Tū-whakairi-ora
Nā Mohi Tūrei
Nā Ralph Hotere ngā pikitia
Ka mate a Poroumata, ko wai hei ngaki i te mate?
Ko Poroumatā rāua ko tāna wahine ko Whāene he rangatira, he mokopuna nā Porourangi. Ko tō rāua iwi ko Ngāti Ruanuku. Ko ngā hapū nunui i roto ko Hore, ko Mana, ko Te Kōreke, ko Te Mokowhakahoihoi, ko Te Pananehu, ko Te Poho-umauma.
Ka mahi te iwi i te kai, ka kawe mā Poroumatā, i te hinu, i te ika, me ērā atu kai katoa. Ka hī te iwi i te ika, ka haere ngā tūmau o tō Poroumatā pā ki ngā awa ki te tiki i ngā ika i tēnā rā, i tēna rā; nāwai rā i pai te tiki, kua kino. Kua riro mā rātou e tango ngā ika i ngā taumanu. Ko ngā ika i mahue atu ka kotia mai ngā tātā, ngā whatuaro, ngā ūpoko o ngā hāpuku. Kua uru hoki ngā tama ki taua mahi. Ko ia, kāore i te mōhio: tāna he atawhai tonu i te iwi.
Ka whakatakoto whakaaro te iwi kia patua a Poroumatā. I tētahi pō, ka titiro ia ki te pō tū i waho i te Omanga e tāruru ana, ki te Ika-o-te-rangi me ngā Pātari, ki te tae pūkohu tataiore e taipua ana i ngā maunga. Ka kī ia, "He marino tuaukiuki āpōpō, he kāwatawata tata moana te kōangiangi; ka haere au ki te moana."
I te ata, ka eke ia ki tētahi o ngā waka, ka tae ki te taunga. E kūpapa ana te tini o ngā waka. Ka warea ia ki te mōunu i ana matau. Ka kamo ngā whatu o ngā tāngata o te ihu ki o te tā, me ō te tā ki ō te ihu. Ka pērā katoa ngā tāngata o ngā waka rā, ka kamo katoa, me te tohu mai kia patua. Ka patua, ka mate.
Ka pōkaia te puku me te ngākau, ka makā ki te moana, ka pae ki uta. Waiho iho hei ingoa mō te wāhi i pae ai, ko Tāwekatanga-o-te-ngākau-o-Poroumatā. Huaina iho ki te taunga ko Kamokamo. E mau nei anō aua ingoa.
Ka mate rā a Poroumatā, ko wai hei ngaki i te mate? Kei te hari rā hoki te iwi, ka kai noa ia i āna kai. Ka tangi ngā tamāhine ki tō rātou pāpā, a Te Ataakura, a Materoa, a Tawhipare. He roa te tangihanga me te mamaetanga o ngā wāhine nei ki tō rātau pāpā. Kāti tērā.
E titiro tonu ana aku whatu, ka whakairia oratia
Ko Tūmoana-kōtore, hei mokopuna anō mā Porourangi, rāua tahi ko Poroumatā. Ka moe a Tūmoana-kōtore i ngā wāhine tokorua, ko Rūtanga te tuakana, ko Rongomai-tauārau te taina. Tokorua i moe anake i a ia. Ka puta tā te tuakana, ko Hinemā-huru. Ka puta tā te taina, he tama tāne, ko Ngātihau.
Ka mate a Tūmoana-kōtore, ka rite ngā rā e tangihia ana ki tō te rangatira tangihanga. Ka takaia, ka kawea, ka whakairia ki runga ki te kauere, e tata ana ki Waiomatatini. Ko te toma kōiwi, ko Parororangi, kei runga tata ake, kei te maunga. Kia taka te tau, kia pirau, ka kawe ai i ngā iwi ki taua toma.
Ka hoki ngā tāngata whakairi ki te kāinga, ka whiti i tētahi awa iti nei, ka pā te waha. Ka tū, ka whakarongo. Ka karanga anō. Ka kī rātou, "Mehemea tonu ko te waha o te koroua nei." Ka whakahū ake rātou, ka akiaki iho te waha, "Kei te ora tonu au, tukua au ki raro."
Ka hoki te whānau, ka tukua, ka wetewetekia ngā takai. Ka titiro ake ki te kauere rā, ka whai te waha, "E titiro tonu ana aku whatu, ka whakairia oratia."
He maha ngā tau, kātahi ka tino mate. Kāti tērā.
