Hoani Wiremu Hīpango
Nā Hōhepa Taepa
"Haere ake nei au, tiakina aku taonga"
Ko tēnei tupuna, ko Hīpango, (nō muri kē nei hoki te rironga i a ia o ngā ingoa Hoani Wiremu) he tupuna ia nō te Tai Hauāuru, nō ngā momo rangatira o te hapū o Ngāti Tūmangō. He hapū tēnei nō Te Āti Hau iwi. Ko te ariki rangatira o te iwi nei, o Te Āti Hau, ko Hōri Kīngi te Ānaua, ā, ahakoa ko ia kē te ariki o Te Āti Hau, taka kē ana ki a Hīpango te ranga me te taki i te iwi, i roto i ngā āhuatanga katoa i pā ki te iwi huri noa o Whanganui, mai i te tai whakarunga o te awa, puta atu i te riu pāwhara ki Whanganui, ki te tai whakararo. Ko tana mana i mana ai tana reo, he noho tūturu, he pākaha, he mahinga kai, he toitū whenua.
Ko Hīpango ia, o tērā whakatupuranga, i hopu tuatahi, i mau kaha, ā, i kawe pono, i te Rongopai i heria mai nei e Te Mātenga, i te tau 1814, arā, i waimarie ki te taonga a te wā, ki ēnei moutere o te Moana Nui ā Kiwa. Ko wai kē hoki i hua, ko wai i tohu, puta kau ana tā te wā tāna koha, ki a Te Āti Hau, ko ngā mihingare ērā ka puta, ka tatū mai ki Pūtiki-wharanui, e tū mai rā i te tahataha ki te rāwhiti o te awa o Whanganui, e tū hāngai atu ana ki te tāone.
Te whakatūranga atu a Hēnare Wiremu Karu-Whā i a Te Harawira ki Ōtaki, hei minita mō Ngāti Raukawa, Te Āti Awa ki Waikanae, Ngāti Toa mai i Whitireia ki te tonga nei, piki atu ki Mīria te Kakara i runga atu o Kākāriki, te paepae o Rangitīkei, ka tāwharau ngā iwi nei. Mutu iho te whakatō a te Karu-Whā, huri tonu mai te aroaro ki Whanganui, ā, i reira ka kite ia, kua tae noa mai te Rongopai ki te awa nei, ki a Whanganui. Ko te kaiamo mai i te taonga nei, ko Wiremu Te Tauri, o te kāwai rangatira o Ngāti Tūwharetoa. He katakihi a Te Tauri, i ākona e ngā mihingare i Taupō ki te kōrero pukapuka, ki te tuhituhi anō hoki.
Ka taka ki tētahi wā, pēhea rā, i mua noa atu i te taenga mai o ngā mihingare, tūpono tonu ko Hīpango tērā me tētahi whārangi Katikihama i taka mai ki roto ki ōna ringaringa. I tana kūare ki te kōrero tuhituhi heoi, noho ana ia me tana taonga. Nā te wā anō, ka puta mai ko Te Teira ki Pūtiki-wharanui hei minita mō Te Āti Hau. Haere tonu atu a Hīpango ki te whakaatu i te taonga i taka mai ki a ia, kia whakamāramatia mai ngā tohu e mau ake ana i runga pukapuka. I reira ka ākona a Hīpango ki te kōrero pukapuka, ki te tuhituhi hoki. Nāwai ā, ka mau i a ia te kōrero pukapuka, ā, ko tana huringa ake ki te kōrero i ngā tuhituhi o te whārangi i tūpono taka mai ki a ia. Kātahi anō ia ka mōhio ake he Katikihama tāna, koinei ka kimi ia i tana minita hei whakamārama i te tino tikanga o te Katikihama, ko tana mātautanga ake he wāhanga noa iho tēnei, ā, ko te wāhanga tonu o te Kotahi Tekau Ture a te Atua ki a Mohi me te iwi o Iharaira.
Hou rawa aua Ture ki te hinengaro o Hīpango, kāhore i ārikarika i te mahi a Te Teka ki te ako i te rangatira nei. Whakarērea ake e ia ana atua Māori, whai kē ana i te Rongopai Tapu a Ihu Karaiti, ū pū tonu tana whakarite i te Ture tuawhā, "Kia mahara ki te rā Hāpati, kia whakatapua." Ā, puta ana tana whakaaro, me tana kī: "Mehemea nā te Atua Nui ēnei Ture, me whakarangona ka tika!" Ko te huringa tēnei o Hīpango hei karaitiana, koinei i iriiria ai ia, ā, riro mai ana ōna īngoa karaitiana, Hoani Wiremu, i mōhiotia ai ia ko Hoani Wiremu Hīpango.
