akomanga.
Meinga ngā ākonga kia whai whakaaro ake ki tētahi huānga/uri o te whānau hei atua, hei tuatangata rānei ki a ia, otirā he aha ai, nā te aha rānei. Tērā pea he koroua, he kuia, he matua kēkē, he whaea kēkē rānei, he tuahine, he tungāne rānei, he whaea, he matua, he whanaunga, a wai ake rānei.
Me oti i te ākonga tētahi kauhau kia tekau meneti te roa ki mua o tōna akomanga e pā ana ki taua huānga/uri whānau me te pūtake e mīharotia nei. Me oti i te ākonga ngā momo me ngā āhua o taua tangata te whakamārama me te whāki mai he aha e whai tikanga ai ki a rātou.