E ea i a koe te mate o tōku pāpā
Ka moea e tāna tama, e Ngātihau, a Te Ataakura, te tamāhine a Poroumatā, hei wahine māna. Kei te tangi tonu ki tōna pāpā; ka hapū, ka whānau, he wahine; ka tino kaha rawa tōna tangi ki tōna mamae, ki tana mahara hoki he tāne hei ngaki i te mate o tōna pāpā. Ka huaina e ia te ingoa ko Te Aomihia, ko ngā ao i mihi ai tōna pāpā, i haere ai ki te moana i mate ai.
Ka hapū anō ia, noho rawa atu rāua ko te tāne i Opōtiki. Kei te tangi tonu ia ki tōna pāpā. I a ia e tangi ana, ka takatakahi te tamaiti i roto i tōna puku. Kātahi ia ka whakataukī iho,
"Ē i, kia takatakahi koe i roto i a au, he tāne,
E ea i a koe te mate o tōku pāpā."
Whānau ake he tāne. Ka huaina te ingoa ko te ingoa o tōna tipuna, ko Tūmoana-kōtore-i-whakairia-oratia. Ka whakapotoa ki te karangatia, ko Tū-whakairi-ora.
Ka atawhai ia ki tāna tamaiti, me te mahara tonu ka ea te mate o tōna pāpā i tāna tamaiti. Ka tanumia te ewe; kiia iho te wāhi i tāpukea ai ko Te-ewe-o-Tū-whakairi-ora. Ka mahia e ngā tohunga te tamaiti ki ā rātou karakia Whakanihoniho, Whangawhāngai, Ihotau me ērā atu karakia. Ka tupu, ka pakeke, me te whakarongo tonu ki ngā tohunga mahi i a ia e kōrero tonu ana i te whakataukī a tōna kōkā.
Kua uru ia ki ngā whakawai riri, kua pā i a ia te tangata. Kua uru tonu ia ki ngā whawhaitanga nui, kua puta tonu ia ki te kāinga ahi, kua okooko i ngā rākau o te tūtakitanga o ngā motumotu. Kua hinga te parekura nui, ko Paengatoitoi. Kua haere ōna rongo-toa kua mōhio ia ki te tohu toa o te riri e hinga ai te hoa-riri. Kātahi ia ka poroaki iho ki te iwi: "Hai konei, ka haere au ki te whakataukī a tōku kōkā, e kōrerotia nei, e rongo nei au - nōku pea e takatakahi ana i roto i a ia, ka kī iho nei,
"Ē ī, kia takatakahi koe i roto i a au, he tāne,
Ē ea i a koe te mate o tōku pāpā'."
Kua mōhio te iwi ko te mate o tōna tipuna, o Poroumatā, ka haerea e Tū-whakairi-ora. Ka mea te iwi kia nui te ope, hei kawe i a ia ki te mate o tōna tipuna, o Poroumatā. Ka kiia e ia "Kāti, ko au anake e haere. Tēnā ōna iwi hai kawe i a au." Ka haramai ia, ko ia anake.
"E pou, e pou, e pou,
Whakaaraara, whakaaraara, whakaaraara;
Whakaaturia to mokopuna;
E tangi!"
Tērā ngā rongo ātaahua o ngā tamāhine a Te Aotaki, o Ruataupare, rāua ko Auahi-koata kua hau noa atu ki Opōtiki. Ka tae mai ia ki te ngutu-awa o Wharekahika, ko ngā wāhine rā e kohi pipi ana, me ngā tamariki wāhine, ō rāua hoa, e noho ana i te taha o te ahi, me ngā kākahu e pūkai ana. Ka pātai ia ki ngā tamariki rā; te kianga mai, ko Ruataupare rāua ko Auahi-koata. Ka mahara ia ki ngā rongo kua puta atu rā o ngā wāhine nei.
Kua eke ia ki runga o ngā kākahu noho ai. Kai te riri mai ngā tamariki rā, kai te titiro mai ngā wāhine rā. Ka haere ngā tamariki, ka kōrero atu, ka kī mai rāua, "Tēnā koa, kī atu kia mauria mai e koutou ō māua kākahu." Te taenga atu o ngā tamariki, ka whakatatanga ia, ka riro atu, ka noho anō ia. Kei te titiro whakatau mai ki a ia, ki ngā tohu o te rangatira, o te toa, e mau atu ana i runga i a ia. Kei te mea hoki ia ki tōna kore i pātai ki ngā tamariki rā, ko tēwhea a Ruataupare.
