He mahi hī ika
Nā Ani Hona
Nā Evelyn Clouston David Cowe te pikitia
Tērā tētahi poti hī ika ko Rangipai te ingoa. He poti nui tēnei, e waru tāngata kei runga i a ia, nā, tā rātou mahi anake he hī, hei hoko ki ngā toa.
I taua rā nei, ka haere rātou. I te tawhiti o tā rātou haerenga, pēnei kei waenganui kē rātou i te moana nui. E pai ana anō te whiti o te rā, kātahi ka āwhā te moana.
Ka tino kino te moana, ka tīmata te poti ki te hurihuri noa iho. Ka kake, ka heke, kake, heke, ā, pāngia noa ngā tāngata nei e te mate moana. Ka pararē ake a Hōri, "Ai, e hoa mā, me hoki tātou. Hurihia mai te poti. Kia horo!"
Ka hurihia tō rātou poti e te kāpene ki te ara i haere mai ai rātou, engari ka kite atu ia kua tino kino te pupuhi o te hau, kua ua hoki. I te kaha o te ua, mamae pai ngā taringa i te turituri o taua ua nei. Mutu rawa ake te ua, kua pēhi mai te kohu. Ka mōhio tō rātou kāpene kua raruraru rātou. Horekau he aha i mua, i ngā taha, ā, i muri hoki. Ka ui atu tētahi o ngā kaihīika nei, "E hoa, kei hea kē rātou?"
Ka whakahoki atu te kāpene nei, "E pai ana. Mōhio ana au kei hea tātou."
Kīhai i mutu tana kōrero ka paoro tō rātou poti. I te pōuri, kīhai rātou i kite i paoro ki te aha. Ngakeke ana tō rātou poti i runga i ngā kōhatu nei. Ka oma atu ngā hunga nei ki te titiro i te taha o tō rātou poti, engari i te tini o rātou, nā, i te taimaha pea, kāhi tō rātou poti ka tahuri atu, maringi atu ngā tāngata nei ki roto i te moana. Ka kou rātou, ā, tae noa ki runga i ngā kōhatu, nā, ki te one hoki.
I te roanga, ka kōrero mai te kāpene, "E aku hoa, me whakaae mai koutou ina karanga atu au i ō koutou ingoa. E Hāre? Hōri? Naru? Tama? Pēne? Rā? Tai? Pere? E Pere, kei hea koe?"
Ka whakahoki atu a Hōri, "E hoa! Ko koe nā hoki a Pere! He aha te mate ki a koe?"
Ka hurē rātou ki te kata i te rawe hoki. Ka haere rātou i te pō ki te rapu wāhi hei nohonga mō rātou. E wake tonu ana anō rātou ka ao mai te rā.
Kātahi anō rātou ka kite kei runga kē rātou i te moutere, nā, moumou tō rātou tāima i wake ai. Ka takoto rātou, ka moe.
I tō rātou aranga ake, ka huri rātou ki te mahi kai; ko ētahi ki te mahi kai moana, ko ētahi ki te rapu wai; kitea ake e tētahi he taro, nā, ka kai rātou. I a rātou e kai ana, ka huri a Pere ki te tārai kia kā i a ia he māti. Kīhai i kā, hei tāna, ka kai tonu ia. I te mutunga o tā rātou kai, kua mura kē ngā karāhe, nā, kua tino toro haere tō rātou moutere.
Engari, i te nui o te ahi nei, kitea pai mai rātou e tētahi tīma nui. I tonoa mai ai he poti ki te titiro ē, he aha kē te mate.
Tino oho rātou i tō rātou kitenga mai i ngā korokē nei, nā, ka hoki rātou rā runga tima ki ō rātou kāinga.