Waiata: Taumata Atua
Nā Piri Sciascia i tito
Tērā te marama ka whanake rā runga
O Wakatipu e, o Te Koroka
Te Mahina a rangi e tiaho iho ana
He waihanga pounamu
He waihanga inanga
Ngā Kurakura o Hinenuitepō
He kurahaupō, kurahauawatea
He tohu na Ranginui e tū nei
He rangimarie he waimarie
E iri ana i runga o Murihiku.
Ka rere taku waka ki runga o Aorangi
Te maunga tipua
Te maunga atua
Ka rere tonu rā ki te kimi kōhatu
Hei koha ki ngā whare o Amerika
Nāna i maimoa
Nāna i maioha
Taku hinu rautangi, taku hinu raukawa
Ina! Te Māori e!
Kimihia rangahaua he kōhatu pounamu
I roto i te awa o Kāoreore
E rere atu ana ki te Wai o Hinetū
I roto rā hoki i te wai o Arahura
E rere atu ana ki te Tai Poutini
Nā ngā tīpuna nā Te Wairua Tapu
I whakakitea, i whakaaturia mai.
E rua ngā whatu i kawea atu rā
Ko Te Waipounamu mō Te Āporo Nui
Ina te tīmatanga, te aupounamu
Ko taku Kererū, Aotearoa e
Pikaungia hei pou whakamutunga
Nā Tūwhāngai, nā Matutaera
Ngā kupu mārama, ngā kupu aroha
Whārikitia e ki mua i te whare
Ki te aroaro o Ruatepupuke
Nāna i tiki ngā mahi tapu a te whao
He toki ngao tū, he toki ngao pae
Toki ao mārama toki ngao matariki
Ka tutuki pai o Te Māori tikanga
Ka ea te kōrero ko te whakatauākī
He toi whakairo he mana tangata.