Rāpata, te hōiho mahi
Nā Hopa Keelan
Ko tōku ingoa ko Rāpata. he hōiho mahi au. Ko ōku mātua he hōiho mahi anō, engari e tamariki tonu ana au ka mate rāua. He pākākā tōku kara, engari ko ngā huruhuru o tōku kakī, o tōku waero, me ōku waewae, he mā. He mā anō te kara o tōku rae. Inā tōku kaitā. Te hiahia te tangata ki te piki ki runga i tōku tuarā, ka ārahitia au ki te taiapa ki tētahi kēti rānei. Te kore, ka riro mā tētahi atu ia e hāpai ki runga i a au. He pai ki a au te tamariki pakupaku. Kāore au e ngau, e whana rānei i a rātou. Mehemea kei te here au ki te taiapa, ka haere mai rātou ki te mirimiri i tōku rae, i tōku kakī, i tōku tinana rānei. Pai ki a au kia mirimiritia au. I ētahi wā, ka hīkina ngā tamariki katoa ki runga i a au. Tokorima pea rātou, ki runga i tōku tuarā. Kātahi ka ārahitia au ki roto i te pātiki, ka tīmata te huri rauna. Ka pai ki ngā tamariki tēnei, ahakoa āta haere noa iho ana.
Ko tōku rangatira ko Hānara. Ko rāua ko tana tama ko Tātai aku kaiwhakahaere. he tino pai rāua ki a au. Pēnei tonu au ki te mōkai nei ki te whānau. E whā pea ōku tau ka akona au ki te tō. Engari ko te mea tuatahi i akona ki a au, ko te tangata hei tia kei muri kē, kāore i runga i tōku tuarā. Ko tēnā te mahi he hurihuri haere i te pātiki me te taraiwa ki muri e tia haere ana. E toru rā pea ka whakamaua taku kara, me taku hēmi. I āhua mataku tonu au i ēnei mea e whata ana i tōku kakī, engari ka roa haere, ka waia au. Ko tētahi mea, kāore i pai ki a au kia kai pātītī au, ka mania te kara ki ōku taringa. Pakō ana ki tōku māhunga. Ka tae ki te rā i whakamaua ngā tīni ki taku kara, ka herea he pōhi ki te moka kātahi ka whakamahia au ki te tō. He ngāwari ki te tō, engari, i tūmekemeke au i te tuatahi. Anā tēnei mea e whai haere ana i a au. Ka huri pēnei au, ka huri pērā au, kei muri tonu taua mea e whai ana i a au. E toru ngā rā i taha, kātahi anō ka pai taku tō.
Ka tae ki te rā ka whakamahia au ki te tō i te terei. Pai noa iho tērā. Tīmata ana au ki te tō i te terei, kua riro māku e mau ngā kēna kirīmi ki te whare tūnga kēna. Ko ngā kēna ki runga i te terei, ko te kaitia ka noho ki runga i tētahi o ngā kēna. Ko au te tō i te terei. Mai rānō au i mahi ai i tērā mahi me te mahi anō i ērā atu mahi o te pāmu, arā, te tō kāta, te tō rakaraka, te tō taonga tapahi pātītī, me te nui noa atu o ngā taonga e tō ana au.
Kāore kē tōku rangatira e hoko parareka ana, nō te mea ia tau ka wehe mai rātou he purapura hei ono i te kōanga. Ko ēnei ka purua ki runga whata kia pakari. Ko ngā parareka kai, ka tāria ki roto i te pākoro. Nā, ko tēnā tētahi o ngā mahi ia tau he ono parareka. Ka tae ki te rā tika mō te ono kai, ka utaina te parau, ngā pēke purapura, ngā kete, ki runga i te terei, ka haere te whānau ki te wāhi kua whakatauria ki reira te māra mō tēnei tau. Tae atu ki reira, ka whakamaua te parau ki muri i a au. Ko tōku rangatira a Hānara te whakahaere i te parau me te tia i a au.
Ko ngā rārangi tuatahi ngā mea uaua nō te mea kia tika kia hāngai tonu taku haere. Te kore hoki, ka rite ngā rārangi parareka ki ngā waewae o muri o te kurī. E toru ngā huringa a te parau i te papa, ka ono. Kotahi te tangata hei kari ngā puare, kotahi te tangata hei makamaka ngā purapura. Ka tutuki te rārangi, ka haere atu māua ko tōku rangatira me tā māua parau. Ko au ka whakahaeretia mā roto i te awaawa whakamutunga. Pērā anō te parau e whai mai ana i au. Ko tēnei he tāpuke i ngā parareka. Ka tae ki tērā moka, ka tīmata anō ki te huri i te papa. Ka oti e toru ngā rārangi, ka haere mai anō ngā kaiono. Ka pērā haere tonu pau noa ngā parareka hei ono. I ngā wā e mahi ana ngā kaiono i tā rātou mahi, ka tū au ki te tatari, me te whakangā hoki.