Nā te iwi o Hoani Wiremu Hīpango, ka whānau mai tētahi pepeha, e rangona tonutia ana i runga i ngā marae o Te Āti Hau. Koia rā tēnei: "E tangi e pere, mā Te Teira koe e whakatau."
Ko Te Teira, he Pākehā. I āta tukuna mai ia e Te Wiremu Karu-Whā o Paihia ki te Tai Tokerau, hei minita mō Te Āti Hau. Ko Te Teira anō te minita Pākehā tuarua mō te iwi nei; i toromi kē hoki tō rātou minita tuatahi, ā Te Meihana, i roto waipuke. Ko te haerenga mai o Te Teira hei rīwhi, ki Whanganui. Nāna te tino whakakaupapatanga mō te Mīhana ki Pūtiki-wharanui, mō tērā takiwā o te Tai Hauāuru, ki runga, ki raro, ki mauī hoki, ki katau.
I tētahi Rātapu, kikī tonu tō rātou whare karakia i te tangata. I a Te Teira e inoi ana, ka puta mai ki te whare karakia te kaimataara i oma ake i te awa, ka kōmuhu atu ki te taringa o te tangata i te tatau tonu, "Ē, kei te rere te kahawai!" Nā tēnei ki tērā i roto atu o te whare, ā, nāna ki tētahi atu. Kāhore i roa, mōhio katoa te minenga, ko te kahawai tērā e rere ana. Ka puta atu te tuatahi ki te whai i te kahawai e rere rā. Ka tahi, ka rua, ka toru, ka whā, te otinga o te inoi a te minita, titiro rawa ake, kua riro kē te nuinga o te minenga. Ka pōuri te minita, ā, ka kauwhau i tētahi kauwhau mārō tonu. Ka kī ia mō tana iwi, ki te wareware i a rātou tā rātou ki te Atua, ka whakangaroa rātou pērā me te hunga i whakangaroa rā e te Waipuke. Mutu kau te kauwhau, ko te tūnga ake o Hoani Wiremu Hīpango, ka kaute haere i te hunga i mahue i roto i tō rātou whare karakia.Tokoiwa rawa i ū tonu. Ko te kīnga atu, "E koro, e Te Teira, kaua rā e pōuri, inā, tokoiwa rawa tātou kei roto i tō tātou whare; he nui kē atu tēnei i ērā i roto o te Āka o Noa; tokowaru anake rātou." Koinei te whānautanga mai o te pepeha nei, nā te hunga i whai i te kahawai, inā rongo i te pere a tō rātou minita e tangi ana, "E tangi e pere, mā Te Teira koe e whakatau."
Tērā tētahi rangatira nō Whanganui, i hoki mai i te Upoko o te Ika, ko Te Mamaku te ingoa. Nā te aha rā, ko Te Mamaku me Rangihaeata e nana āna, e kakari ana ki te iwi Pākehā i Heretaunga ki te Whanganui-ā-Tara. Ka tae mai te wā, kite rawatia ake, kua hoki mai te rangatira nei ki te wā kāinga. Tau kau mai, ko ia ka puta ki te patu i ngā Pākehā o te tāone hou o Whanganui. Tae rawa atu ia me tana ope tauā, ana, ko te iwi o Pūtiki-wharanui me Ngāti Ruakā e tatari atu anā. I te rongonga o ngā Pākehā kei te haere iho a Te Mamaku ki te whakangaro i a rātou, tere tonu rātou ki te inoi atu ki ngā Māori o Pūtiki-wharanui kia āwhinatia rātou. Āmine tonu mai te iwi o Hoani Wiremu Hīpango. I te harakoa o ngā Pākehā, whakatakotoria ana tētahi hākari nui rawa mā ngā rangatira nā rātou nei i āwhina, i tiaki te Pākehā i te riri o Te Mamaku.
Te hokinga o te rangatira nei me tana ōati iho, "He paku rawa tēnei kahu, ā, noho ake, māku e hoki mai me tētahi kahu mahana noa ake, ā te Kirihimete." Ko tōna whakaaro kē, ko te hoki mai me tētahi ope nui kē noa atu, hei pakanga ki te Pākehā.
