Te Kete Ipurangi Navigation:

Te Kete Ipurangi
Communities
Schools

Te Kete Ipurangi user options:


Te Wharekura Ministry of Education.

Mā te pouako navigation


I te hōhipere

Nā Ani Bosch nō Ngā Puhi

I haere ahau ki te hōhipere i te mea e mate ana ahau. Ko taku mate kei roto i taku korokoro. Mamae ana hoki, ā, tino piro hoki taku māngai.

Tae atu ahau ki roto i te hōhipere, ka haere mai he nāhi Pākehā ki a au. Kōrero mai ana a ia ki a au, engari kīhai ahau i kōrero atu ki a ia, i taku mataku. Ka huri a ia ki te horoi i a au, nā, ki te kākahu mai i a au ki ētahi kākahu moe. Ka hōmaingia e ia he hiripa mōku, he koti, me tētahi taora. Mutu atu tērā, kātahi ahau ka mauria e ia ki taku moenga. Tino pai tana reo ki a au, te aroha, ā, ka hanga pai ahau.

E tirotiro ana ahau ki aku hoa i roto i ō rātou moenga, ka tae mai ngā kai. Kīhai ahau i tukuna kia kai i ēnei kai, nā te mea ā te ata āpōpō ko te haere ahau kia pokaina a roto o taku korokoro. Heoi anō he wai anake tāku nei kai i tērā pō. Ka katakata aku hoa, ā, ka tahuri mai ki te whakatoi mai ki ahau. "E hoa, tino pai ngā kai nei. Horekau koe e hiakai ana? E hia ōu tau?"
Ka kī atu ahau, "Ae, e hiakai ana ahau. E waru ōku tau."

"Aue, kua mate koe e tama," hei tā te tangata nei. "Pai kē koe me hoki ki tō kāinga."

Ka hanga mataku ahau, engari ka mahara ahau ki ngā kōrero a te rata, ē ka ora ahau, ka kore taku korokoro e mamae ake noa, ā, ka koa taku ngākau. I te piraunga o ngā miti kātahi mātou ka moe, ko ētahi e ngongoro ana, ko ētahi e hurihuri ana i roto i ō rātou moenga. Moe atu ahau me taku ringa mamae, i te wāhi i werohia ai e te nāhi, ki te ngira.

I te ata, ka inu tī aku hoa, nā, ka hōmaitia e te nāhi he wai rēmana māku, nā, mutu atu te parakuihi ka haere mai he nāhi tāne ki te tiki mai i a au. Ka mauria au i runga i tētahi moenga whai wīra.

I taku aranga mai, kua tae kē mai ahau ki taku moenga. E noho ana he nāhi i te taha o te moenga e pupuri ana i aku ringaringa. Tata aue ahau i te tino mamae o taku korokoro, nā, ka hōmaingia he aihikirīmi hei kai māku. Ka hanga pai ahau, nā, tae rawa mai aku mātua kia kite i a au i te ahiahi, kua tino ora kē ahau.

E iwa rā ahau i roto i tēnei hōhipere, ko aku kai he aihikirīmi, he hupa, he here, me ērā mea pai ki te kai. Hoi anō taku mahi he hāereere haere ki ngā rūma katoa, he kōrero ki ngā āhua tāngata katoa, he atawhai i ngā tūroro e kore e tatū mai i ō rātou moenga. Tae mai te wā e hoki ai ahau i runga o te pahi, kīhai kē ahau i hiahia ki te hoki. Tata tangi ahau ki te noho, i te tini o aku hoa hōu, ā, i te aroha hoki o ngā nāhi ki a au. Mō koutou e haere atu ana ki roto i te hōhipere, tēnei tāku kōrero ki a koutou: Kaua e wehi, kaua e mataku. Mā te hōhipere, ngā rata me ngā nāhi koutou ka ora ai, pēnei i a au nei.

Ki runga ^



Site map


Footer: