Te Tākaro Māpere
Ngā Whāinga Ako
Kia mōhio te ākonga:
- ki te whakautu me te whakatakoto pātai māmā
- ki te tatau raraunga
- ki te whakamāori kauwhata whakaahua
- ki te whakaputa whakaaro, ki te matapaki i ngā otinga.
Ngā Kupu/Kīanga Matua
whakaari raraunga, raraunga, kauwhata whakaahua, matapaki
I Mua i te Pānui Pukapuka
Kōrero mō te pikitia kei te uhi o mua. Kei raro nei ētahi pātai hei āwhina:
- “E aha ana ngā tamariki?”
- “Kua tākaro māpere koe?”
- “He aha ngā ture mō te tākaro māpere?”
- “Me pēhea te tākaro māpere?”
Ka tākaro māpere ētahi o ngā ākonga. Kotahi anake te wā ki ia ākonga ki te whiu i āna māpere ki te rua. Ka mātakitaki te toenga o ngā ākonga, ka matapakina ngā otinga. Hei tauira:
- “Ki tō whakaaro, e hia ngā māpere a ________ ka uru ki te rua? I te tika tō whakaaro?"
- “E hia ngā māpere a ________ i uru ki te rua? Me tatau tahi tātau.”
- “E hia katoa ngā māpere i uru atu ki te rua?”
- “Nā wai te nuinga o ngā māpere i whiu ki te rua? Ko wai i toa?”
Ka tuhia tētahi whakaari raraunga hei whakaatu i ngā otinga. Ka mahi tahi ngā ākonga me te kaiako.
He Pātai Whakawhitiwhiti Kōrero mō te Wā e Pānui Ngātahi ana te Pukapuka
- “Ki tō whakaaro, e hia ngā māpere a ________ i uru ki te rua?”
- “Mā te aha koe e āwhina ki te kimi whakautu?” “Titiro mai ki tēnei. He aha tāu e kite ai?”
- “E ai ki tēnei whakaatu raraunga, e hia ngā māpere a _______ i uru ki te rua?”
- “He nui ake, he iti iho rānei ngā māpere a _________ i uru ki te rua i ngā māpere a ______?”
- "Ko wai i toa?”
- “He whakaari raraunga tēnei. He aha tāu e kite ai?”
I Muri i te Pānui Pukapuka
Mā ngā ākonga e whiriwhiri tētahi atu mahi hei kohi, hei tatau raraunga. Hei tauira:
- Makaia te pōro kia uru ki roto i tētahi ipu. Tekau pea ngā wā ki ia ākonga. Tatauria e hia ngā wā ka uru te pōro ki te ipu, e hia ngā wā kāore i uru.
Hangaia he kauwhata whakaahua hei tohu i ngā piro o ia ākonga.
Matapakina ngā otinga, e whakaatu ana i te kauwhata whakaahua. Hei tauira:
- “E hia ngā pōro a ________ i tau ki te ipu?” “He aha te whakautu ki te pātai?”
- "Ko wai i toa?”
- “He aha te tino kaupapa o te kauwhata whakaahua nei?”
- “He kōrero anō mō te kauwhata whakaahua?”
Whakawhitiwhiti kōrero mō te kohi raraunga. Mā te ākonga e whiriwhiri te kaupapa e pai ana ki a ia. Ka tīmata mai i te pātai e hiahia ana ki te whakautu. Hei tauira:
- Mā hea te nuinga o ngā ākonga haere mai ai ki te kura?
- Ko tēhea te huarākau pai ake ki ngā ākonga?
Tonoa ngā ākonga kia whakaoti i ētahi rerenga kōrero ā-tuhi. Hei tauira:
E __________ ngā pōro i tau ki te ipu.
He nui ake ngā pōro a _________ i tau ki te ipu.
I a ____________ te nuinga o ngā pōro i tau ki te ipu.