A Rangi rāua ko Papa – te pūtake o ngā reo o ngā taonga pūoro
Nā Hirini Melbourne
Ka riro mai ngā kete o te wānanga ka whakatūhia te whare tuatahi hai ako i ngā wānanga. Nō muri mai ka whakaaro te whānau atua me pēhea e puta ai te ira tangata hai kawe i ngā kōrero, i ngā tikanga, me ngā mātauranga. Ā, ko te tatūnga me rapu ko te uwha. Engari mā wai e rapu te uwha? Āe, ka riro anō ma Tānemāhuta e rapu. I kitea e ia te uwha i Te Onekikurawaka. I reira ka pokepokehia ko Hineahuone. Ka moea a Hineahuone e Tāne ka puta ki waho ko Hinetītama. Nā Hinetītama i puta ai te ira tangata. Engari, i roto i te mahi a Tānemāhuta ki te moe i tana tamāhine anō ka puta ko te whakamā. Ka tahuri rā a Hinetītama ki rarohenga noho mai ai i raro i tana ingoa hou a Hinenuitepō. Nō muri mai ka whakamātau a Māui i a Hinenuitepō. Ka mate a Māui ka pā mai ko te mate ki te tangata.
Koinei te pūtake o ngā reo o ngā taonga pūoro o te ao tawhito. Nō reira kua kite tātau i puta mai ētahi o ngā puoro whakatangi a te Māori i roto i te mamae, i te aroha, i te riri, i te hangapouri o te mate, o te mokemoke, o te whakamomori. Nō koinei anō hoki ngā momo pūoro reo a te Māori, arā, he tangi, he umere, he mōteatea, he apakura, he oriori, he pātere, he manawa wera, he haka, he karanga maioha, he poroporoaki, he waiata, he whaikōrero, he whio, he orooro, me ērā atu.