I te mōhio o Hoani Wiremu Hīpango me ngā rangatira o Pūtiki-wharanui ka aituā rātou o te tāone, horo tonu rātou ki te whakapā atu ki te kāwanatanga ka pare- kuratia a Whanganui, i te iti tāngata hei whawhai i te ope tauā a Te Mamaku ina hoki mai. Whakaae tonu mai te kāwanatanga, ko te haerenga mai o Kāpene Rei me tana Kura-takahi-puni, hei awhi i te hunga Pākehā i roto i tō rātou pā tūwatawata, o te tāone hou o Whanganui. Ka waimarie rātou, ka ora.
Engari tērā atu tētahi aituā i pā mai ki tētahi whānau Pākehā, ā, kī katoa noa iho anō, ko te patunga i te whānau a tētahi Pākehā, ko Kiriwhina te ingoa. Tērā tētahi Pākehā i whakaae ki te utu i tētahi koroheke ki te whakaaratia e ia he whare raupō mōna. I te otinga o te whare, ka kōroiroi te Pākehā rā, ka rere ki tana pū ki te whakamataku kau i te koroua. Nā te aha rā, pakū ana te pū a te Pākehā. Ka whakaaro ngā Māori he mea āta pupuhi mārika te koroua rā, ā, tō rātou kitenga i ngā hōia Pākehā e kāwhaki ana i tā rātou tangata ki roto i te pātū, whakaaro tonu iho ngā Māori, he āta kōhuru tika tonu i tō rātou tupuna, i a Hapurona.
I tētahi pō o Āperira, i te tau 1846, ka haere ngā whanaunga o te kaumātua rā ki te ngaki i te taotūnga o tō rātou tupuna. Tūpono tonu ko te wahine a Kiriwhina me ā rāua tamariki, ētahi rā, ka patua, mate rawa.
Ko te hunga e mōhio ana ki te ture Māori mō te ngaki mate, whakaheke toto rānei, e mātau ana, ehara tēnei, ki te Māori, i te kōhuru. Mā te ngakinga i te mate ka ea ai te hekenga toto. Nā reira, ki tō te Māori ki tōna ture, kāhore i te hē te ope nei.
Ko tō rātou haranga kē ko tā rātou hanganga kia whakapaea kētia ko ngā Māori o Pūtiki-wharanui, arā, o te tai whakararo o te awa o Whanganui. Nā tēnei, ka pōuri a Hoani Wiremu Hīpango me tana iwi. Koinei, ka tahuri anō a Hoani Wiremu Hīpango ki te rangaranga i tana iwi ki te whai i te ope nā rātou nei te patunga i te whānau a Kiriwhina.
Tū rawa mai ngā ope tokorua nei ki te tai whakarunga rawa o te awa. I reira ka pakanga, ā, mau ana taua ope i a Hoani Wiremu Hīpango mā, herehere rawatia, whakahokia mai ana ki Whanganui tāone whakawā ai i tā te Pākehā i tāna whakawā. Te whakataunga whakawā, he mea kōhuru e te ope nei te whānau a Kiriwhina; ehara kē rā, ki tā te Māori tikanga. Hei aha, whakamatea iho taua ope. Nā tēnei rangaranga a Hoani Wiremu Hīpango, ka wātea mai te taha ki a rātou o Pūtiki-wharanui.
Tērā tētahi wā, ka puta ngā whakaaro o tō rātou minita, o Te Teira, kia hoki ia ki tōna kāinga whenua tupu, ki Ingarangi, ki te tere i ana whanaunga. Ka whakaaro ake ia, pai tonu tētahi o tōna iwi o Pūtiki-wharanui kia haere tahi hei hoa mōna. Te kōkiringa i tana take ki te aroaro o Te Āti Hau, tere tonu te hopunga iho a te iwi i ana whakaaro. Ka rūnanga tētahi hui nui atu i ngā whakaaro o Te Āti Hau, tau ana tuatahi, ko wai hei hoa mō tō rātou minita, hei takapau tangata, hei reo, hei kanohi mō rātou i te aroaro o te Kuini; tuarua, he aha ngā takapau whakaaro hei whakatakoto atu ki te Kuini e tō rātou reo; tuatoru, he aha te takapau taonga hei tukunga ki te Kuini, hei tohu manaaki mā rātou ki te Kuini. Te whakataunga a te iwi, taka ana ki a Hoani Wiremu Hīpango, māna te haere ki rāwāhi, hei whakatutuki i ngā tūmanakoranga ō te iwi.
