He hītori
Ngā whenu
Kei raro iho nei ko ētahi hītori e pā ana ki te urutanga mai o te pouaka whakaata ki Aotearoa. Me mārama te ākonga ki ngā tau whakahirahira.
Hei mahi
Tāruatia tēnei mahere kei raro iho nei. Tapahia atu ia wāhanga. Me mahi ā-rōpū ngā ākonga. Hoatu tētahi wāhanga o te mahere ki ia rōpū hei matapaki, hei whakawhiti kōrero, hei rangahau.
| Tau | Rerenga kōrero | Hei mahi |
|---|---|---|
| 1930 | I tīmata ngā kaipūtaiao ki te rangahau he aha ngā momo hangarau hei whakapaoho atu ngā pikitia ki te ao. Ko John Baird, he Kōtimana, ko Philo Farnsworth, he rangatahi nō Amerika, ko Vladimir Zwoykin, e noho ana i Amerika engari nō Russia kē, ngā kaihangarau matua. | Me whakawhiti kōrero mō te tekau tau 1930. He aha ngā hangarau o te wā nei ki Aotearoa? Me kimi whakaahua tawhito o aua momo hangarau. Hei tauira: he kāmera mō te tango whakaahua. |
| 1951 | I whakatauiratia te pouaka whakaata ki Aotearoa. He wā poto noa iho te whakapaoho atu, engari kāore i whakapaoho atu ki te ao whānui. | Me hoki ngā ākonga ki te kāinga ki te pātai ki ō rātou mātua, kaumātua rānei, he aha ngā momo hangarau o te wā nei. Ka hoki mai ki te akomanga, me tū ia ākonga ki te whakaatu i tana pūrongo ki ōna hoa. |
| 1960 | I tīmatahia te pouaka whakaata ki te whakapaoho ki Aotearoa. | Me hoki ngā ākonga ki te kāinga ki te pātai ki ō rātou mātua, kaumātua rānei, nōnahea i kite tuatahi ai rātou i te pouaka whakaata. He aha ō rātou whakaaro tuatahi? He aha ngā hōtaka pai rawa atu ki a rātou? He aha ai? Me tū ia ākonga ki te whakaatu i tana pūrongo ki ōna hoa. Me matapaki hoki he aha ngā hōtaka pai rawa atu ki a rātou, he aha ai hoki. |
| 1960–1980 | Torutoru noa iho ngā pikitia kaupapa Māori i whakapaoho atu mai i te tau 1960 tae atu ki te tau 1980. | Me hoki ngā ākonga ki te kāinga ki te pātai ki ō rātou mātua, kaumātua rānei, he aha ngā hōtaka Māori pai rawa atu ki a rātou i taua wā. He aha ai? He aha ngā hōtaka auraki pai rawa atu ki a rātou? He aha ai? Me tū ia ākonga ki te whakaatu i tana pūrongo ki ōna hoa. |
| 1962 | I whakamanahia tētahi ture ki te whakatū i tētahi rōpū e kīia nei ko te New Zealand Broadcasting Corporation. Nā te kāwanatanga tēnei i whakatū kia whakahaere reo irirangi, kia whakahaere pouaka whakaata hoki i Aotearoa. | Me mārama ngā ākonga ki te tikanga o tēnei rōpū. |
| 1970 | I ngā tau 1970 i whakatūria Te Rōpū Reo Māori o Aotearoa ki Te Whanganui-a-Tara. Ko tō rātou kaupapa ko te whai huarahi mō ngā ākonga reo Māori ki Te Whare Wānanga o Wikitōria. | Me rangahau ngā ākonga ko wai ngā mema o Te Rōpū Reo Māori o Aotearoa. Me pā atu ki ngā pānui o Te Taura Whiri i Te Reo Māori, He Muka, me Ko te Whānau hei āwhina. Me pā hoki ki te paetukutuku www.tetaurawhiri.govt.nz |
| 1980 | I tīmata a Koha i te tau 1980. Whai muri i tērā, i tū hoki ko te wāhanga pitopito kōrero e kīia nei ko Te Karere. | Me mātakitaki ngā ākonga i a Te Karere. He aha ngā kaupapa kōrero i puta mai i te hōtaka? Me whakaatu i tana pūrongo ki ōna hoa. Mā te teina, me mātakitaki hōtaka tamariki reo Māori. He aha ngā kaupapa i puta mai i te hōtaka? Me whakaatu i tana pūrongo ki ōna hoa. |
