Te Wharekura 72 – Kawiti
Kawiti – He Whakapapa: Hei mahi
Hoatu ngā ingoa o ngā pakanga ki te ākonga e pā ana ki ngā mahi a Kawiti, arā, Kororāreka, Ōkaihau, Ōhaeawai, me Ruapekapeka. Mā te ākonga e rapu mōhiotanga mai i ngā pukapuka, i ngā pānui, i ētahi atu momo tuhinga rānei, kia taea ai te kī kei te tika te rerenga kōrero, kei te hē rānei. (Pānui, kōeke 6)
Ka pānui te ākonga i tētahi kōrero tangata mō Kawiti, mō Maihi Paraone Kawiti, mō Te Riri Maihi Kawiti rānei. Whiriwhirihia te tangata hei kaupapa tuhi mā te ākonga. Māna anō e rapu kōrero mai i te pukapuka hei tautoko i tāna e tuhi nei. (Pānui, kōeke 7)
Ka pānui te ākonga i te rārangi whakapapa o Kawiti ki a Kene Martin. Ka pātai te pouako ki te ākonga kia rangahau i tōna ake whakapapa (e whā ngā whakatupuranga ki muri) me ngā mahi ka mahia e ōna tūpuna, mātua hoki. (Pānui, kōeke 7)
Ka titiro, ā, ka pānui te ākonga i te kōrero kei raro i te whakaahua o Kawiti Marae. Ka rangahau te ākonga i ngā ingoa o ngā wharenui, wharekai, te aha rānei i runga i tōna ake marae, me ngā take ka huaina pērātia ērā whare. (Pānui, kōeke 7)
Kia iti ake i te 40 kupu te tuhinga a te ākonga mō te wāhanga o te pukapuka ākonga, 'He kōrero mō Hineāmaru'. (Tuhituhi, kōeke 7)
