Ko wai ō tātou tīpuna?
Ētahi whāinga paetae e hāngai ana
Te Reo Māori i roto i te Marautanga o Aotearoa
Whenu: Tuhituhi (Pānui) (Kōeke 4–5)
- Me whai hua, me mārama te tuhi a te ākonga i ngā momo tuhinga huhua noa mō ngā kaupapa whānui, ā, me hāngai te tuhinga ki te pūtake me te hunga pānui. (Kōeke 4)
- Me mārama, me whai hua, me whānui ngā momo tuhinga a te ākonga, me te āta aro anō me pēhea te whakaraupapa tika i ngā kaupapa. (Kōeke 5)
Ka taea hoki e te pouako te whakamahi i ēnei kōrero e pā ana ki te tuhituhi, kōeke 4–5:
- He whakaahua whānui, whārangi 25–26
- He tirohanga whānuitanga: Reo whakaputa, whārangi 47–48
- Ngā whārangi whakamārama i te kawenga me ngā whai wāhitanga aromatawai, whārangi 87–88
- Ngā āheinga reo, whārangi 110–120
- Ngā ariā o te reo, whārangi 121–128
- Te wetewete i te reo, whārangi 129–137
- Ngā rārangi kupu, whārangi 138–165.
He mahi aromatawai
- Whakatakoto whakapapa e kitea ai te mōhiotanga a te ākonga ki ngā kōrero tīpuna o ōna ake iwi.
- Āta whakatakoto i ōna whakaaro mō ngā mahi a ōna tīpuna, kia mārama ai ia nā te aha i noho taonga mai ai aua mahi i tēnei wā.
- Whakawhanake i te tino kiko o ngā mahi a ōna tīpuna, kia whai hua ai.
- Te hononga ki ngā kōrero o ētahi atu o ngā iwi i Te Moananui-a-Kiwa.
Hei mahi
He hoahoa whakapapa: Mā te ākonga tōna tīpuna rongonui i runga i tōna waka tīpuna e rangahau. Ka rapu mōhiotanga e te ākonga kia kite i ahatia e tōna tīpuna i onamata, ā, he aha ngā mea whakahirahira i mahia e tōna tīpuna. Mēnā ka taea e te ākonga, tautokona ia kia whakatakoto whakapapa mai i tōna tīpuna i runga waka ki a ia anō hei taonga mō te ākonga me tōna whānau. Āti, mā te ākonga ōna rārangi whakapapa e rangahau. (Tuhituhi, kōeke 4)
Ka whakatakoto whakapapa te ākonga mō tōna tīpuna, tōna waka tīpuna rānei, kia whakatauritea ki ētahi atu kōrero mō tōna tīpuna, waka rānei, mai i ētahi atu iwi nō Aotearoa, nō Te Moananui-a-Kiwa hoki. (Tuhituhi, kōeke 5)
He hono ki tētahi atu marautanga
Hangarau i roto i te Marautanga o Aotearoa
Whenu: Hangarau ā-Iwi – Ngā Whakapaipai me ngā Whakarākei i te Tangata (Taumata 3)
Ka hōpara ngā ākonga i ngā momo whakarākei tinana a ētahi atu tāngata whenua o Te Moananui-a-Kiwa, me te whakataurite i ēnei ki ā te Māori, me te tātari i ngā āhuatanga e ōrite ana, e rerekē ana.
Whenu: Mātauranga Hangarau – Ngā Whakapaipai me ngā Whakarākei i te Tangata (Taumata 4)
Ka kōwhiria e ngā ākonga tētahi momo whakarākei tinana, me te pōwhiri i tētahi tohunga, kaimahi huakanga rānei, kia toro mai ki te akomanga ki te whakamārama, ki te hanga i taua momo taonga, ki te whakaatu i ngā tikanga hanga e whāia ana i ēnei rā.
He whakataukī
Nā Rangi tāua, nā Tū-ā-nuku e takoto nei; ko ahau tēnei, ko mea a mea?
He whakamārama: Ka whakaeke ana he manuhiri ki te marae, ka uia te manuhiri i ahu mai rātou i whea, ka utua pēneitia hei whakaatu i te kāwai tata i waenga i a rātou.
