Te Kete Ipurangi Navigation:

Te Kete Ipurangi
Communities
Schools

Te Kete Ipurangi user options:


Te Wharekura Ministry of Education.

Mā te pouako navigation


Te Rango me te ngāngara

nā Katarina Heikōkō Mataira

nā Kerry Gemmill nga pikitia

Spider on a web and fly on a leaf.

E WĀHI: e noho ana a NGARA i tōna whare tukutuku, ka tau mai a MUI.

NGARA: Tēnā koe, e Mui.

MUI: Tēnā koe, e Ngara.

NGARA: Kei te pēhea koe?

MUI: Kei te pai rawa.

NGARA: E haere ana koe ki hea?

MUI: E haere ana ahau ki te rapu i aku hoa rango. E haere ana mātou ki te kimi kai.

NGARA: Ka pai rawa! Ki hea koutou e kimi kai ai?

Spider on a web.

MUI: Aua. Ki waenganui māra pea. He hōiho hemo kei reira. Ka pai hei kai mā mātou!

NGARA: Ka mutu tēnā ka aha?

MUI: Ka haere pea mātou ki te rērere haere, ki te porohīanga, ki te kanikani rānei i runga i te porohewa o tētahi koroheke! (Ka pouri a Ngara)

MUI: E pouri ana tō āhua - ka pēhea koe?

NGARA: Āe, kei te tino pōuri ahau.

MUI: Mō te aha?

NGARA: He ngāngara tino mokemoke ahau. Kāhore ōku hoa pēnā i a koe nā, hei haerēre haere, hei porohīanga, hei kanikani tahi rānei.

MUI: Nā te aha koe e kore ai e whai hoa?

NGARA: Aua nā te mea pea he ngāngara au. Ahakoa he aha te mea e tiro mai ki au ka mataku, ka oma.

Spider on leaf waving at insect flying.

MUI: Āe mārika, he take pōuri tonu tēnā. Engari, kei whea kē ērā atu o koutou ngā ngāngara?

NGARA: Kua matemate katoa. Nā te wahine o te whare nei rātou i patu.

MUI: Ko koe anake te mea i toe mai?

NGARA: Āe. Nā te mea kāhore au i whakapeke, kāhore au i kitea. Pai kē atu meinga i patua anō hoki au.
(Ka heke ōna roimata)

MUI: Ka aroha hoki. Kaua e tangi, e Ngara. Ākuni ka puta mai he hoa mōu ...

Spider on leaf.

NGARA: Kāo, e kore rawa.

MUI: Ka whiwhi wahine pea koe ...

NGARA: E kore rawa, e kore rawa!

MUI: Ka whiwhi tamariki kōrua. Ka kikī anō tō whare i te ngāngara...

NGARA: Kāo. Kāo. E kore rawa, e kō. Ka nui tēnā! (Kua tino auē nei te tangi)

MUI: Kaua e tangi. Kaua e tangi.

NGARA: Ahakoa ka puta mai tētahi he ātaahua atu, e kore au e pīrangi - kua mate aroha kē hoki au!

MUI: Nē? Ki a wai?

NGARA: Ki tētahi he tino ātaahua.

MUI: Ki a wai? Ki a wai?

NGARA: Ki tētahi he tino pai.

MUI: Ko wai? Ko wai?

NGARA: Hei aha! Kāhore hoki ia e pīrangi ana ki a au!

MUI: Nā wai i kī! Kua kōrero koe ki a ia?

NGARA: Kāo!

MUI: Kāti, me pēhea koe ka mōhio?

Spider on web.

NGARA: E mōhio ana au. Kāhore e pai mai ki a au. He tino ngāngara hoki au.

MUI: Aue e Ngara, kare e pēnā rawa tō ngāngara. Āhua pai tonu tō āhua.

NGARA: Nē! Tika ana?

MUI: Āe, he tino pai tō āhua.

NGARA: E pai ana au ki a koe?

MUI: Āe, e tino pai ana koe ki a au.

NGARA: (E katakata ana). Kāti. Me pēhea? Me kōrero au ki tāku e hiahia nei?

MUI: Āe, me kōrero koe.

NGARA: Auē, e hine. Ko koe te ātaahua nei. Ko koe te tino pai nei. Ko koe rā ia e mate aroha nei au. Ko koe. Ko koe!

MUI: Ko au?

NGARA: Āe, ko koe!

MUI: Ko au?

Spider in web approaching fly about to bind him up.

NGARA: Āe, e Mui. Māhau anake ka ora taku ngākau, ka mutu taku mokemoke. Haere mai, e hine. Ko koe hei hoa wahine mōku. Haere mai ki roto i tōku whare. (Hou atu ana a Mui, mau mai ana ngā miro hāpiapia. Auē ana ia me tana mōhio kua tinihangatia. Ka tōia a Mui e Ngara, kia hereherea.)

Ki runga ^



Site map


Footer: