Te rango me te ngāngara
Nā Katarina Heikōkō Mataira
Nā Kerry Gemmill ngā pikitia
E noho ana a NGARA i tōna whare tukutuku, ka tau mai a MUI.
NGARA: Tēnā koe, e Mui.
MUI: Tēnā koe, e Ngara.
NGARA: Kei te pēhea koe?
MUI: Kei te pai rawa.
NGARA: E haere ana koe ki hea?
MUI: E haere ana ahau ki te rapu i aku hoa rango. E haere ana mātou ki te kimi kai.
NGARA: Ka pai rawa! Ki hea koutou e kimi kai ai?
MUI: Aua. Ki waenganui māra pea. He hōiho hemo kei reira. Ka pai hei kai mā mātou!
NGARA: Ka mutu tēnā ka aha?
MUI: Ka haere pea mātou ki te rērere haere, ki te porohīanga, ki te kanikani rānei i runga i te porohewa o tētahi koroheke! [Ka pouri a Ngara]
MUI: E pouri ana tō āhua - ka pēhea koe?
NGARA: Āe, kei te tino pōuri ahau.
MUI: Mō te aha?
NGARA: He ngāngara tino mokemoke ahau. Kāhore ōku hoa pēnā i a koe nā, hei haerēre haere, hei porohīanga, hei kanikani tahi rānei.
MUI: Nā te aha koe e kore ai e whai hoa?
NGARA: Aua nā te mea pea he ngāngara au. Ahakoa he aha te mea e tiro mai ki au ka mataku, ka oma.
MUI: Āe mārika, he take pōuri tonu tēnā. Engari, kei whea kē ērā atu o koutou ngā ngāngara?
NGARA: Kua matemate katoa. Nā te wahine o te whare nei rātou i patu.
MUI: Ko koe anake te mea i toe mai?
NGARA: Āe. Nā te mea kāhore au i whakapeke, kāhore au i kitea. Pai kē atu meinga i patua anō hoki au. [Ka heke ōna roimata]
MUI: Ka aroha hoki. Kaua e tangi, e Ngara. Ākuni ka puta mai he hoa mōu ...
NGARA: Kāo, e kore rawa.
MUI: Ka whiwhi wahine pea koe ...
NGARA: E kore rawa, e kore rawa!
MUI: Ka whiwhi tamariki kōrua. Ka kikī anō tō whare i te ngāngara...
NGARA: Kāo. Kāo. E kore rawa, e kō. Ka nui tēnā! [Kua tino auē nei te tangi]
MUI: Kaua e tangi. Kaua e tangi.
NGARA: Ahakoa ka puta mai tētahi he ātaahua atu, e kore au e pīrangi - kua mate aroha kē hoki au!
MUI: Nē? Ki a wai?
NGARA: Ki tētahi he tino ātaahua.
MUI: Ki a wai? Ki a wai?
NGARA: Ki tētahi he tino pai.
MUI: Ko wai? Ko wai?
NGARA: Hei aha! Kāhore hoki ia e pīrangi ana ki a au!
MUI: Nā wai i kī! Kua kōrero koe ki a ia?
NGARA: Kāo!
MUI: Kāti, me pēhea koe ka mōhio?
NGARA: E mōhio ana au. Kāhore e pai mai ki a au. He tino ngāngara hoki au.
MUI: Aue e Ngara, kare e pēnā rawa tō ngāngara. Āhua pai tonu tō āhua.
NGARA: Nē! Tika ana?
MUI: Āe, he tino pai tō āhua.
NGARA: E pai ana au ki a koe?
MUI: Āe, e tino pai ana koe ki a au.
NGARA: [E katakata ana]. Kāti. Me pēhea? Me kōrero au ki tāku e hiahia nei?
MUI: Āe, me kōrero koe.
NGARA: Auē, e hine. Ko koe te ātaahua nei. Ko koe te tino pai nei. Ko koe rā ia e mate aroha nei au. Ko koe. Ko koe!
MUI: Ko au?
NGARA: Āe, ko koe!
MUI: Ko au?
NGARA: Āe, e Mui. Māhau anake ka ora taku ngākau, ka mutu taku mokemoke. Haere mai, e hine. Ko koe hei hoa wahine mōku. Haere mai ki roto i tōku whare.
Hou atu ana a Mui, mau mai ana ngā miro hāpiapia. Auē ana ia me tana mōhio kua tinihangatia. Ka tōia a Mui e Ngara, kia hereherea.