Ngā whāinga paetae
Koinei ngā whāinga paetae o Te Reo Māori i Roto i te Marautanga o Aotearoa e hāngai ana ki te kaupapa o Te Tautoko 53 e rārangi iho nei:
Whenu: Whakarongo (wh. 60, 61, 62)
Kōeke 3: Ka whakarongo, ka mārama, ka pāhekoheko te ākonga kia mau, kia roa ai ngā whiriwhiri ā-rōpū i ngā tūmomo horopaki ako katoa.
Kōeke 4: Mā te āta whakarongo ka taea e te ākonga te kōrero te whai.
Kōeke 5: Ka mārama ki te ākonga te whānuitanga o ngā kōrero i te huhua noa o ngā horopaki ngahau, me ngā horopaki ako.
Whenu: Kōrero (wh. 68, 69, 70)
Kōeke 3: Ka taea e te ākonga te kōrero, te pātai, te whakaputa ōna ake whakaaro ki te hunga ākonga, ā, me raupapa, me mārama te kōrero.
Kōeke 4: Ahakoa te horopaki e whai hua ana te whai wāhi atu a te ākonga ki ngā whiriwhiri; ka taea anō hoki te whakaputa whakaaro, te whiu pātai, me te mārama anō ki ngā hiahia o te hunga whakarongo mai.
Kōeke 5: Ka taea e te ākonga te whakaputa kōrero, te whakapuaki ōna ake whakaaro e pā ana ki ngā kaupapa maha, me te pakari anō o tana tū i ngā horopaki huhua noa.
Whenu: Pānui (wh. 77, 78, 80)
Kōeke 3: Ka taea e te ākonga te tīpako mai me te pānui ngā tuhinga, hei whakangahau, hei whakaea hoki i ngā kaupapa kua whakaritea.
Kōeke 4: Ahakoa he aha te tūmomo tuhinga, e tino mātau atu ana te ākonga ki tāna i pānui ai, e taea ana hoki e ia te āta tātari. Ka whakapakari anō hoki ia i tōna āhei ki te arotake i te whai hua o āna tuhituhinga.
Kōeke 5: Me tōrino te pānui a te ākonga, me tātari anō i tāna i pānui ai i ngā marau o te kura hei tāutu i ngā waiaro, i ngā uara, i ngā pūtake o te kaituhi.
Whenu: Tuhituhi (wh. 86, 87, 88)
Kōeke 3: Me mārama, me whai hua tā te ākonga, tāna tuhi i ngā momo tuhinga huhua noa.
Kōeke 4: Me whai hua, me mārama te tuhi a te ākonga i ngā momo tuhinga huhua noa mō ngā kaupapa whānui, ā, me hāngai te tuhinga ki te pūtake me te hunga pānui.
Kōeke 5: Me mārama, me whai hua, me whānui ngā momo tuhinga a te ākonga, me te āta aro anō me pēhea te whakaraupapa tika i ngā kaupapa.
Whenu: Mātakitaki (wh. 95, 96, 97)
Kōeke 3: Ka mātakitaki, ka mārama te ākonga ki ngā momo reo ataata, reo ā-waha, me mōhio anō ki te pānga o tētahi ki tētahi.
Kōeke 4: Ka āhei te ākonga ki te whakamārama i te āhua o ngā pānga o te reo ataata poto i takea mai i ngā horopaki kāore ia e tino taunga ana.
Kōeke 5: Ka mōhio, ka whakamārama ake te ākonga i ngā hua o te nohotahi a te reo ataata me te reo ā-waha.
Whenu: Whakaatu (wh. 103, 104, 105)
Kōeke 3: Ka taea e te ākonga te whakamahi ngātahi te reo ā-waha me te reo ataata kia puta ai ngā pānga e hiahiatia ana.
Kōeke 4: Ka whakaatu te ākonga i te reo ataata i ngā horopaki huhua, ā, e hāngai ana te whakaaturanga ki te kaimātakitaki.
Kōeke 5: Ka taea e te ākonga te whakamahi te huhua o ngā āhuatanga reo ataata hei whakawhiti whakaaro.
