Pānia
Nā Tuiri Tareha
Ko Pānia ināianei he papa kōhatu e whā māero pea te tawhiti atu ki waho o Hukarere. I kau mai ai te wahine nei ki uta i ngā ahiahi, i te tōnga o te rā, ā, hei te ata pō, i mua atu i te putanga mai o te rā, ka hoki anō ki tana iwi i te moana.
Ko te wāhi nohoanga o Pānia, ina haere mai ki uta, ko roto o tētahi pū harakeke, e tipu ai i te taha o te puna wai māori, i te pūtake o te pari o Hukarere, tata atu ana ki te moana.
I tētahi ahiahi ka hiainu wai tētahi rangatira e noho pātata ana ki reira, ka haere ki te puna nei me tana tahā, ki te inu wai. I a ia e inu wai mai ana i tana tahā, ka kite atu ia i a Pānia e noho mai ana i roto i te pū harakeke. Ko tana haerenga atu, ka mauria ki tana whare, ka moe rāua. Otirā, i te ata pō, ka hoki anō a Pānia ki tana iwi i te moana. Hei te ahiahi ka hoki mai anō ki uta ki tana tāne.
Ka taka te wā ka whānau te tamaiti a Pānia he tāne, maheni tonu. Kāhore he huruhuru o te māhunga ka tapaia tonutia iho ko Moremore.
I tēnei wā ka pā te āwangawanga ki tana tāne kei riro tana tamaiti i te iwi o te moana. Kātahi ka haere ki te tohunga ki te ui tikanga e mau ai tana tamaiti rāua ko te whāea. Ka mea te tohunga me tuku a Pānia rāua ko te tamaiti kia warea e te moe, ka uta he kai maoka ki runga i a rāua, kia kore ai e hoki ki te moana. Otirā anō te raruraru, kāore pea i pai te tāmaoatanga o te kai, ina hoki anō a Pānia ki tana iwi i te moana, oti atu. Ko te tamaiti i hurihia hei mango taniwha. Ko āna wāhi nohoanga ko Hukarere me Rangatira, kei te ngutuawa o Ahuriri.
Ko Pānia ināianei, e ai ki te kōrero a te hunga mahi ika, ina purata te moana, ka kitea tonutia iho e takoto tāpapa ana, pango tonu ngā makawe o te māhunga, ā, ko ngā ringaringa matoro mai ana ki uta.
E ai ki ngā kōrero a ō mātou pakeke, he toka ika ināianei. Kei roto i te kēkē mauī he rāwaru anake ngā ika o reira; kei te kēkē matau he tāmure anake ngā ika o reira, kei waenganui o ngā kūhā he hāpuku anake ngā ika o reira. He tauranga tapu i te wā i a ratou. Nā te Pākehā kua noa noa iho, kua kore e rite te nui o te ika ki reira me te wā o mua.