Ko Tāwhaki, te tohunga whai poaka
Nā Sidney Mead
I te ata pō tonu, ka tae mai a Te Tomo rātou ko Ngāheu ko Tame. I a Ngāheu tā rātou pū; i a Tame rāua ko Te Tomo ngā kurī e ārahi haere ana. Ko ēnei kurī, he tino pai mō te whai tia, mō te hopu poaka, mō te ngau tangata hoki. Nā te nui o te pahupahu o ngā kurī nei, ka oho a Tāwhaki, ka kī atu ki ōna hoa, "E haere ana koutou ki hea?"
Ka mea atu ngā hoa, "Maranga! Haere ki te hopu i tō hōiho." Ka pātai a Tāwhaki, "Hei aha ai?"
"Ka whakahoki ngā hoa, "Kia haere ai tātou ki te ngahere."
Nā tēnei, ka koa katoa a Tāwhaki, ā, kāore i roa ka puta mai ki waho. Kātahi ka mea atu ia ki ōna hoa, "Mā koutou e hopu taku hōiho, kia haere au ki te whakakoi i taku naihi."
I mua o te haerenga o ngā hoa ki te tiki i tōna hōiho, ka mea atu anō ia kia herea ā rātou kurī, he tino nui nō te hoihoi, kei oho hoki ōna mātua me ana tāina. Ka haere ōna hoa.
I te taenga atu ki te taiapa, kāore te hōiho i roto; kua puta kē kei waho hāereere ai. Ka mea atu a Te Tomo ki a Ngāheu rāua ko Tame kia āia mai. I te omanga mai o te hōiho, kāore i haere mai mā te kēti, engari hūpeke mai ana i te taiapa.
Ka mea a Tame ki ōna tuākana, "E hoa mā, ehara tēnei mea i te hōiho, engari he tia kē, i tōna kaha hoki ki te peke i tēnei taiapa. Ākuanei pea, eke rawa ake a Tāwhaki ki runga ki a ia, kāore kē he take."
Ka mea atu a Ngāheu, "Ka kore e mau i a tātou; me tuku atu mā ngā kurī e whaiwhai kia ngenge ai."
Heoi, kāore i roa, ka mau te hōiho. Hoki rawa atu rātou ki te kāinga, e tatari mai ana a Tāwhaki.
I mua tonu i te whitinga o te rā, ka ngaro atu rātou ki roto i te ngahere. Ko ngā kurī kei mua e oma haere ana. Ka huri atu a Te Tomo ki ōna hoa, ka mea atu, "E hoa mā, kua oma ā tātou kurī, engari, e mōhio ana ahau, kei te whai tia."
Mutu ana tana kōrero, ka rongo tonu atu rātou e pahu haere mai ana ngā kurī. Tū ana rātou ki te whakarongo. Ka kī atu a Tame ki a Ngāheu kia whāngaia he matā ki tana pū, ki tōna mōhio hoki, ka puta mai taua mea ki a rātou.
Mutu kau ake tana kōrero, e oma mai ana he tia. Ka kī atu a Tāwhaki, "Anā e hoa! Pūhia!" I te pakūtanga o te pū, kāore kē i tū. Oma atu ana te tia.
Ka mea atu a Te Tomo, "E hoa, kāore ōtake. Hōmai te pū ki a au; tērā pea he pai ake ahau i a koe." Ka mea anō a Tame kia noho ratou ki te tatari i ngā kurī.
I te taenga mai o ngā kurī, ka tuku a Ngāheu ki te patu, nā te kaha o tana riri i te korenga i mate te tia. He mea kino hoki tēnei, mō te kurī whakangau poaka ki te whaiwhai tia. Tae rawa ake ki te poaka, kua ngenge kē.
Ka haere anō rātou. Ka piki haere i te hiwi mā ngā huarahi kararehe. I te ekenga ki runga, ka oma anō ngā kurī. Ka rongo rātou e pahu mai ana.
Ka mea atu a Te Tomo ki ōna hoa ko rātou e noho ki te tiaki i ngā hōiho, engari ko Tāwhaki e haere hei hoa mōna. Ka oma rāua. I tō rāua taenga atu, kei roto te tāriana poaka i te puare o te rimu, ko ngā kurī kei waho e pahu atu ana. Ka whakaaro ngā tokorua nei, hei aha i pūhia ai, engari me hopu e rāua. Kātahi ka whakatata haere atu a Tawhaki. Ka kī atu a Te Tomo kia haere ia mā tua, ko ia mā mua. I te kitenga atu o Tāwhaki i te poaka, ka karanga ia ki tōna hoa, "Kāore e mau i a au; he tino nui rawa."
Ka mea atu a Te Tomo kia werohia ki te rākau, kia puta mai ai ki waho. Ohorere ana te poaka, ka oma mai ki waho. Kātahi ka tūmeke a Te Tomo, ka piki ki runga i te rākau, ka mahue te pū. I te omanga mai o Tāwhaki ki te pū, ka kitea e te poaka, ka whāia. Ka piki hoki ia ki te rākau. Kei te pahupahu ngā kurī, kei te ngau hoki i te poaka. He tino māia ēnei kurī. Ka ngaua haeretia e rātou te poaka nei, ā, hoki ana ki tōna rua.
Ka mea atu a Tāwhaki ki a Te Tomo, "Hōmai pea ki a au te pū. Kāore e pai ki a koe; he mataku nōu. Ka mahue i a koe te pupuhi, ka piki kē koe ki runga i te rākau."
E mau atu ana a Tāwhaki ki te pū, ka ngaua mai e ngā kurī te poaka, ka oma mai anō ki waho.
"Anā e hoa, pūhia!" e kī atu ana a Te Tomo. Ka pakū te pū. Auahi katoa, engari e tū tonu ana te poaka - he tū wairangi nei! Ka mea a Te Tomo, "E tama i pūhia e koe ki hea?"
"Ki te māhunga," ka whakahoki atu a Tāwhaki. Ko te poaka nei, kei te mau i ngā kurī ināianei.
"Kāo! I tū kē i a koe te taringa. Kāore koe i pai ake i a au mō te pupuhi," ka mea atu anō a Te Tomo.
Ka kī atu a Tāwhaki, "E mōhio ana au, e piko ana te ngutu o tēnei pū."
Ka mea atu anō a Te Tomo, "Hōmai māku e pupuhi, kei pūhia e koe tētahi o ngā kurī."
Ka pakū te pū, ka mate taua poaka; werohia atu hoki te kakī kia puta ai ngā toto.
Tae rawa mai a Tame rāua ko Ngāheu, kua kā te ahi hei hunuhunu i tā rātou poaka. I te tino nui o tēnei poaka, e whā kē rātou hei hiki ki runga i te ahi.
Kāore i roa, ka mutu te hunuhunu, ka tapatapahia kia uru ai ki ngā pīkau. Ko te taha nui ka hoatu ki a Tāwhaki, nō te mea he nui ake tana whānau. Ka koa katoa rātou mō tō rātou waimaria.
E huri ana te rā ki te ahiahi ka hoki rātou, me te riri haere anō o te hōiho o Tāwhaki mō te tino taumaha rawa o tana pīkau.