He mahi tuna
Nā Ani Hona
I tētahi rā, kātahi a mātou ka haere ki te pīhuka tuna. Ko māua ko taku tungāne ko Tama, nā, ko Heremāia me tana tuahine ko Ruiha. Tokowhā mātou. Ko Heremāia rāua ko Ruiha he kaihana nō māua, nā, e hōrerei ana i konei. Nō te tāone nui o Ākarana rāua.
Kātahi anō a rāua ka haere ki tēnei mahi, nā, ka tohutohu atu ahau me mau tarau poto, hei aha he hāte, nā, hei aha i mau hū ai. Ka mahi a Tama i ā mātou pīhuka. He waea nama waru te whānui me whakakoi ki te whairu, nā, ka herea ai ki ngā rākau roroa ki te kōrari. Ka mātakitaki aku kaihana i ēnei mahi. Ka haere mātou, nā, tae atu ki te awa hanga reporepo, ka peke atu māua ko Tama ki roto i te wai.
Nā, ka huri a māua ki te pihapiha. Ka ui mai a Ruiha, "E aha ana koe?"
Ka mea atu a Tama. "E rapu tuna ana."
Ka mea mai anō a Ruiha. "Me pēhea koe e mōhio ui he tuna kei konā ?"
Ka kī atu ahau, "Taihoa. Āianei koe kite ai." Kīhai i roa ka tū i a au he tuna, ka wiriwiri tāku pīhuka. Ka pararē atu ahau ki a Tama, "Nā, he tuna tāku! Māu e hopu. nē?"
"Āe," hei tā tāna. "kei tukuna e koe kia oma." Ka heke te ringa o Tama ki roto i te wai i te taha pū o te pīhuka. Puta ake tana ringa he tuna i roto, nā, e titi tonu ana te pīhuka ki roto i te tinana o te tuna. Ka panga atu e ia te tuna nei ki te taha o te awa, nā, ka peke atu māua ki te patu i te tuna nei. Kāhi au ka rongo i te auē nei. Titiro ake ahau. kua oma kē a Heremāia rāua ko Ruiha, nā, kua tata ngaro kē atu i tua o te puke.
"Ha." Hei tā Tama, "Kei ōu nei whanaunga hoki! Te ngākau kore mataku noa iho i te tuna!" Ka aroha ahau i taku mōhio, ē, ka ahatia he Māori a rāua, nā te mea he tamariki tāone tauhou ana ki ēnei mea.. Ka mea atu au ki a Tama, "Ka pēnā pea tāua ina haere tāua ki Ākarana hōrerei ai. Mataku ana tāua i ngā motokā me ngā pahi pēnei i a rāua e mataku nei i te tuna."
"Āe," hei tā Tama.
Ka hoki māua me tā māua tuna, me ngā pīhuka, nā, tae atu māua ki te whare, e noho mai ana ō māua hoa. Ka mea mai a Heremāia, "Kaua kourua e whakatoi mai ki a māua i tō māua omanga. te kaha kino o te hanga o te tuna rā, ohorere pai au."
Ka whakahoki atu a Tama, "Kei te pai. E mōhio ana ahau ki ō whakaaro. Nā ina haere atu a māua ki tō kāinga a ērā hōrerei, kaua kourua e whakahāwea ki a māua ina hanga mataku māua i ngā mea o tō kāinga, nē?"
"Kua tika tēnā," hei tā Ruiha.
"Kua hiakai au," hei tā Tama. Ka kai mātou, engari nā aku mātua kē te tuna i kai, i tō mātou haerenga ki te moe. Kīhai a māua ko Tama i pai ki te kai i te tuna nei, kei kinokino ō māua hoa, nā, kīhai anō mātou i haere ki te mahi tuna i ērā hōrerei.