Te take kōti
Ngā whenu
- Kōrero (Whakarongo) – Kōeke 4
- Tuhituhi (Pānui) – Kōeke 8
I waenganui i ngā tau 1987 ki te tau 2004 he nui ngā nekehanga e pā ana ki tō tātou reo rangatira. Me mōhio ngā ākonga ki ngā rōpū maha i roto i te kaupapa whakaora i te reo ki runga i te pouaka whakaata. Me mārama hoki ki te hīkoitanga i takahia ai e te iwi Māori kia ora ai tō tātou reo rangatira.
Hei mahi
1. Me tāruarua te mahere i raro rā. Me pānui, me matapaki ngā kōrero o raro. Me tapahi ngā tuhinga kōrero, me tapahi ngā tau. Me mahi takirua, takitoru rānei. Me hono ngā tau ki ngā kōrero e tika ana.
2. Me mahi takirua, takitoru rānei. Me rangahau ko wai ēnei rōpū, he aha ā rātou kaupapa. (Mā te papakupu, mā te ipurangi, mā te whare pukapuka, mā te pukapuka nama waea hoki ka āwhina i a rātou).
- Kaunihera Māori o Aotearoa (NZ Māori Council)
- Te Taura Whiri i te Reo Māori (Māori Language Commission
- Rūnanga whakapaoho mō te raihana pouaka whakaata ā-motu (Broadcasting tribunal)
- Te Reo Tātaki o Aotearoa (Television New Zealand)
- Ngā Kaiwhakapūmau i te Reo (Māori Language Board)
- Irirangi Te Motu (NZ on Air)
- Te Māngai Pāho (Māori Broadcasting Funding Agency)
- Whakaata Māori (Māori Television).
He wātaka
| 1985 | Ka whakaurua te take a te Kaunihera Māori o Aotearoa ki te rūnanga whakapaoho mō te raihana pouaka whakaata ā-motu tuatoru. |
|---|---|
| 1987 | I raro i te Ture mō te Reo Māori, ka noho ko te reo Māori hei reo whai mana i Aotearoa. Ka whakatūria hoki Te Taura Whiri i te Reo Māori hei kaitiaki mō te reo. |
| 1988 | Ka werohia te hurihanga o Te Reo Tātaki o Aotearoa hei kamupene mahi moni. Ka herea ōna rawa e te Kaunihera Māori o Aotearoa me Ngā Kaiwhakapūmau i te Reo i roto i ngā kōti. Ka whakapae rātou, kāore anō kia tika te tautiaki i te reo Māori i roto i ngā mahi whakapaoho. |
| 1989 | I raro i te Ture Whakapaoho ka whakaritea mā ngā rōpū kāwanatanga te Komihana Whakapaoho, arā mā Irirangi Te Motu e whakatairanga te reo Māori. |
| 1991 | Ka puta te kī taurangi a te Kāwanatanga ki te Kōti Teitei tērā ia e whakatū tikanga tiaki i te reo i roto i te pouaka whakaata me tētahi pouaka whakaata Māori. |
| 1992 | Ka haere a Ngā Kaiwhakapūmau i te Reo me te Kaunihera Māori o Aotearoa ki te Kōti Pīra kia whakawhānuitia ngā kī taurangi a te Kāwanatanga. Kāore i tautokona e te kōti. |
| 1993 | Ka haere anō a Ngā Kaiwhakapūmau i te Reo me te Kaunihera Māori ki te kōti ki Ingarangi, arā ko Te Kōti Teitei Rawa o Aotearoa, mō ngā take whakapaoho. Ka hinga te take ki reira, engari ka whakahautia te Kāwanatanga e te kōti kia whakatutuki i tāna i oati ai. |
| 1994 | Ka whakatūria a Te Māngai Pāho. |
| 1996 | Ka whakatūria he komiti mahi tahi nā te Kāwanatanga me ngā rōpū Māori kia wānangatia ngā kaupapa tika mō ngā rā kei mua. Ka whakatūria a Aotearoa Television Network (ATN) e te Kāwanatanga, ahakoa ngā whakahē a te komiti mahi tahi mō te iti o ngā pūtea me te hāngengangenga noa o tōna tū. |
| 2001 | Ka whakaputaina e te Kāwanatanga he tikanga hou, e tū ai tētahi ratonga pouaka whakaata Māori. |
| 2004 | Ka tīmata te paohotanga o Whakaata Māori. |