Kākahu ana rāua, nā ngā tamariki i mau ngā pipi. Ka ahu mai ki te pito ki te tonga, ki Nukutaharua, ko te ingoa o te one nei ko Kaiarero. Ka mamao mai rāua, ka whakatika ia. Kei te takahi haere atu i ngā tapuae, kei te pēnei, "Koia nei rānei a Ruataupare, arā rānei ko tērā rā?" Ka takahi haere atu i ō rāua tapuae. Ka tahuri mai rāua, e pērā ana te takahi atu i ō rāua tapuae.
Tae noa ki te pekanga, peka tonu hoki ia, whai tonu i muri i a rāua, tae noa ki te pā, ki Te Rāhui. Ko tēnei pā nō Uenuku-te-whana; kua mōhio kē mai ia ko te pā i runga i te aromaunga tō Te Aotaki. Ka pahure te pā rā, whai haere tonu ia i ngā wāhine rā. Kātahi ka kaha te haere a Ruataupare mā kia wawe tō rāua pāpā te rongo, ka āta haere atu hoki ia.
Kōrero atu ana rāua ki tō rāua pāpā ki ngā tohu o te rangatira, me ngā tohu o te toa, me te whai tonu mai ia i muri i a rāua. Ka hotu te mauri o Te Aotaki, ka pūmanawa, "Ē ī, tēnā pea ia ko tō kōrua tungāne, ko Tū-whakairi-ora ina te rite o ā kōrua tohu."
Ka pātai ia, "Kei whea?"
"Inā tonu e haramai nei."
"Kāore ia i puritia atu i te pā rarā?"
"Kāore!"
Ka whakataukī ia: "Kāti, tukua mai ki Hikurangi, ki te maunga tauria e te huka."
Ka kī ki ngā tamāhine, "Rākai i a kōrua ka whanatu ki te karanga ki tō kōrua tungāne." Kua mōhio ia, nā tōna pūmanawatanga i whakaatu, ko Tū-whakairi-ora.
Ka tū ngā tamāhine i te mataihi katau o te marae, me tō rāua kōkā, me Hinemaurea. Ko ia ki te takiwā ki te mataaho, e tāpapa ana i runga i te paepae nui o waho, e titiro whakatau atu ana. Kei te pōhiri te iwi me ngā tamāhine. Ka tū ki te marae, ka roa e tū ana. Kei te titiro te iwi ki ngā tohu o te rangatira, o te toa, ki te tā-kotuku, ki te pare-kārearea, āpititia ai, poua ai ki te ūpoko, me te kākahu paepaeroa, ūhia iho te māhiti, me te taiaha-o-kura ki te ringa.
Kei te tū te iwi me nga tamāhine, kei te wehi i a Te Aotaki. Kei te tāpapa tonu ia, kei te titiro tonu atu ki a Tū-whakairi-ora. Ka roa, kātahi ka whakatika atu, ka mau ki te pakihiwi mauī, ka nūmia ki te pakitara mauī o waho o te whare, ka heke atu rāua ki te wai-rere, ka tohia e Te Aotaki a Tu-whakairi-ora.
Ka mutu ngā karakia a Te Āotaki, ka werohia e ia a Rangipōpō; kīhai i roa ka kī te reo o te whaitiri paorangi ki ngā iwi i te taha hauāuru o Pukeāmaru, puta noa ki ngā iwi i roto o Wharekahika, me ngā iwi o te taha moana i Taungaihe, i Owhiunga, ngā tini o te Ngutuau. Ka kī ngā iwi rā, "Ē, ko wai rā te tangata nei, inā he akiaki tonu a Te Aotaki i te whaitiri paorangi?"
Kei te tū tonu rāua, ka karanga anō ia kī a Rangipōpō, "E pou, e pou, e pou, whakaaraara, whakaaraara, whakaaraara; whakaaturia tō mokopuna; e tangi." Ka huri te tangi o ngā whaitiri ki te taha tonga o Pukeāmaru, ki runga ki ngā pā ki Puketapu, ki Kōtare, ki Te Rangihuanoa, ki Tarapahure, ki Tōtaratawhiti, ki Okauwharetoa, me ērā atu pā.
Kei te tū tonu rāua. Ka kī te waha o te whaitiri tuatahi, o Haruru-ki-te-rangi, kei te whakarongo ngā pā rā. Ka mutu tērā, ka kī anō te waha o te rua o ngā whaitiri, o Whetuki-ki-te-rangi, ki runga anō ki ngā pā rā. Ka mutu tērā, ka kī anō te waha o te tuatoru, o Ueue-ki-te-rangi. Kei tēnei, ka kī ngā rangatira me ngā iwi o roto o ngā pā rā, "Ēhara te whakararu e wāwāhi nei a Te Aotaki i tōna maunga, i Pukeāmaru; āpōpō tāua te rongo ai i te kōrero."
