Te Tiriti o Waitangi
Ko ngā rangatira i haina i te Tiriti, nō ngā rohe maha o Aotearoa. Nā ngā āpiha o te Kāwanatanga i mau haere ngā tauira o te Tiriti ki ngā rangatira o te motu kia hainatia e rātou. E rima marama e mauria haeretia ana ngā tauira nei. E waru o ngā tauira nei i tuhia ki te reo Māori, kotahi i tuhia ki te reo Ingarihi. Ki te huia katoatia ngā ingoa i hainatia ki runga i ēnei tauira, e rima rau e whā tekau. Koia tēnei ko te Tiriti o Waitangi, ko ngā tauira e iwa, me ngā tuhituhi kei runga.
I whakāhuatia tētahi wāhi iti o te Tiriti kia kite ai koutou i ētahi o ngā ingoa rangatira Māori me ētahi o ngā ingoa o ngā āpiha ko rātou nei ngā kaiwhakātu. Ko ētahi o ngā ingoa nei nā te tangata tonu nōna te ingoa i tuhi, engari ko te nuinga nā te āpiha i tuhituhi.
Mehemea ka kaha to titiro i te whakaahua, ka kitea e koe ētahi o ngā ingoa o ngā tāngata kei roto i ngā kōrero o te pukapuka nei. Me titiro ro koe ki te pukapuka o Te Tiriti o Waitangi kei tō kura e takoto ana, mō te nuinga atu o ngā ingoa. Ko te ingoa tuatahi, kāhore i tino mārama te tuhi, ko tō Hone Heke. Ko ia te tangata tuatahi ki te haina.