Te Totitoti
Ngā Whāinga Ako
Kia mōhio te ākonga:
- ki te whakautu me te whakatakoto pātai māmā
- ki te tatau raraunga
- ki te whakamāori kauwhata whakaahua
- ki te whakaputa whakaaro, ki te matapaki i ngā otinga.
Ngā Kupu/Kīanga Matua
whakaari raraunga, raraunga, kauwhata whakaahua, matapaki
I Mua i te Pānui Pukapuka
Ka hīkoi whakamua, whakamuri hoki ngā ākonga katoa ki tētahi wāhi. Ka tatau tahi rātau i a rātau e hīkoi ana. Tonoa tētahi ākonga kia hīkoi ki tētahi wāhi. Ka tatau te katoa o ngā ākonga i ngā hīkoitanga a te ākonga. Kei raro nei ētahi kōrero hei tīmatanga:
- “Hīkoi ki te rākau.”
- “E hia ngā hīkoitanga ki te ________?”
- “E hia ngā hīkoitanga a __________ ki te ___________?"
- “E hia āna hīkoitanga ki te ___________?”
Whakawhitiwhiti kōrero mō te pikitia kei te uhi o mua.
- “E aha ana ngā tamariki?”
- “Kei te tū rātau ki runga i te aha?”
- “He aha ngā mea kei ō rātau pona?” “Hei aha ērā mea?”
- “Kua whakamahia e koe te poutoti?”
He Pātai Whakawhitiwhiti Kōrero mō te Wā e Pānui Ngātahi ana te Pukapuka
- “Ki tō whakaaro, e hia ngā hīkoitanga a ________ kia tae ki te ___________?”
- “Titiro mai ki tēnei. He aha tāu e kite ana?”
- “E ai ki tēnei whakaatu raraunga, e hia ngā hīkoitanga a _______ kia tae atu ia ki _________?”
- “He aha te whakautu ki te pātai?”
- “He nui ake, he iti iho rānei ngā hīkoitanga a _________ i ngā hīkoitanga a _____?”
- “He nui ake ngā hīkoitanga a _________ i ngā hīkoitanga a wai?”
- "Ko wai i toa?”
- “He kauwhata whakaahua tēnei. He aha tāu e kite ai?”
- “Kei te whakaatu te kauwhata whakaahua i te aha?”
I Muri i te Pānui Pukapuka
Whakamahia he kēne poto hei hanga poutoti mā ngā ākonga. Ka whakaharatau rātau ki te hīkoi ki runga i ngā poutoti. Kātahi ka tatau ngā hīkoitanga a ia ākonga. Tuhia ki tētahi tūtohi, pērā ki te tūtohi kei te pukapuka.
Hangaia he kauwhata whakaahua hei whakaatu i te maha o ngā hīkoitanga a ngā ākonga.
Matapakia ngā otinga. Hei tauira:
- “E hia ngā hīkoitanga a ________?”
- “He aha tāu e kite ai?”
- “He nui ake, he iti iho rānei ngā hīkoitanga a _________ i a wai?”
- “He nui ake ngā hīkoitanga a _________ i a wai?”
- “He iti iho ngā hīkoitanga a __________ i a wai?"
- "Ko wai i toa?”
- “He aha te tino kaupapa o te kauwhata whakaahua nei?”
- “He kōrero anō mō te kauwhata whakaahua?”
Whakawhitiwhiti kōrero mō ētahi atu tūhuratanga tauanga hei kohi raraunga. Mā te ākonga e whiriwhiri te kaupapa e pai ana ki a ia. Ka tīmata mai i te pātai e hiahia ana ki te whakautu. Hei tauira:
- Ko tēhea te hākinakina pai rawa atu ki ngā ākonga?
- He aha ngā hū i mau mai ai ngā ākonga ki te kura?
Tonoa ngā ākonga kia whakaoti i ētahi rerenga kōrero ā-tuhi. Hei tauira:
- E ________aku hīkoitanga ki te ___________.
- E ___________ ngā hīkoitanga a ____________ ki te __________________ .
- He iti iho te hīkoitanga a _________ i ngā hīkoitanga a ________________.
- He nui ake te hīkoitanga a ___________i ngā hīkoitanga a ______________.