Ka mutu ngā karakia katoa a Te Aotaki, ka hoki rāua; tae atu, kua rite ngā kai ki runga i te takotoranga. Kainga i waho, ka whakaritea he tohunga hei whāngai mō Tū-whakairi-ora. Ka mutu, ka tomo ki te whare. Ko te moenga o Ruataupare kei raro iho o te matāho, ka tau ia ki te tuarongo moe ai, ka waiho te moenga mō Tū-whakairi-ora.
Ko te koroua rā kei te taha o te ahi i te tara iti o te whare e mihimihi atu ana ki a ia. Ka roa, ka karanga atu ia ki a Ruatau-pare; ka whakatika mai hoki te tamāhine, ka noho ki tōna taha. Ka roa, ka mutu hoki tōna ngurunguru, kātahi ka kī nui atu, "Whanatu ki raro i to tungāne nā, hei whārōrōtanga mai mō ōna waewae." Ka whakatika a Ruataupare, ka moea e Tūwhakairiora, ka puta ia ki waho.
Ka kō ngā kōpara o te ata, ka karanga mai ki te tamāhine kia tahuna te ahi. Ka kā, ka tomo ia, rāua ko Hinemauria, ki te whare; kātahi anō ia ka tangi ki a Tū-whakairi-ora. Ka hī ngā kāwainga o te ata, ka maoa te kai. Tērā nō te ahiahi ka kiia e ia kia hohoro he kai, kia ora ai ngā tūmau te takatū ki ngā whakaeke āpōpō; koia i hohoro ai te maoa. Ka whāngaitia ringaringatia hoki a Ruataupare e tētahi tohunga, me te manawareka a te iwi tiaki o te pā i te moenga a Ruataupare i a Tū-whakairi-ora.
Ka mutu te kai, ka kī ia kia hohoro he kai, kia puta rawa ake ai, ka maoa. Morunga rawa ake te rā, ka puta ngā iwi i pōhiritia rā; anā, me he tuarāwhārau ki te waha mai i ngā ika tauraki kua maroke, i ngā hāpuku, i ngā mangō, i ngā tawatawa, i ngā maomao, i te tini noa iho o ngā kai o te moana, ngā mahinga a tērā iwi nui tonu, a te Ngutuau me ngā iwi o te ngahere, o ngā maunga, e mau mai ana i te hinu, me ērā atu kai.
Ka tau ki raro, kei te titiro a Tū-whakairi-ora ki te nui o Te Aotaki me tōna iwi, ka mea ia i roto i a ia, "Ka tae au ki te mate o tōku tipuna."
Ka tū a Te Aotaki ki te mihi ki te iwi. Ka mutu, kātahi anō ia ka whaikōrero ki a Tū-whakairi-ora, me te pātai ki te pūtake o tōna haramai ko ia anake. Ka tū ia ki runga - kua oti ia te rākai ki ngā tohu o te rangatira, o te toa. Tūnga ki runga, anā! me te mea ka whati te taiaha i roto i ngā ringa, wāhi kē te rapa me te reke. E mihi ana ki te iwi, kātahi ka utua te pātai. "Taku haramai, ko te whakataukī a tōku kōkā nōku pea e takatakahi ana i roto i a ia, ka kī iho nei,
"Ē ī, kia takatakahi koe i roto i a au, he tāne,
E ea i a koe te mate o tōku pāpā'.''
Ka oho ngā iwi, ko te mate o Poroumatā te haramai a Tū-whakairi-ora me te mihi anō ki ōna rongo toa e hau mai rā, rite ki a ia e tū rā.
Ka mutu te kai, ka tonoa e Te Aotaki he karere ki ngā pā rā, ki Puketapu, ki Kōtare, ki Te Rangihuanoa, ki Tarapahure, ki Tōtara-tawhiti, ki Okauwharetoa, me ērā atu pā ki te whakaatu ko Tū-whakairi-ora, he ngaki i te mate o tōna tipuna. Ka riro te karere rā, ka kī ia, "Whakatika, mauria tā koutou kai, kia wawe tāua te tau ki raro hei tūmau mō te ope āpōpō ki Okauwharetoa."
Kia mōhio koe – Kua kite koutou i whānau mai a Tū-whakairi-ora hei ngaki i te mate o Poroumatā, nā reira ka haere ia ki ngā iwi o tōna tipuna kia āwhinatia ia. Kei te putanga o muri ake nei o Te Wharekura te kite ai koutou me pēhea tāna ngakinga i tana mate.