Te Tākaro Hītokotoko
Ngā Whāinga Ako
Kia mōhio te ākonga:
- ki te whakatakoto whakaaro mō te otinga o tētahi pāpono tūponotanga māmā
- ki te reo māmā hei whakaputa whakaaro ki te tūponotanga o tētahi putanga
- ki te kōrero mō ngā hua e puta ana i tētahi pūāhua tūponotanga.
Ngā Kupu/Kīanga Matua
matapae, kāre e kore, ākene pea, e kore rawa atu
I Mua i te Pānui Pukapuka
Whakawhitiwhiti kōrero mō te tikanga o te matapae me te reo māmā hei whakaputa whakaaro mō te tūponotanga. Hei tauira:
- “Ki tō whakaaro, ina ka puta ki waho, ka kitea he arewhana?” “Kore rawa e kitea.”
- “Ki tō whakaaro, ka kitea he noke?” “Ākene pea ka kitea.”
- “Ki tō whakaaro, ka kitea he rākau?” “Kāre e kore, ka kitea.”
- “He aha tō matapae? Ina ka puta ki waho, ka kitea he arewhana?”
Mahia ētahi ngohe pāpono tūponotanga. Hei tauira:
- Ka tākaro hītokotoko. Tuhia he tauira ki te papa, he ōrite ki te mea kei te pukapuka. Ka uia atu ētahi pātai pēnei i te: “Ki tō matapae, ka hītoko a ________ ki te ________? Kāre e kore? Ākene pea? E kore rawa atu?”
- Ka tākaro i ētahi atu kēmu pērā i te kāri. Ka matapae ko wai ka toa, i te tīmatanga, i waenganui, ā, tata ana ki te mutunga o te kēmu. “Ki tō matapae, ko wai ka toa?”
He Pātai Whakawhitiwhiti Kōrero mō te Wā e Pānui Ngātahi ana te Pukapuka
- “E aha ana ngā tamariki?” “Kua tākarohia e koe te hītokotoko?”
- “He aha tō matapae?” (Tuhia ngā matapae ki tētahi tūtohi.)
- “Titiro mai ki te tūtohi. He aha ngā matapae a ngā ākonga?”
- “Tokohia ngā ākonga ka matapae, kāre e kore ka hītoko a __________ ki te ____________."
- “Tokohia ngā ākonga ka matapae e kore rawa atu a _____________ e hītoko ki te ___________?"
- “Tokomaha ake ngā ākonga i matapae ākene pea ka hītoko a __________ ki te ________."
- “Tokoiti ake ngā ākonga i matapae kāre e kore ka hītoko a __________ ki te _____________ ."
- “He aha te matapae o te tokomaha o ngā ākonga?
I Muri i te Pānui Pukapuka
Whakawhitiwhiti kōrero mō ngā matapae. Hei tauira:
- “I matapae ngā ākonga katoa ākene pea, ka hītoko a Kimi ki te tapatoru.”
- “Kāre tētahi i matapae e kore rawa atu a Kimi e hītoko ki te tapatoru.”
Ka tākarohia anō te hītokotoko. Ka whakarerekē te āhua o te papa hītokotoko. Mā ngā ākonga e whiriwhiri te āhua, me ngā tohu ka tuhi ki te āhua.
- Ka matapae ia ākonga mehemea ka hītoko ia ki tētahi wāhi.
- Ka matapae ngā ākonga mehemea ka hītoko tētahi atu ki tētahi wāhi.
- Tuhia ngā matapae ki te tūtohi.
- Kia oti te tākaro, ka hoki anō ki ngā matapae a ngā ākonga, ā, ka whakawhitiwhti kōrero. Hei tauira, “I hītoko te katoa o ngā ākonga ki te tapatoru. He tata tēnei āhua ki te tīmatanga, nā reira he māmā te hītoko ki tēnei āhua.”
Hangaia he kauwhata whakaahua hei whakaatu ka hītoko ngā ākonga ki ēhea o ngā āhua.
- "Tokohia ngā ākonga i hītoko ki te ________ ?”
- "Tokomaha, tokoiti rānei ngā ākonga i hītoko ki te _________?”
Ka āta whakaaro ake ngā ākonga i tētahi atu kaupapa hei matapae i te pāpono tūponotanga māmā. Ka mahi ā-rōpū.
- Ka whiriwhiri kaupapa.
- Ka tuhi i ngā matapae ki te tūtohi.
- Ka whakamātauria.
- Ka kōrero i ētahi kōrero māmā mō ngā hua i puta mai.
Tonoa ngā ākonga kia whakaoti i ētahi rerenga kōrero ā-tuhi. Hei tauira:
- Ko te tokomaha o ngā ākonga i matapae ___________________.
- Ko te tokoiti o ngā ākonga i matapae _____________________.
