He kupu whakataki
He huinga pukapuka a Te Tautoko i whakatakotoria hei rauemi reo Māori e pā ana ki te ao Māori i roto i te horopaki, mō ngā rā o mua, o tēnei wā tonu, me ngā rā e heke mai nei. Ka tautokona hoki ngā whāinga matua o ia marau, arā, ko te reo Māori, pāngarau, pūtaiao, hangarau, ngā tikanga ā-iwi, ngā toi, me te hauora mō ngā taumata toru ki te rima. Ka noho mai he kōrero paki, he kōrero pono anō hoki hei tūāpapa, ā, ko te tikanga, mai i reira ka toro haere ngā ākonga i ngā mahi takitahi, i ngā mahi ā-rōpū, i ngā mahi ā-akomanga rānei i te roanga atu o ngā kōrero.
Kua hora mai a Te Tautoko 61 hei whāwhātanga mā te hunga e ako ana i te reo Māori me ōna tikanga.
Te whakamahi i tēnei pukapuka
Mā te pouako tēnei pukapuka, hei āwhina, hei tautoko i āna mahi whakarite mahere ako mā ngā ākonga. Ka arotahi ki Te Reo Māori i roto i te Marautanga o Aotearoa, ki ngā whāinga paetae, ngā pūkenga, te kawenga, me te aromatawai. Kei te kaupapa matua arā ko Haumiatiketike rāua ko Rongomātāne te horopaki e hāngai ana ki te taumata me tāu e hiahia ana mō āu ākonga. Whakawehea ia whenu, kia whakawhanake i ngā pūkenga o ngā ākonga. Tērā pea ka hiahia koe te whakatārua i ngā wāhanga o tēnei pukapuka hei tāpiri atu ki tāu mahere.
Te kaupapa matua o Te Tautoko 61
Ko Haumiatiketike rāua ko Rongomātāne ngā atua o ngā kai i ahu mai i te whenua. He aha ngā āhuatanga o tēnā atua, o tēnā atua? Ko te ngaki māra, ko te whakatō pihi tae atu ki hauhake i ngā hua, ētehi o ngā kaupapa kōrero i roto i Te Tautoko 61.
Ngā kaupapa whāiti o Te Tautoko 61
E iwa ngā kaupapa whāiti hei mahi, hei rangahau mā ngā ākonga, mā te pouako hoki:
- Ngā atua e rua
- Haumiatiketike
- Rongo
- Mai i Hawaiki
- Te ahu whenua - mahi māra
- Te rīwai peruperu
- Te mahinga
- Wātaka tiaki rīwai
- E Rongo e
