Te tuna nioreore
KAI KŌRERO: E rua ngā nanakia e tautohetohe ana. Ki a rāua, ko rāua anake ngā toa mō te hopu tuna. Ēngari, kāore tētahi e hiahia, kia iti iho tētahi, i tētahi.
KO TIMI: A tēnā, e hia ngā tāera hopu tuna mōhio koe?
KO HEMI: E tā, mai te rapu ki te hīnaki, ko au te toa.
KO TIMI: E rua noaiho ēnā i whakahuatia e koe. Ka pēhea te pia, te toitoi, te hao, ā, te hura kōhatu pao atu hoki? E rima noa atu āku tāera.
KO HEMI: E hoa, nā te tamaiti ihu hūpe ēnā tāera. Kua mahia rāno e au he pā tuna . . .
KO TIMI: ...He aha hoki tēnā momo hopu tuna? He kimikimi pea nāu.
KO HEMI: (Meke pārekareka ana i a Timi). . . . E hoa, ko wai tō māhita? Me kōrero te mōhio ki ngā mahi a ngā tūpuna. Ko te pā tuna, he taiapa e toro ana i te whāroa o te awa. Anei, māku e torō atu kia mōhio ai koe. (Ka rere a Hemi ki tētahi peka rākau, ka torō ki runga i te oneone.) . . . Anei titiro. Ka haere mai he tuna, ka ākina e te ia ki roto i ngā hīnaki nei. Kāore e puta. Maha ngā tuna ka mau.
KO TIMI: (Kua harawene nei) . . . Ā tēnā, he pēhea te tuna nui kua mau i a koe?
KO HEMI: (Kua toru ngā ringa o Hēmi ki ngā whānuitanga) Arā . . . pēnei te nui. He taniwha ke. I mau i ahau ki roto i te pā tuna nei.
KO TIMI: E tā, ko ngā kanohi noaiho tēnā o tāku. Nā te ringa noaiho i hopu.
KAI KŌRERO: Whawhai tonu atu ngā nanakia nei.
Hei mahi
He tika ēnei pātai mō nga kōrero 'Te tuna nioreore?' Āe, kāore rānei?
1. E toru nga nanakia?
2. He kimikimi noaiho te pā tuna nā Hēmi?
3. Nā nga Tūpuna i mahi te pā tuna?
4. Nā Timi te tuna nunui?
5. Tū ai te pā tuna i te taha o te awa?