Ka maunu atu a Hoani Wiremu Hīpango rāua ko tana minita, ko Te Teira, mā runga kaipuke, ka tīmata ia ki te tuhituhi i ngā mahi, i ngā mea i kite ai ia, i rongo ai ia, mō ia rā, mō ia rā, tae noa atu ki Ingarangi. Koinei ka waimarie tātou ki tētahi wāhanga tuhituhinga āna mō tā rātou haere, whakawhiti rawa ki rāwāhi, i ngā moana nunui o te ao.
I a Hoani Wiremu Hīpango i Ingarangi, ka kite ia i ētahi mea whakamīharo rawa atu te hanga me te āhua tonu o taua whenua. Ngā toa hokohoko, ngā motuwaka nunui, ririki hoki, ngā rākau o ērā whenua, ngā tāngata tonu anō hoki, ō rātou āhua, te hanga tangata tonu. Te tāone, ā Rānana, ngaro ana i te tini tāngata, i kitea ai tōna nui whakaharahara, tōna wehi, tōna ihi. Āra atu anō te maha o ngā mea whakamīharo, tae atu ki ngā tīma, ki ngā iota, me ō rātou rāwhara, anō nei nā he ngahere tonu, hoki ana ngā mahara ki te pepeha a ngā tūpuna: "Ko ngā tāmariki rā ēnei o te wao nui a Tāne-mahuta."
Mau ana te wehi i a Hoani Wiremu Hīpango, i te takinga atu i a ia kia whakamanuhiritia e Kuini Wikitōria, i roto i tana whare. Inā hoki te nui, te tiketike, te maha o ngā rūma, he nunui katoa, kore i ārikarika. Ā, te taenga ki te wā i tukuna atu ai ia ki te aroaro o te Kuini tonu, ka mīharo anō te rangatira nei. I reira, ka mutu te whakatau a te Kuini, ka whakatakotoria atu ana taonga, arā, ngā takapau taonga a te iwi. I reira anō, ka whakatakotoria hoki e ia ngā whakaaro o Te Āti Hau, ō rātou tūmanakoranga, me tō rātou tapatahi i raro i te maru o te rangatiratanga motuhake o te Emepaea. I reira hoki, ka tūtaki a Hoani Wiremu Hīpango ki a Arapeta te Piriniha, te hoa tāne o Kuini Wikitōria. Ka tutuki rā te whakamaunga atu o tana iwi, i tukuna atu ai ia, hei hoa haere mō tō rātou minita, mō Te Teira.
Ahakoa rā, he maha ngā mea whakamīharo i kite ai ia, i rongo ai hoki, i te tāone nui tonu o tērā whenua, arā, o Rānana, tērā atu hoki ētahi mea maha tonu i pōuri ai a Hoani Wiremu Hīpango. Ko te noho tonu a tāua iwi, ā te Pākehā. I tana pōuri mārika, kauwhau ana ia ki a tauiwi, mō tā rātou takatakahi, tā rātou takakino i te Rā Hāpati. Whai wāhi tonu ia ki te kauwhau ki tētahi rōpū Hūrai o Rānana. Mangungu ana te rōpū nei, i te taumaha mārika o tana whakatakoto i ana tohe, i ana take, i tōna tūranga, mō te taonga a te Wāhingaro ki a ia, ki te Māori, ā, ki ngā tāngata katoa. Te mutunga iho o ana kauwhau, ko te huringa o tētahi wāhanga nui tonu o taua rōpū hei karaitiana. Hei whakamana i tō rātou huringa, nā te rōpū tonu nei ki a ia te inoi kia iriiria rātou i te aroaro tonu o Hoani Wiremu Hīpango.
Tērā anō tētahi kauwhautanga o Hoani Wiremu i te kokonga o tētahi tiriti, mō te tūkino a tauiwi i te Hāpati. I te kaha o tana kauwhau, tangi ana tētahi wahine, kotekote rawa, i tana mātaunga ake ki ōna kino, ki tōna hara nui. I kitea ai te hōhonutanga o te rangatira nei, ki ngā taonga-ā-wairua, ki tana maunga kaha i te Rongopai i whakatōria ki roto ki tōna whatumanawa.
I te ūnga mai o te rangatira nei me Te Teira minita, arā, ki te wā kāinga nei, tūpono tonu he pakanga nui kei Taranaki i waenganui i ngā rangatira o aua takiwā, ngā iwi o Rāwiri Waiaua me Katatore. Ko Te Teira i haere tuatahi ki te wawao, he aha te aha. I haere anō hoki a Hoani Wiremu Hīpango, pērā anō, he aha te aha. Whawhai tonu ngā iwi rā, tekau mā tahi tau te roa o taua pakanga.
