Ko Rātana me te Kīngitanga
Te Reo Māori i roto i te Marautanga o Aotearoa
| Kōeke | 4 |
|---|---|
| Whenu | Pānui/Tuhituhi |
| Whāinga paetae | Ahakoa he aha te tūmomo tuhinga, e tino mātau ana te ākonga ki tāna i pānui ai, e taea ana hoki e ia te āta tātari. Ka whakapakari anō hoki ia i tāna āhei ki te arotake i te whai hua o āna tuhituhinga. |
| Pūkenga | Ko te tika me te whai hua o te pānui ā-waha. |
| He whakarāpopoto | He kaha rawa te hononga o Tahupōtiki Wiremu Rātana o Rātana me te Kīngitanga. I hono pūmautia a Tupu Te Rā Tahi o Pipiri Tāmihana Tarapīpipi Te Waharoa Taingākawa me Rātana. I haere tahi rāua ki ngā wāhi katoa o te ao. E ngākau nui ana rāua ki ngā take whenua me ngā take maha a te Māori. I tū rāua hei māngai mō te iwi. He rite ngā tini moemoeā a Rātana me te Kīngitanga. Ko tētahi o ā rāua tino kaupapa, he whakakotahi i te iwi, he whakahoki i te mana Māori motuhake ki te iwi i raro i te mana o ngā tūpuna me Ihoa o ngā Mano. Mai i ngā whāinga nei i whakaatu te hāhi Rātana me te Pou Kīngitanga i tō rātou honohono. He maha hoki ngā tāngata kua mihia i roto i ngā kōrero nei. Ko ngā tāngata kua ngaro atu ki tua o te ārai, ko ētahi kei te ora tonu. Nā rātou tēnei kaupapa i akiaki mō te iwi. |
Hei mahi 1: Pānui ā-waha
Ka hiahiatia: he hoa, he wati/matawā
- Me tuhi e ia ākonga te tūtohinga kei raro iho nei ki roto i tana pukapuka.
- Mā tētahi ākonga hei pānui i te kōrero.
- Ka pānui te ākonga i te kōrero ki tōna hoa i roto i te reo mārama rawa.
- Me āta tātari rāua i ngā kupu, i ngā kōrero, me tōna tikanga, ōna kaupapa hoki.
- Ko te mahi a tōna hoa, he kaute i te wā. Māna e kōrero atu te wā e pau ai te 2, te 5, te 7, me te 10 meneti.
- Me tuhi e te ākonga te rerenga kōrero mutunga i oti ai ia te pānui i taua wā.
- Ka pau ana te tekau meneti, me whakawhiti ngā ākonga.
| Wā | Rerenga mutunga |
|---|---|
| 2 meneti | |
| 5 meneti | |
| 7 meneti | |
| 10 meneti |
Hei mahi 2: Tito waiata
| 1. | Pānuitia ngā waiata e rua o te kōrero nei (whārangi 11 me 14)
|
| 2. | Tītoa i tētahi waiata poto mō Rātana me te Kīngitanga
|
Hei mahi 3: Whakarāpopoto
Whakarāpopotohia tētahi o ngā whārangi o te kōrero:
- Whakarārangihia ngā kupu hōu, ā, tuhia he kupu taka.
- Whakamahia ngā papakupu tā Ngata, tā Wīremu, tā Reed me Tirohia, Kimihia.
| Hononga marautanga | Tikanga ā-iwi |
|---|---|
| Whenu | Te ao hurihuri |
| Taumata | 4 |
| Whāinga paetae | Ka taea e te ākonga te whakaatu i ōna mōhiotanga me ōna māramatanga o ngā take me ngā huarahi hora whakapono tae atu ki te āinga me te rokohanga hoki o ēnei ki te oranga o te tangata, mā te tāutu i ngā ataata taurite e pā ana ki ētahi tūmomo rōpū. |
| Pūkenga | Kia mōhio te ākonga ki te rangahau i ngā hītori o tētahi whakapono, hāhi, ārahitanga rānei. |
Hei mahi 4: Tāutu hītori
Pānuitia te kōrero.
- Kimihia ngā rerenga kōrero e tāutu ana i tētahi whakapono, hāhi, arahitanga rānei.
- Tuhia taua rerenga ki roto i tōu pukapuka.
- Nā te aha i pēnei ai tōu whakautu? Tuhia ngā taunakitanga.
He aha ngā tīwhiri e mōhio ai koe he hītori ngā kōrero nei?
- Whakarārangihia oū tīwhiri, oū whakaaro hoki.
