Papatūānuku
Nā Hāre Williams o Te Aitanga-ā-Māhaki
Papatūānuku
Tēnā koe me ngā kaupapa tuku iho
Tuku iho i te Kore
I te Pō,
Ki te Ao Mārama.
Papatūānuku
I whakatōkia ki roto i a koe
I puta mai i te pōuritanga ō tō tinana
Ki te ao mārama, ko ngā āhuatanga o te ao tīmatanga:
Te kore . . .
Te pō . . .
Te ao . . .
Te moana . . .
Te whenua . . .
Ngā otaota . . .
Ngā rākau katoa . . .
Ngā ngārara . . .
Ngā manu . . .
Te marama . . . Te rā . . . Ngā whetū . . .
I takia e rātau ko te ao tūturu.
Puta iho i tō tinana
Ko Tangaroa . . .
Ko Rongomātāne . . .
Ko Haumiatiketike . . .
Ko Tānemahuta . . .
Ko Tāwhirimātea . . .
Ko Tūmatauenga . . .
Ko Hinenuitepō . . .
Ā, nā Hineahuone rāua ko Hinetītama
I hanga
He tangata . . . he tangata . . . he tangata!
Heke iho
Ko ngai-mātau
E okioki nei,
Ko te hunga okioki!
Ko ngā unanahi whakapiripiri huri noa i te ika nui
A Māui-tikitiki-a-Tāranga.
Papatūānuku
Nā tō ringa one-kura
I whakatō he kākano,
Ka tipu he rākau.
Nā tō ngākau kaha i hanga
I whakairo,
He tangata . . . he tangata!
Nā tō tinana i awhi . . . he iwi kotahi.
Nā tō wairua . . . ka puta mai he aroha
Hei tino korowai mō te tangata.
Papatūānuku
E awhi nei, e hāpai nei, kia whai reo ai ngai-mātau
Te iwi Māori...
Kia whai mana ai . . . puta noa ki te ao hou!
Ka tangi hoki te ngākau Māori mōu
E hahautia nei,
E tāhaetia nei,
E tūkinotia nei
E ngā kūaretanga o te maha!
Hinga mai he tōtara,
Hinga atu he tōtara,
Ā, kua ngaro rātau ki to aroaro o
Papatūānuku.
Papatūānuku
He maha rawa o mātau taumahatanga i tēnei wā.
Te tangi a te manu
Kei whea te tui, tui, tui-tui-ā ?
Te tangi a te manu mō tōna reo . . .
Ngā taumaha i roto i ngā whare-herehere . . .
Ngā taumaha i te heretangata i roto i ngā tāone.
Te tangi a te manu mō tōna whenua
Kua horomia nei e te kaihoro.
Whatungarongaro he tangata
Toitū he whenua.
Papatūānuku
Te tangi a te manu . . . kei whea te aroha?
Kua hinga kē te tōtara.
Ka titiro te manu, ka kite, ka rongo . . .
Ā, ko ngā taumaha tino teitei, kaha te ia...
Kei runga anō i a Papatūānuku, huri noa i tōna tinana
I te ao katoa!
Papatūānuku . . . Papatūānuku . . .
I a koe e noho wahangū nei
Kei whea kē te tino korowai o te tangata ?
Kei whea kē te aroha ?