He ngakina i te hekenga toto
Nā Honai Wiremu Hīpango
Ko Margaret Orbell te ētita
Kua tangohia tēnei tuhinga mai i ngā GNZT Miscellaneous Manuscripts and Documents in Māori No. 5, e noho ana i roto i Ngā Whare Pukapuka o Tāmaki Makaurau.
Ko te tīmatatanga tēnei o te whawhai ki Whanganui, he whare mō ngā Pākēha, nā Hapurona i hanga. Ka oti te whare, ka haere atu a Hapurona ki te whakarite i ngā utu, ka hōmai e taua tamaiti tekau mā rima hereni. Ka tohe atu kia hōmai anō ngā pāuna e rua i whakaritea ai i te tīmatanga o te whakaritenga o te whare, ka pūhia mai te pītara ki a Hapurona, ka tū ki te pāpāringa. Ko te take tēnei i tupu ai te kino ki Whanganui.
Ka haere mai a Taka, ka kite i te tupuna, i a Hapurona, e auē ana i te mamae o te matā, ka tupu te whakaaro o Taka ki te rapu utu mō te tupuna, kia mate rawa ake. Ka tupu te mate; ka whakatika, ka haere ki te patu i a Kiriwharani me ana tamariki, me tāna wahine.
Ka tae atu ki te whare, kāore a Kiriwharani i mōhio ki te kaipatu i a ia, ka whakaaturia e Kiriwharani tētahi o ōna whare hei moenga mō taua hunga. Kāore i taro, ka whuia e Taka te pātītī ki a Kiriwharani. Kāore i kaha te toki; ka rere atu a Kiriwharani ki roto ki te whare, ki te wahine me ngā tamariki, ka ringitia te wai ki te rama kia mate, kia pōuri ai.
Ka wāwāhia mai e ngā kaipatu te tatau o te whare, ka rere a Kiriwharani nā te wini o te whare, ka pahure. Ka whārērea iho ko ngā tamariki me te wahine hei ngau mā te patu a te tangata Māori, ka ngaua kinotia e te patu.
Ko te mea tēnei i pōuri ai te ngākau o te tangata karaitiana, ko ngā mea whakataimaha i te ngākau - e kore e taea te whakamanawanui ki ngā mamae o te tinana. Mā tētahi tangata e kī he tangata kaha ia ki te whakamanawanui - kāore, ko Te Karaiti anake i whakamanawanui ; e kore e taea e te tangata tēnei mahi. Waiho atu ngā whakamanawanui i te Tamaiti o te Atua - kaua te tangata e mea e taea e ia.