Kāhore i roa i muri mai o tēnei haere ki Taranaki, ka hiahia a Hoani Wiremu Hīpango ki te tāpae i a ia hei minita i te Rongopai ki tana iwi. Ka whakapā atu ia ki tana minita, ki a Te Teira, ā, nā Te Teira i heri ki Ākarana, kia kuraina ki Tīpene. Nā, i tana hihiko, i tana hohoro kia puta ia, mau tonu iho te rangatira nei ki tana taonga, hore rawa he tirotirohanga ake, ki mauī ki katau, i te tapatahi o tōna whakaaro, o tōna hinengaro. Mahi atu ia ki roto ki te pō, ā, awatea noa; i te awatea, ā, atu ki te roanga o te pō, he kānara te rama. E hia tana roa e whakariterite ana i a ia, mō tāna i matea nuitia ai e ia. I tētahi rangi, rongo tonu iho ia i te taumahatanga o ana whatu; te tirohanga a te tākuta, kitea ana te hē haere o ana whatu, ko te whakakāhoretanga i a ia mō te mahi minita. Ahakoa nui rawa atu te mamae o te rangatira nei, ki tana hapanga ki te mahi i kōingotia e tōna hinengaro, mau tonu ia ki te taonga i kitea e ia, ki te koha a te Wāhingaro ki a ia, ki tana iwi hoki. I tōna hapanga, hapa ana anō hoki te hāhi i tēnei pononga mātau, pononga tapatahi, ki te mahi i te tika.
I te rongonga o Kāwana Kerei kua whakakāhoretia a Hoani Wiremu Hīpango mō te mahi minita, horo tonu tana whakatūranga i a Hīpango ki tētahi tūranga nui, tūranga mā te tangata pēnei anake anō me Hoani Wiremu Hīpango te tapatahi, te mōhio, te hihiko, te tika. Kāhore ia i whakaae i te tuatahi, heoi, nā te auau o te werowero a Kāwana Kerei, riro ana i tā te Kāwana, whakaae ana ia.
Ka mahi nei ia, ā, ka puta te karanga ki a Te Kerei kia neke hei kāwana mō tētahi whenua kē atu. I mua o te wehenga atu o Te Kerei, ka wehea ake e ia tētahi penihana mō Hoani Wiremu Hīpango, mō tana tautoko tapatahi i te kāwanatanga i roto i ngā whawhai, i ngā aha ake. Ka haere nei a Te Kerei, mutu tonu mai i reira te penihana o te rangatira nei. Kore rawa ia i kōrerorero, i komuhu, i kimi hara.
E hia anō ngā tau o Te Kerei e ngaro atu ana, ka whakahokia mai ia hei Kāwana anō mō Niu Tīreni. Kore tonu i puta he kupu i a Hoani Wiremu Hīpango. Kia roa tonu anō, kātahi anō a Te Kerei ka rongo ki te hara mārika o te kāwanatanga ki tēnei pononga rangatira āna. Ko te riringa o te Kāwana mō tēnei takakino a te kāwanatanga i tēnei tū momo tangata. Ko te whakahaunga a Te Kerei i te kāwanatanga, kia utua tāna nama ki a Hoani Wiremu Hīpango, tīmata mai i te tīmataranga rā anō, tae mai ki taua wā tonu.
I Moutoa, he moutere i roto o te awa o Whanganui, ki te tai whakarunga, ka papā te iwi o Hoani Wiremu Hīpango, arā, o Pūtiki-wharanui me ērā atu pā o te tai whakararo, ka pakanga rātou ki tētahi ope tauā o te Hauhau. Ko te ope nei, e whakamau mai ana ki te tāone hou o Whanganui, ki te patu kia mate rawa ngā Pākehā o taua tāone. Katoa. I konei ka rangaranga anō a Hoani Wiremu Hīpango i tana rahinga, hei ārai atu i te ope Hauhau rā. Ko tana tangi tuatahi tonu, ko tana karanga ki ngā kaiako o ngā kura katoa i roto i te rohe o Te Āti Hau, kia āwhinatia mai rātou, i runga i te kaupapa inoi ki te Runga Rawa, mō ana manaaki, āna tohu, mō tōna atawhai.
