He kupu whakataki
He whakaputanga whakaharahara mō te whānau a Taiturakina rāua ko Anituatua Black, e whakamārama ana i ngā take me ngā āhuatanga e noho hiranga ai ki a rātou te takiwā me te whenua i whakatipua ai.
Ko ēnei taipitopito kōrero hei āwhina i te pouako, i tuhia hei whāngai atu ki te reanga taumata tuarima. Ko tōna tino tūwāhi whakaakoranga kei te marautanga tikanga ā-iwi, kei tōna whenu, arā, ko Te wāhi me te taiao. Ko te whāinga paetae tuarua o Te wāhi me te taiao, Taumata 5, kei te whārangi 96 o te marautanga tikanga ā-iwi.
E rima ngā ngohe, e toru, e whā rānei ngā mahi o ia ngohe. Tekau mā waru te katoa o ngā mahi, e whā tekau miniti ki te kotahi haora te roanga mō ia mahi.
Ko ētahi o ngā tino pūkenga o te marautanga o Aotearoa, arā, ko ngā pūkenga mōhiohio, ngā pūkenga hīraurau hopanga, ngā pūkenga pāpori me ngā pūkenga pāheko, e whakaatatia ana i roto i ngā ngohe me ngā mahi.
Hei tauira tīmatatanga whakaako
E pai ana kia pānui tonutia e te pouako ngā kōrero o roto i mua atu o te rangi ka toha ai ki ngā ākonga. Nā te hōhonu me te hira o ngā kōrero i roto i Te Wharekura 69, tērā pea, me pānui noa ngā whārangi e rua, ka whakamahi ai i ngā ariā matua, ngā nekehanga, te tāutu i ngā kupu hou, me te tuku pātai hei aki i ā rātou whakawhitinga kōrerorero.
Whakamahia ngā ākonga ki te tuhi i ngā mea nā te katoa i whakatau ki roto i ā rātou pukapuka, kia whiwhi kōrero ai rātou ina ka kimikimi anō rātou mai i te kōrero pūrākau. Meinga kia whiwhi tonu te ākonga kotahi ki tāna ake pukapuka wharekura.
Ngā hono ki ētahi atu marautanga
Ahakoa kua tuhia ngā ngohe me ngā mahi e whai ake nei hei āwhina i te whakaheinga o te marautanga tikanga ā-iwi, kāore e kore ka whakapakari aua ngohe i ngā pūkenga whakawhitiwhiti whakaaro, rangahau, whakaraupapa mōhiohio hoki o ngā ākonga i roto i te reo Māori. Nā reira, ka taea te kī mā te whakaoti ēnei mahi ka paku whakareia ngā pūkenga reo o ngā ākonga i roto i ngā whenu pānui, kōrero me te tuhituhi o Te Reo Māori i roto i te Marautanga o Aotearoa, inā koa kei ngā kōeke 5–8. Ka āwhina anō hoki ēnei ngohe ki te whakapakari i ngā pūkenga o ngā ākonga ki te whakaoti i ēnei o ngā paerewa paetae o Te Reo Rangatira, kōeke 1, o te Taumata Mātauranga ā-Motu, arā:
- Te Reo Rangatira 1.2 Kōrero i ngā horopaki huhua noa
- Te Reo Rangatira 1.3 Pānui i ngā horopaki huhua noa
- Te Reo Rangatira 1.5 Tuhituhi i ngā horopaki huhua noa.
Te taumata mātauranga ā-motu
Me kī anō hoki ka whakapakari ngā ngohe nei i ngā pūkenga me ngā tukatuka e hiahiatia ana e ngā ākonga ki te whakaoti i ngā paerewa paetae e 5 o ngā tikanga ā-iwi, kōeke 1, o te Taumata Mātauranga ā-Motu, ahakoa kāore anō ēnei kia tuhia ki te reo Māori. Ko aua paerewa paetae ko:
- te tirotiro i ngā panoni i roto i te pāpori
- te tirotiro i te whai wāhi a te tangata i roto i te pāpori
- te whakahaere i tētahi pakirehua tikanga ā-iwi
- te tirotiro i ngā waiaro rerekē o ngā rōpū rerekē
- te whakatakoto i ngā mahi me mahi ki te whakatau i tētahi take pāpori.