I ētahi wā, ka utaina a Tātai ki runga i tōku tuarā kia riro māna au e arataki kia wātea ai tōna pāpā ki te whakahaere i te parau. Me tohunga tonu te tangata mō tēnei mahi. Ina hoki, kaua te papa e huria ana e te parau, kia whānui rawa, kia whāiti rawa rānei. Kia tika tonu. Ahakoa kei a Tātai ngā reina, ko tōna pāpā tonu te tohutohu mai i a ia i muri, pēnei nā, "Kia āhua tere te haere," "Hē tere rawa tō haere, " "Kia piri atu ki te awa, " "He piri rawa koe ki te awa, '' "E tū, " "Haere. " Ko ēnā katoa ngā tohutohu a te kaiwhakahaere i te parau.
Ka oti te ono i ngā parareka, ko te mahi i muri mai he kīwha, arā he tapatapahi i te oneone o runga kia ngāwari ai te tipu ake o ngā parareka. Ko tēnā anō taku mahi, he tō i te kīwha. Haere atu ki tētahi moka, hoki mai, pākarukaru noa te oneone. Kei runga i te kīwha he tūru. Ko tērā te nohonga o tōku rangatira. Ko ia te tia i a au kia haere pēnei, kia haere pērā. Ka ngohengohe te oneone, ka uaua te tō i te kīwha nō te mea ka totohu ngā mata ki roto i te oneone. Nā reira, rite tonu taku tū ki te whakangā. Kāore a Hānara e aki i a au. Ka hoki mai taku hau, ka haere anō au. Rere ana te werawera i tēnei mahi.
E rua wiki e toru wiki rānei ka tīmata te puta ake o ngā parareka. Heoi anō, ka puta ngā parareka, ka puta anō ngā taru i te taha. Ko te mahi ināianei, he rakaraka, arā, he huhuti ake i ngā taru kia mate. Pai ki ahau tēnei mahi nō te mea he ngāwari te tō i te rakaraka. Ko māua ko Tātai te mahi i tēnei mahi. Kāore e roa ka oti i a māua tēnei mahi.
Ka puta ake ngā parareka, kua rārangi, ko te mahi i tēnei wā he karawhaea. Ko te mahi tuatahi he whakangohengohe i te oneone i waenganui i ngā rārangi parareka, he patu anō hoki i ngā taru. He mata tonu to te karawhaea mō tēnei mahi. Ka mutu tērā, ka haere noa atu te karawhaea ka tāpuke i ngā parareka, kia kore ai ngā rau e whaki i te hau. He mata tika anō to te karawhaea mō te tāpuke i ngā parareka. Ko Hānara tonu te whakahaere i te karawhaea kia tika ai te mahi. Te kotiti te karawhaea, ka hūtia ngā parareka, ka mate. Nō reira, me noho tonu te karawhaea ki waenganui i ngā rārangi. Te kore e tika taku haere, ka takahia e ōku waewae kaitā ngā parareka, ka kūmea rānei e au te karawhaea ki runga i ngā parareka. Kia pai tonu te tia a Tātai i a au. Pērā i te mahi parau. Ko tōna pāpā te tohutohu mai i a ia i muri, inā hoki nā te kaitā o tōku tinana kāore a Tātai e kite iho i ngā rārangi. Ko ngā tohutohu he ōrite ki ērā, "Āta haere, " "Ki tō mauī, " "Ki tō matau, " "E tū, " "Haere. "
Oti ana tēnā mahi, ka hoki mātou ki te kāinga. Ko tōku rangatira me tōna whānau ka whakareri mō te miraka o te ahiahi. Ko au, ka tukuna ki roto i taku pātiki. He nui te pātītī, he nui te wai. Makere atu ana taku paraire, ka takoto au ki raro ka takahuri au, tētahi taha ki tētahi taha, ka tū ki runga, ka ruirui i a au. Kātahi anō au ka haere ki te kai pātītī, ki te inu wai, kia whiti ai au mō ngā mahi āpōpō.