Te Wharekura 74 – He tīpuna, he mokopuna
Whenu: Kōrero (Whakarongo) Kōeke 5–8
Ngā whāinga paetae
- Ka taea e te ākonga te whakaputa kōrero, te whakapuaki ōna ake whakaaro e pā ana ki ngā kaupapa maha, me te pakari anō o tana tū i ngā horopaki huhua noa. (Kōeke 5)
- Me whai hua, me hāngai te reo ā-waha, ā-tinana o te ākonga, me te pakari anō o te tū i ngā horopaki huhua noa. (Kōeke 6)
- Me whai hua, me hāngai te pāhekoheko atu a te ākonga, me tana āhei anō ki te āta whakahāngai i ana kōrero ki ngā horopaki ōpaki, ōkawa rānei. (Kōeke 7)
- Ka taea e te ākonga te whakaatu tana māia, tana tohungatanga, ki te āta whakaputa noa i te kōrero ahakoa te take, ahakoa ki hea. (Kōeke 8)
Ka taea hoki e te pouako te whakamahi ngā pūkenga, ngā kawenga, me ngā aromatawai e hāngai ana kei ngā whārangi 70–73.
Hei mahi
Ko Kingi Paerata Te Waka
Kia ōpaki te matapaki a ngā ākonga i ngā huapai me ngā huakino o tēnei mea, te taumau. Kātahi ka whakahaerehia e rātou he rārangi taupatupatu ōkawa mō te kaupapa nei. Ko te tautohe ko, 'He tikanga pai te taumau'. Me tohu e te kaiwhakaako ko ēhea rōpū kei te tautoko, ko ēhea kei te whakahē i taua tautohe. (Kōeke 5)
Te whakarōhanga o Waipiro
Kia takirua te mahi a ngā ākonga me te pohewa a tētahi o rāua ko Aporo ia, me tērā atu ko Ahinariki, te kōkā o Aporo, i te wā i tukuna ai ngā pararau e Ngā Puhi. Ka tiritiri rāua i ō rāua kare ā-roto me te kōrerorero i ngā take kīhai rāua i hoki atu ai ki te papa kāinga. Me whakamahi i ngā āhuatanga whakaputa reo hei kawe i ngā kare ā-roto. (Kōeke 6)
Ka tū ia ākonga ki te whakamārama i ōna ake take mō te whakaputa e pā ana ki te ao whānui i roto i te reo Māori. Me toko whakaaro nō te poari whakahaere o te kura te hunga whakarongo. Kia hāngai tonu te āhua o te kōrero ki te hunga whakarongo. (Kōeke 7)
Ka uiui ia ākonga i tētahi o ō rātou tīpuna (i tētahi atu rānei o tērā whakatipuranga) hei kimi mōhiohio mō te oranga o taua tangata me ngā tūāhua o te hītori i āwhina ki te hanga i taua oranga. Kātahi ka whakatakoto kōrero ia e pā ana ki tana rangahau hei whakaatu ki ētahi atu ākonga. (Kōeke 8)