I te pō anō, ka whakaeke te hoariri ki te wāhi i te puni o Hoani Wiremu Hīpango. I Hiruhārama, o Whanganui awa, tēnei whakaekenga a te hoariri, ko te kōkiritanga o Hoani mā muri o ngā Hauhau, ā, ki te wāhi ki runga atu, hei aukati mai i muri, kia kite mārama anō ai hoki ia i tana puni.
Koinei te tukunga a te hoariri i ngā tokowhā hei wāhi i te puni o Hoani Wiremu Hīpango; mau ana aua tokowhā, whāngaia ana kētia, ā, tukuna atu ana kia hoki ki tō rātou ope. Ka tuaruatia anō tēnei wāhi a te Hauhau, i te tira whawhai a Hoani Wiremu Hīpango, kore ake he aha. Ka tuaruatia anō hoki e Hoani Wiremu Hīpango te whāngai i te kaiwāhi, ā, tukuna atu anō ki tō rātou ope tauā. Nō te papātanga tuatoru, ka taotūngia a Hoani Wiremu Hīpango. Nāna anō a ia i hoki ki muri, ka hoatu i tana pū ki a Hākaraia, tana tuarua, ka tohutohu atu, ā, whakahokia mai ana e ētahi o ana tāngata ki Pūtiki-wharanui whakahemohemo ai. I te kāinga, ka tirohia e ngā tākuta tokorua, kī tonu iho e kore e puta tana ihu. I te taenga atu o Te Teira, tūtuki tonu atu ia ki ētahi Māori e auē ana, "Kua mate a Hoani Wiremu Hīpango."
I mua o tana hemonga, ka whakatau oha ake ia, kia whakahokia tana tinana ki Pipiriki, ki te pae o te pakanga, he tikanga tawhito tēnei. Heoti anō, mau tonu iho a Hoani Wiremu Hīpango ki tana kāinga takoto ai.
Tētahi tangihanga nui whakaharahara rawa atu tērā. Puta katoa mai ngā māngai o ngā hāhi katoa, te tini Pākehā o te tāone hou o Whanganui, ngā tumuaki o ngā tūranga kāwanatanga, o ngā Kura-takahi-puni, o ngā kura hoki, ki te poroaki ki a Hoani Wiremu Hīpango. Ngarue ana te whenua, ngāoko ana te tangata, tutū ana te puehu i te takahanga a te Hokowhitu-a-Tūmatauenga, pāorooro ana i te pakupakūnga pū, rū ana te tupuna nei a Papatūānuku i te hakanga; tau ana te wehi, te ihiihi.
Mutu kau ana te karakia, ka whakamānu atu a Hoani Wiremu Hīpango i runga i ngā pakihiwi o tana tauā, ka amohia ki tana takotoranga i Korokota, he hiwi tairanga, he hiwi teitei tonu. Inā tonu te rere a te pari, hei aha, nā te aroha taea ana te piki, māmā noa iho te amo i taua rangatira. I kitea ai te puni rangatira, hei poroaki i a ia, i kitea ai tōna mana, tōna ihi, tōna wehi. Kitea ana te hono tātai, te mū a te tini, te wene a te mano, te manu tīoriori o tana waka o Aotea.
Whakatairangatia ana ia ki runga rā, kia mārakerake iho ai tana titiro ki runga ki Whanganui tāone, huri noa, ki runga Pūtiki-wharanui huri noa, ki runga ki tana iwi Pākehā, huri noa, tē Pākehā i ōhākī ai ia, ki tana iwi, ki a Te Āti Hau, "Ā muri ake nei i a au, tiakina aku taonga!"
Tanumia ana ia, ā Hoani Wiremu Hīpango, e tana tini, ā, whakaarahia ana he tiki whakamahara ki taua toa rangatira, toa ki te tuitui i te Pākehā, i te Māori, hei iwi mōna, kia rite ai i a ia te pepeha a ōna tūpuna, "Ehara taku toa i te toa takitahi, engari he toa takitini," ngā toa nā rātou nei i pūtiki ki te taura whiri ā te kuia rā, ā Hinengākau.
Nā konei rā, mai i tōna takotoranga i te moenga tē taea te nekeneke, ko ia tērā, kei runga tonu kei tōna taumata, hei waiataranga mā ngā whakatupuranga heke, heke iho,
Kei reira e noho ana,
Tamarahi Pā Riri,
Tītoko o te rangi,
Whakawhiti o te rā,
Whakaaio whenua!
Heoi anō rā!
Kia ora koutou katoa!