He mahi whakarākei
Ngā Toi i roto i te Marautanga o Aotearoa
| Whenu | Toi ataata (wh. 105) |
|---|---|
| Kōeke | 8 |
| Whāinga paetae | Ka tīpako rawa tā te ākonga hei whakawhanake, hei whakaputa i ōna ake ariā Toi Ataata. |
| Te pūkenga | Te whakaatu mai i ngā pūtake o ngā ariā, ngā pūkenga, ngā tūhuratanga, ngā whakamātautanga, me ngā tirohuratanga hei whakarite i mua i te mahitanga i tētahi mahi Toi Ataata. |
| Tauira tohu aromatawai | Te whakaatu ā-hui i ōna ake rautaki mahi Toi Ataata, mai i ōna wheako whaiaro kia kitea ai te auahatanga o tāna i mahi ai. |
| He tauira | Te whakahoahoa waharoa mō te kura. |
| Rerenga kōrero | E āhei ana te ākonga ki te whakaatu mai i te whakaritenga o ngā ariā, ngā pūkenga, ngā tūhuratanga, ngā whakamātautanga me te tirohuratanga ki roto i te pūkohi mahi. |
Hei mahi 8:
He mahi ā-rōpū. Whakahoahoatia tētahi waharoa mō tō kura. Ko te kaupapa, ko Tangaroa. Mēnā kua tū kē he waharoa i tō kura, hangaia tētahi mō tō akomanga. Whakaarohia te huarahi haere atu ki te waharoa. Whakarākeitia ki ngā mea ka kitea i tai, pērā i te tāwhaowhao, i ngā anga, i te one me ngā kōhatu hoki.
He whakaaro atu anō
Hangaia tētahi o ēnei ki ngā mea ka kitea i tai:
- tētahi matawā nui (hei whakairi ki te pakitara)
- he paepae mō ngā pene o te akomanga
- he paepae mō ngā pukapuka o te akomanga
- he paepae kai (me whakamahi pea he paepae aihikirīmi tawhito)
- he paepae whakatupu otaota.
